អំពាវនាវដល់ព្រះអង្គ ក្នុងទុក្ខវេទនា
ដោយodbm
March 13, 2024
ទំនុកដំកើង ១១៨:១-៩
ខ្ញុំបានអំពាវនាវដល់ព្រះយេហូវ៉ា ដោយសេចក្តីវេទនារបស់ខ្ញុំ ព្រះយេហូវ៉ាទ្រង់ក៏ទទួលស្តាប់ ហើយបានដាក់ខ្ញុំទុកនៅទីធំទូលាយ។ ទំនុកដំកើង ១១៨:៥
កាលក្មេងស្រីជនជាតិស៊ីរី ឈ្មោះ ជីណាន(Jinan) កំពុងជាប់ខ្លួន នៅក្រោមអគារពីរជាន់ ដែលបានដួលរលំ ដោយសារគ្រោះរញ្ជួយដី នាងក៏បានស្រែកហៅក្រុមអ្នកជួយសង្គ្រោះ ខណៈពេលដែលនាងកំពុងប្រើខ្លួននាង ជាខែលការពារប្អូនប្រុសរបស់នាង ឲ្យរួចផុតពីកំទេចថ្មដែលធ្លាក់នៅជុំវិញពួកគេ។ នាងក៏បានស្រែកហៅគេ ដោយសម្លេងដ៏សង្វេគថា “សូមយកខ្ញុំចេញពីកន្លែងនេះ។ ទោះអ្នកឲ្យខ្ញុំធ្វើអ្វី ក៏ខ្ញុំព្រមដែរ។ ខ្ញុំនឹងធ្វើជាអ្នកបម្រើរបស់អ្នក”។
ការស្រែកសូមឲ្យព្រះអម្ចាស់ជួយ ក្នុងសេចក្តីវេទនា គឺជារឿងដែលមានចែងក្នុងកណ្ឌគម្ពីរទំនុកដំកើងទាំងមូល ដែលមានដូចជា : “ខ្ញុំបានអំពាវនាវដល់ព្រះយេហូវ៉ា ដោយសេចក្តីវេទនារបស់ខ្ញុំ”(១១៨:៥)។ យើងប្រហែលមិនដែលបានដកពិសោធន៍ជាមួយនឹងការជាប់ខ្លួនក្នុងអគារដែលបាក់ស្រុត ដោយសារគ្រោះរញ្ជួយដីទេ តែយើងរាល់គ្នាសុទ្ធតែ ស្គាល់ការភ័យខ្លាច ដោយសារការពិនិត្យសុខភាពឃើញមានជំងឺ ទុក្ខលំបាកផ្នែកសេដ្ឋកិច្ច ភាពមិនច្បាស់លាស់នៃពេលអនាគត ឬការបាត់បង់ទំនាក់ទំនងជាដើម។
ក្នុងពេលបែបនោះ យើងប្រហែលទូលសូមព្រះអម្ចាស់ជួយរំដោះយើង។ ប៉ុន្តែ ព្រះអង្គមិនត្រូវការឲ្យយើងបញ្ចុះបញ្ចូលព្រះអង្គ ឲ្យជួយយើងនោះទេ។ ព្រះអង្គបានសន្យាថានឹងឆ្លើយតប ហើយទោះព្រះអង្គមិនរំដោះយើងឲ្យរួចពីស្ថានភាពដ៏លំបាករបស់យើងភ្លាមៗក៏ដោយ ក៏ព្រះអង្គនៅតែគង់នៅជាមួយយើង ហើយកាន់ខាងយើង។ ហើយយើងក៏មិនចាំបាច់ត្រូវខ្លាចគ្រោះថ្នាក់ណាមួយ ដែលរាប់បញ្ចូលទាំងសេចក្តីស្លាប់ផងដែរ។ យើងអាចពោលឡើង ជាមួយអ្នកនិពន្ធបទគម្ពីរទំនុកដំកើងថា “ព្រះយេហូវ៉ាទ្រង់កាន់ខាងខ្ញុំ ជាមួយនឹងពួកអ្នកដែលជួយខ្ញុំដែរ ដូច្នេះ ខ្ញុំនឹងឃើញការកើតដល់ពួកអ្នកដែលស្អប់ខ្ញុំ តាមបំណងចិត្តខ្ញុំ”(ខ.៧)។
ព្រះអង្គមិនបានសន្យាថា យើងនឹងរួចពីគ្រោះថ្នាក់ភ្លាមៗ ដូចជីណាន និងប្អូនប្រុសរបស់នាងឡើយ តែយើងអាចទុកចិត្តព្រះដ៏ស្មោះត្រង់របស់យើង ដែលបាននាំអ្នកនិពន្ធទំនុកដំកើង ទៅកន្លែងដ៏ធំទូលាយ(ខ.៥)។ ព្រះអង្គជ្រាបអំពីស្ថានភាពរបស់យើង ហើយព្រះអង្គនឹងមិនបោះបង់ចោលយើងឡើង ទោះក្នុងសេចក្តីស្លាប់ក៏ដោយ។—Matt Lucas
តើព្រះអម្ចាស់បានបង្ហាញសេចក្តីស្មោះត្រង់របស់ព្រះអង្គដូចម្តេចខ្លះ ពេលអ្នកជួបទុក្ខវេទនា? តើអ្នកបានឃើញព្រះវត្តមានព្រះអង្គដូចម្តេចខ្លះ ក្នុងអំឡុងពេលដ៏ពិបាក?
ឱព្រះវរបិតាដែលគង់នៅស្ថានសួគ៌ ទូលបង្គំស្រែករកព្រះអង្គ ដោយដឹងថា ព្រះអង្គឮទូលបង្គំ។ ទូលបង្គំសូមអរព្រះគុណព្រះអង្គ ដែលមានព្រះទ័យស្មោះត្រង់ និងមានសេចក្តីស្រឡាញ់ចំពោះទូលបង្គំ។
គម្រោងអានព្រះគម្ពីររយៈពេល១ឆ្នាំ : ចោទិយកថា ២០-២២ និង ម៉ាកុស ១៣:២១-៣៧