និក្ខមនំ ៣:១១-១៥
ព្រះទ្រង់មានព្រះបន្ទូលទៅម៉ូសេថា «អញជាព្រះដ៏ជាព្រះ»។ និក្ខមនំ ៣:១៤
លោកជែក(Jack) ជាសាស្ត្រាចារ្យទស្សនវិជ្ជា និងអក្សរសាស្រ្ត ដែលមានកំរិតបញ្ញាខ្ពស់។ កាលគាត់មានអាយុ១៥ឆ្នាំ គាត់បានប្រកាសថា គាត់ជាមនុស្សដែលមិនជឿថាព្រះមានពិតមែន។ ពេលគាត់ពេញវ័យ គាត់មានការការពារយ៉ាងមុតមាំ សម្រាប់ “ជំនឿនៃមនុស្សដែលមិនជឿថា ព្រះមានពិតមែន”។ មិត្តភក្តិជាគ្រីស្ទបរិស័ទបានព្យាយាមបញ្ចុះបញ្ចូលគាត់។ លោកជែកក៏បាននិយាយថា “មនុស្សគ្រប់គ្នា និងអ្វីៗទាំងអស់សុទ្ធតែមានជំនឿខុសពីគាត់”។ ប៉ុន្តែ គាត់បានទទួលស្គាល់ថា ព្រះគម្ពីរប៊ីបមានលក្ខណៈខុសពីស្នាដៃអក្សរសាស្រ្ត និងរឿងទេវកថាផ្សេងទៀត។ ក្នុងសំណេររបស់គាត់អំពីដំណឹងល្អ គាត់បាននិយាយថា “បើសិនជាមានរឿងទេវកថាណាមួយ ប្រែក្លាយជាការពិត នោះវានឹងមានលក្ខណៈដូចព្រះគម្ពីរប៊ីប”។
មានបទគម្ពីរមួយ ដែលមានឥទ្ធិពលបំផុតមកលើលោកជែក គឺនិក្ខមនំ ជំពូក៣ ដែលក្នុងនោះ ព្រះទ្រង់កំពុងត្រាស់ហៅលោកម៉ូសេ ឲ្យដឹកនាំពួកអ៊ីស្រាអែលចេញពីទឹកដីអេស៊ីព្ទ។ លោកម៉ូសេក៏បានទូលសួរព្រះអង្គថា “តើទូលបង្គំជាអ្វី ដែលព្រះអង្គឲ្យទូលបង្គំទៅឯផារ៉ោន?”(ខ.១១)។ ព្រះអម្ចាស់ក៏បានឆ្លើយតបថា “អញជាព្រះដ៏ជាព្រះ”(ខ.១៤)។ ខគម្ពីរនេះបានបង្កប់អត្ថន័យដ៏ស្មុគស្មាញ នៅក្នុងពាក្យ និងព្រះនាមរបស់ព្រះ តែបានឆ្លុះបញ្ចាំងអំពីព្រះវត្តមានដ៏អស់កល្បរបស់ព្រះ ចាប់តាំងពីអស់កល្បជានិច្ចរៀងមក។ អ្វីដែលគួរឲ្យចាប់អារម្មណ៍នោះ នៅសម័យក្រោយមក ព្រះយេស៊ូវក៏បានមានបន្ទូលដូចនេះ អំពីអង្គទ្រង់ផងដែរថា “មុនដែលលោកអ័ប្រាហាំកើតមក នោះមានខ្ញុំហើយ”(យ៉ូហាន ៨:៥៨)។
លោកជែក ដែលមានឈ្មោះពេញថា ស៊ី អេស លូអ៊ីស(C. S. Lewis) មានការប៉ះពាល់ចិត្តយ៉ាងខ្លាំង ចំពោះខគម្ពីរនេះ។ នេះជាពាក្យ ដែលព្រះពិតគួរតែមានបន្ទូល គឺគ្រាន់តែមានបន្ទូលថា ព្រះអង្គជាព្រះដ៏ជាព្រះ។ ក្នុងពេលដែលជីវិតគាត់មានការផ្លាស់ប្រែ លោកលូអ៊ីសក៏បានចុះចូលនឹងបំណងព្រះទ័យព្រះអង្គ ហើយទទួលស្គាល់ថា ព្រះអង្គជាព្រះ។ នេះជាការចាប់ផ្តើមនៃការធ្វើដំណើររបស់លោកលូអ៊ីស ឆ្ពោះទៅរកការទទួលជឿព្រះយេស៊ូវ។
យើងប្រហែលជាពិបាកទទួលជឿព្រះ ដូចលោកលូអ៊ីសផងដែរ ឬប្រហែលជាមានជំនឿដែលក្តៅមិនក្តៅត្រជាក់មិនត្រជាក់។ យើងប្រហែលជាសួរខ្លួនឯងថា តើព្រះអង្គគឺជាព្រះពិត ក្នុងជីវិតយើងមែនឬ?—Kenneth Petersen
តើអ្នកមានការយល់ឃើញយ៉ាងណា ពេលបានឃើញព្រះទ្រង់មានបន្ទូលថា ព្រះអង្គជាព្រះដ៏ជាព្រះ? តើការនេះអាចមានឥទ្ធិពលយ៉ាងណាខ្លះ មកលើការរស់នៅរបស់អ្នកនៅថ្ងៃក្រោយ?
ឱព្រះអម្ចាស់ ទូលបង្គំចូលមករកព្រះអង្គ ដោយការស្ញែងខ្លាច ពេលបានដឹងថា ព្រះអង្គជានរណា។ ព្រះអង្គជាព្រះ ក្នុងជីវិតទូលបង្គំ ហើយគ្មាននរណាផ្សេងទៀតដែលជាព្រះឡើយ។
គម្រោងអានព្រះគម្ពីររយៈពេល១ឆ្នាំ : ចោទិយកថា ៣២-៣៤ និង ម៉ាកុស ១៥:២៦-៤៧
