ម៉ាថាយ ២៥:៣១-៤០
យើងប្រាប់អ្នករាល់គ្នាជាប្រាកដថា ដែលអ្នករាល់គ្នាបានធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថា បានធ្វើដល់យើងដែរ។ ម៉ាថាយ ២៥:៤០
គ្រួសាររបស់លោកអាល់បា(Alba) បានជួបរឿងដ៏កម្រ។ បន្ទាប់ពីកូនភ្លោះមួយគូរបានចាប់កំណើតបាន១៣ខែ កូនភ្លោះមួយគូរទៀតក៏បានចាប់កំណើតក្នុងគ្រួសារគាត់។ តើពួកគេអាចមានការទទួលខុសត្រូវនៅក្នុងការចិញ្ចឹមកូន ក៏ដូចជានៅក្នុងការធ្វើការងារ ដោយរបៀបណា? ពេលនោះមិត្តភក្តិ និងសាច់ញាតិរបស់ពួកគេក៏បានជួយយកអសារពួកគេ។ តាយាយទាំងសង្ខាងក៏បានជួយមើលកូនភ្លោះរបស់ពួកគេ នៅពេលថ្ងៃ ដើម្បីឲ្យពួកគេអាចធ្វើការ និងរកប្រាក់បង់ថ្លៃពេទ្យ។ ក្រុមហ៊ុនមួយបានឧបត្ថម្ភកន្ទបសម្រាប់ទារកដល់ពួកគេ ពេញមួយឆ្នាំ។ មិត្តរួមការងាររបស់ពួកគេក៏បានលះបង់ថ្ងៃឈប់សម្រាកផ្ទាល់ខ្លួន សម្រាប់ពួកគេ។ ពួកគេក៏បានយល់ស្របថា បើគ្មានជំនួយពីសហគមន៍របស់ពួកគេទេ នោះពួកគេមុខជាជួបការលំបាកយ៉ាងខ្លាំង។ តាមពិត ក្នុងពេលសម្ភាសតាមទូរទស្សន៍ ក្នុងការផ្សាយផ្ទាល់ ពិធីករម្នាក់បានទុកក្បាលមេក្រូរបស់ខ្លួនចោល ដើម្បីរត់ទៅចាប់កូនរបស់ពួកគេម្នាក់ ដែលកំពុងដើរតេសតាស់ ព្រោះតែចង់ជួយមើលថែកូនរបស់ពួកគេ។
ក្នុងបទគម្ពីរម៉ាថាយ ២៥:៣១-៤៦ ព្រះយេស៊ូវបានមានបន្ទូលជាពាក្យប្រៀបប្រដូច ដើម្បីចង្អុលបង្ហាញថា ពេលណាយើងបម្រើអ្នកដទៃ នោះយើងក៏បម្រើព្រះផងដែរ។ ការបម្រើនោះរួមមានការចែកអាហារ និងទឹកដល់អ្នកស្រេកឃ្លាន ការផ្តល់កន្លែងស្នាក់នៅដល់ជនអនាថា ការចែកសំលៀកបំពាក់ដល់អ្នកដែលគ្មានសំលៀកបំពាក់ និងមើលថែអ្នកមានជំងឺជាដើម(ខ.៣៥-៣៦)។ ព្រះអង្គក៏បានមានបន្ទូលសរុបថា “យើងប្រាប់អ្នករាល់គ្នាជាប្រាកដថា ដែលអ្នករាល់គ្នាបានធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថា បានធ្វើដល់យើងដែរ”(ខ.៤០)។
ការបង្រៀនថា ការបម្រើអ្នកដទៃគឺជាការបម្រើព្រះយេស៊ូវ គឺបានលើកទឹកចិត្តយើងឲ្យបម្រើអ្នកជិតខាង ក្រុមគ្រួសារ ពួកជំនុំ និងលោកិយ។ ដូចនេះ ពេលណាយើងជួយបំពេញតម្រូវការរបស់អ្នកដទៃ នោះមានន័យថា យើងកំពុងបម្រើព្រះអង្គ។ ហើយពេលណាយើងស្រឡាញ់អ្នកដទៃ នោះមានន័យថា យើងស្រឡាញ់ព្រះអង្គផងដែរ។—Elisa Morgan
តើអ្នកអាចអាចបម្រើព្រះយេស៊ូវ ក្នុងសហគមន៍របស់អ្នកនៅថ្ងៃនេះ យ៉ាងដូចម្តេចខ្លះ? តើអ្នកអាចស្រឡាញ់ព្រះ ដោយស្រឡាញ់អ្នកដទៃដូចម្តេចខ្លះ?
ឱព្រះនៃសេចក្តីស្រឡាញ់ សូមព្រះអង្គបើកភ្នែកទូលបង្គំឲ្យមើលឃើញតម្រូវការរបស់អ្នកដទៃ ដើម្បីឲ្យទូលបង្គំអាចជួយបំពេញតម្រូវការពួកគេ និងស្រឡាញ់ព្រះអង្គកាន់តែខ្លាំងឡើង។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៩-២១ និង លូកា ២:២៥-៥២
