ព្រឹក
ព្រះដែលប្រទាន ទ្រង់ទទួលសិរីល្អ
ដោយJohn Piper
March 31, 2024
ដូច្នេះ យើងខ្ញុំអធិស្ឋានឲ្យអ្នករាល់គ្នាជានិច្ច ដើម្បីឲ្យព្រះនៃយើងខ្ញុំ បានរាប់អ្នករាល់គ្នាជាគួរនឹងការ ដែលទ្រង់ហៅមកធ្វើ ហើយឲ្យទ្រង់បានបំពេញគ្រប់អស់ទាំងសេចក្តីបំណងខាងឯការល្អ និងការដែលធ្វើដោយជំនឿ ដោយព្រះចេស្តា ដើម្បីឲ្យព្រះនាមនៃព្រះយេស៊ូវគ្រីស្ទ ជាព្រះអម្ចាស់នៃយើង បានដំកើងឡើងក្នុងអ្នករាល់គ្នា ហើយអ្នករាល់គ្នាក្នុងទ្រង់ផង តាមព្រះគុណរបស់ព្រះនៃយើង និងព្រះអម្ចាស់យេស៊ូវគ្រីស្ទ។ ២ថែស្សាឡូនីច ១:១១-១២
នេះជាដំណឹងដ៏ល្អ ដែលព្រះទ្រង់បានរៀបចំ ឲ្យសិរីល្អរបស់ព្រះអង្គបានដំកើងឡើង តាមរយៈការប្រទានព្រះគុណព្រះអង្គ។
ជាការពិតណាស់ សិរីល្អរបស់ព្រះបានដំកើងឡើង តាមរយៈអំណាចនៃសេចក្តីក្រោធរបស់ទ្រង់ (រ៉ូម ៩:២២) ប៉ុន្តែ ព្រះគម្ពីរសញ្ញាថ្មី(និងព្រះគម្ពីរសញ្ញាចាស់ គឺអេសាយ ៣០:១៨ ជាដើម) បានចែងថា យើងគួរតែពិសោធន៍នឹងព្រះគុណព្រះដើម្បីឲ្យថ្វាយសិរីល្អដល់ព្រះអង្គ។
សូមពិចារណា អំពីរបៀបដែលការនេះមានដំណើរការ ក្នុងការអធិស្ឋាន នៃបទគម្ពីរ ២ថែស្សាឡូនីច ១:១១-១២។
សាវ័កប៉ុលបានអធិស្ឋានសូមព្រះទ្រង់បំពេញសេចក្តីបំណងខាងឯការល្អរបស់យើង។
តើដោយរបៀបណា? គាត់បានអធិស្ឋានថា សូមឲ្យសេចក្តីបំណងនោះ បានសម្រេច "ដោយព្រះចេស្តាព្រះ" និង "ជាការធ្វើដោយជំនឿ"។
ហេតុអ្វី? គឺដើម្បីឲ្យព្រះយេស៊ូវបានដំកើងឡើង នៅក្នុងជីវិតយើង។
បានសេចក្តីថា អ្នកឲ្យបាទទទួលសិរីល្អ។ ព្រះទ្រង់ប្រទានអំណាច។ ព្រះទ្រង់ទទួលបានសិរីល្អ។ យើងមានជំនឿ ព្រះទ្រង់ប្រទានអំណាច។ យើងទទួលបានជំនួយ ព្រះអង្គទទួលបានសិរីល្អ។ នេះជាការទទួលបានទាំងសង្ខាង ដែលធ្វើឲ្យយើងនៅតែបន្ទាបខ្លួន និងមានអំណរ ហើយឲ្យយើងនៅតែទទួលស្គាល់ថា ព្រះអង្គមានអំណាចខ្ពស់បំផុត និងពេញដោយសិរីល្អ។
បន្ទាប់មក សាវ័កប៉ុលក៏បានមានប្រសាសន៍ផងដែរថា ការថ្វាយសិរីល្អដល់ព្រះគ្រីស្ទយ៉ាងដូចនេះ គឺស្របទៅ "តាមព្រះគុណរបស់ព្រះនៃយើង និងព្រះអម្ចាស់យេស៊ូវគ្រីស្ទ"។
សាវ័កប៉ុលបានអធិស្ឋានសូមឲ្យយើងពឹងផ្អែកទៅលើអំណាចចេស្ដាព្រះ ដើម្បីធ្វើការល្អ ហើយការឆ្លើយតបរបស់ព្រះអង្គ ចំពោះការអធិស្ឋាននេះ គឺជាព្រះគុណព្រះអង្គ។ អំណាចចេស្ដារបស់ព្រះ ដែលជួយឲ្យអ្នកធ្វើការល្អ គឺជាព្រះគុណព្រះអង្គ។
នេះជារបៀបដែលរឿងនេះមានដំណើរការម្តងហើយម្តងទៀត នៅក្នុងគ្រាសញ្ញាថ្មី។ ចូរយើងទុកចិត្តថា ព្រះទ្រង់នឹងជួយយើងឲ្យអាចធ្វើការល្អ ដោយព្រះគុណព្រះអង្គ ហើយព្រះអង្គទទួលសិរីល្អ ពេលដែលជំនួយរបស់ព្រះអង្គបានមកដល់។
យើងទទួលបានជំនួយ។ ព្រះអង្គទទួលបានសិរីល្អ។
ហេតុនេះហើយ ការផ្លាស់ប្រែរបស់គ្រីស្ទបរិស័ទ ក៏ដូចជាការរស់នៅរបស់គ្រីស្ទបរិស័ទ គឺជាដំណឹងដ៏ល្អ។
ប្រភេទ
ល្ងាច
ព្រះយេស៊ូវមានព្រះជន្មរស់ឡើងវិញហើយ!
ដោយAmy Boucher Pye
March 31, 2024
ម៉ាថាយ ២៨:១-១០
ទ្រង់មិនគង់នៅទីនេះទេ ដ្បិតទ្រង់មានព្រះជន្មរស់ឡើងវិញហើយ ដូចជាទ្រង់បានមានព្រះបន្ទូលទុក ចូរមកមើលកន្លែងដែលទ្រង់បានផ្ទំចុះ។ ម៉ាថាយ ២៨:៦
មុនពេលលោក ឆាល ស៊ីមាន(Charles Simeon) ចូលរៀននៅសកលវិទ្យាល័យខេមប្រ៊ីជ ប្រទេសអង់គ្លេស គាត់ចូលចិត្តសត្វសេះ និងសំលៀកបំពាក់ណាស់ បានជាគាត់ចំណាយលុយជាច្រើនជារៀងរាល់ឆ្នាំ ទៅលើការស្លៀកពាក់របស់គាត់។ ប៉ុន្តែ ដោយសារសកលវិទ្យាល័យរបស់គាត់បានតម្រូវឲ្យគាត់ចូលរួមកម្មវិធីលៀងព្រះអម្ចាស់ជាទៀងទាត់ គាត់ក៏បានចាប់ផ្តើមស្វែងយល់អំពីជំនឿរបស់គាត់។ បន្ទាប់ពីគាត់បានអានសៀវភៅដែលអ្នកជឿព្រះយេស៊ូវបាននិពន្ធ គាត់ក៏មានការផ្លាស់ប្រែដ៏រំភើបរីករាយ នៅថ្ងៃអាទិត្យ ដែលគេប្រារព្ធបុណ្យព្រះយេស៊ូវមានព្រះជន្មរស់ឡើងវិញ។ កាលគាត់ក្រោកពីគេង នៅពេលព្រលឹម នៅថ្ងៃទី៤ ខែមេសា ឆ្នាំ១៧៧៩ គាត់ក៏បានបន្លឺសម្លេងថា “ព្រះយេស៊ូវគ្រីស្ទបានមានព្រះជន្មរស់ឡើងវិញហើយ! ហាលេលូយ៉ា! ហាលេលូយ៉ា!” ខណៈពេលដែលគាត់មានការលូតលាស់ក្នុងជំនឿលើព្រះ គាត់ក៏មានចិត្តប្តូរផ្តាច់នៅក្នុងការសិក្សាព្រះគម្ពីរ អធិស្ឋាន និងចូលរួមកម្មវិធីថ្វាយបង្គំព្រះ។
នៅថ្ងៃដែលព្រះយេស៊ូវមានព្រះជន្មរស់ឡើងវិញ ការផ្លាស់ប្តូរក៏បានកើតមាន ក្នុងជីវិតរបស់ស្រ្តីពីរនាក់ ដែលបានមកដល់ផ្នូររបស់ព្រះយេស៊ូវមុនគេ។ នៅទីនោះ ពួកគេបានឃើញការរញ្ជួយដី ខណៈពេលដែលទេវតាមួយអង្គប្រមៀលថ្មចេញពីច្រកចូលក្នុងផ្នូរព្រះអង្គ។ ទេវតាក៏បានប្រាប់ពួកគេថា “កុំឲ្យភ័យអី ដ្បិតខ្ញុំដឹងហើយថា នាងរកព្រះយេស៊ូវដែលត្រូវឆ្កាង តែទ្រង់មិនគង់នៅទីនេះទេ ដ្បិតទ្រង់មានព្រះជន្មរស់ឡើងវិញហើយ ដូចជាទ្រង់បានមានព្រះបន្ទូលទុក ចូរមកមើលកន្លែងដែលទ្រង់បានផ្ទំចុះ”(ម៉ាថាយ ២៨:៥-៦)។ ពួកគេមានចិត្តត្រេកអរជាពន់ពេក ដោយបានថ្វាយបង្គំព្រះយេស៊ូវ ហើយក៏បានរត់ទៅប្រាប់ដំណឹងល្អ ដល់មិត្តសំឡាញ់របស់ខ្លួនជាសិស្សរបស់ព្រះអង្គ។
ការជួបព្រះគ្រីស្ទដែលមានព្រះជន្មរស់ឡើងវិញ មិនមែនសម្រាប់តែមនុស្សសម័យបុរាណប៉ុណ្ណោះទេ ព្រោះព្រះអង្គបានសន្យាថា យើងនឹងបានជួបព្រះអង្គមុខទល់នឹងមុខ នៅថ្ងៃណាមួយ។ តែទំរាំតែពេលនោះមកដល់ យើងអាចប្រកបស្និទ្ធស្នាលជាមួយព្រះអង្គ នៅក្នុងការរៀនព្រះគម្ពីរ និងអធិស្ឋានជារៀងរាល់ថ្ងៃ ដោយទុកចិត្តថា ព្រះអង្គស្រឡាញ់យើង ហើយបន្តជួយយើងឲ្យមានការផ្លាស់ប្រែក្នុងជីវិត។—Amy Boucher Pye
តើព្រះអម្ចាស់បានបង្ហាញអង្គទ្រង់ដល់អ្នក យ៉ាងដូចម្តេចខ្លះ? តើអ្នកមានការផ្លាស់ប្រែដូចម្តេចខ្លះ តាមរយៈការប្រកបជាមួយព្រះអង្គជារៀងរាល់ថ្ងៃ?
ឱព្រះយេស៊ូវ ដែលមានព្រះជន្មរស់ឡើងវិញ ទូលបង្គំសូមអរព្រះគុណព្រះអង្គ សម្រាប់ការយាងមក និងការសុគតនៅលើឈើឆ្កាង ដើម្បីឲ្យទូលបង្គំមានជីវិតអស់កល្ប។ ទូលបង្គំសូមថ្វាយបង្គំព្រះអង្គ។
គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ១១១២ និង លូកា ៦:១-២៦