ភ្នែកមនុស្សខ្វាក់បានភ្លឺឡើង
ដោយAmy Boucher Pye
April 10, 2024
អេសាយ ៤២:៥-៩
អញនឹងតាំងឯងឡើង ទុកជាសេចក្តីសញ្ញាដល់បណ្តាជន ហើយជាពន្លឺភ្លឺដល់អស់ទាំងសាសន៍ ដើម្បីនឹងធ្វើឲ្យភ្នែកមនុស្សខ្វាក់បានភ្លឺឡើង។ អេសាយ ៤២:៦-៧
អ្នកស្រីចេនេវីវ(Genevieve) ត្រូវមានតួនាទីធ្វើជា “ភ្នែក” សម្រាប់កូនរបស់គាត់ទាំង៣នាក់ ដែលសុទ្ធតែមានជំងឺភ្នែកឡើងបាយពីកំណើត។ ពេលណាគាត់នាំពួកគេចូលភូមិរបស់គាត់ ក្នុងសាធារណៈរដ្ឋបេនីន នៅភាគខាងលិចទ្វីបអាហ្វ្រិក គាត់តែងតែស្ពាយកូនតូចនៅលើខ្នងគាត់ ហើយកាន់ដៃកូនពីរនាក់ទៀតនៅសង្ខាង។ គាត់តែងតែមានការប្រុងប្រយ័ត្ន ដើម្បីកុំឲ្យមានគ្រោះថ្នាក់។ ក្នុងវប្បធម៌ដែលគេជឿថា ការពិការភ្នែកបានកើតឡើងពីអំពើមន្តអាគម អ្នកស្រីចេនវីវមានការអស់សង្ឃឹម ហើយក៏បានស្រែករកព្រះ សូមព្រះអង្គជួយគ្រួសារគាត់។
ក្រោយមក មានបុរសម្នាក់ក្នុងភូមិរបស់គាត់ បានប្រាប់គាត់ អំពីនាវាមេត្តាករុណា ជាអង្គការគ្រីស្ទបរិស័ទ ដែលផ្តល់ឲ្យនូវការវះកាត់ដោយឥតគិតថ្លៃ តាមគំរូរបស់ព្រះយេស៊ូវ ក្នុងការនាំក្តីសង្ឃឹម និងការប្រោសឲ្យជាដល់អ្នកក្រ។ គាត់មិនដឹងថា ពួកគេអាចជួយគាត់បានឬអត់ទេ តែគាត់បានទៅរកពួកគេ។ នៅពេលដែលក្មេងៗក្រោកឡើង បន្ទាប់ពីការវៈកាត់រួច ពួកគេអាចមើលឃើញឡើងវិញ!
រឿងរបស់ព្រះច្រើនតែនិយាយអំពីមនុស្ស ដែលស្ថិតនៅក្នុងភាពងងឹត ហើយព្រះអង្គប្រទានពន្លឺដល់ពួកគេ។ ហោរាអេសាយបានប្រកាសថា ព្រះអម្ចាស់នឹងធ្វើជា “ពន្លឺសម្រាប់សាសន៍ដទៃ”(អេសាយ ៤២:៦)។ ព្រះអង្គ “ធ្វើឲ្យភ្នែកមនុស្សខ្វាក់បានភ្លឺឡើង”(ខ.៧) ដោយបានប្រទានការមើលឃើញខាងសាច់ឈាម តែក៏បានប្រទានការមើលឃើញខាងវិញ្ញាណផងដែរ។ ហើយព្រះអង្គសន្យាថានឹង “ដឹកដៃ” រាស្រ្តរបស់ព្រះអង្គ(ខ.៦)។ ព្រះអង្គប្រោសមនុស្សខ្វាក់ឲ្យមើលឃើញ ហើយប្រទានពន្លឺដល់អ្នកដែលកំពុងរស់នៅក្នុងភាពងងឹត។
បើអ្នកមានអារម្មណ៍ថា ភាពងងឹតបានគ្របដណ្តប់ជីវិតអ្នក ចូរតោងឲ្យជាប់សេចក្តីសង្ឃឹម ខណៈពេលដែលអ្នកឱបក្រសោបព្រះបន្ទូលសន្យានៃព្រះវរបិតានៃសេចក្តីស្រឡាញ់ និងទូលសូមព្រះអង្គប្រទានពន្លឺដល់ជីវិតអ្នក។—Amy Boucher Pye
តើព្រះអម្ចាស់បានបើកភ្នែកអ្នក ខាងសាច់ឈាម ឬខាងវិញ្ញាណ ដូចម្តេចខ្លះ?
ឱព្រះវរបិតាដែលគង់នៅស្ថានសួគ៌ ព្រះអង្គមិនសព្វព្រះទ័យឲ្យនរណាម្នាក់រស់នៅក្នុងភាពងងឹតទេ។ សូមព្រះអង្គបង្ហាញសេចក្តីស្រឡាញ់របស់ព្រះអង្គដល់អ្នកដែលខ្វាក់ភ្នែកខាងវិញ្ញាណ ដើម្បីឲ្យពួកគេអាចមើលឃើញ។
Learn more here: odb.org/personal-relationship-with-god/
គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១៥-១៦ និង លូកា ១០:២៥-៤២