ព្រឹក
ភាពជូរល្វីង នៃបង្អែមដែលបានលួចគេ
ដោយMarvin Williams
April 21, 2024
សុភាសិត ២០:១១-១៧
សុភាសិត ២០:១៧
ចោរមួយក្រុមក្នុងប្រទេសអាឡឺម៉ង់ បានលួចទូរសណ្ដោងមួយ ផ្ទុកទៅដោយស្ករសូកូឡាជាង២០តោន ក្នុងទូរបង្កកអាហារ។ គេបានប៉ាន់ប្រមាណថា ស្ករសូកូឡាដែលមានរស់ជាតិផ្អែមឆ្ងាញ់នោះ មានតម្លៃសរុបប្រហែល៨ម៉ឺនដុល្លា។ ប៉ូលិសក្នុងតំបន់ក៏បានអំពាវនាវ ឲ្យគេរាយការណ៍មកកាន់ប៉ុស្តិ៍ប៉ូលីសជាបន្ទាន់ បើសិនជាមាននរណាម្នាក់បានទទួលស្ករសូកូឡាក្នុងបរិមាណច្រើនខុសពីធម្មតា ឬបានទទួលតាមរបៀបមិនប្រក្រតី។ ជាការពិតណាស់ អ្នកដែលបានលួចស្ករសូកូឡាដ៏ផ្អែមឆ្ងាញ់នោះ នឹងទទួលផលវិបាកដ៏ជូរល្វីង និងខកចិត្តមិនខាន បើសិនជាពួកគេត្រូវប៉ូលិសចាប់ខ្លួន និងទទួលទោសតាមច្បាប់!
រឿងនេះបានធ្វើឲ្យខ្ញុំនឹកចាំ គោលការណ៍ក្នុងបទគម្ពីរសុភាសិតដែលបានចែងថា “អាហារដែលមនុស្សណាបាន ដោយការកំភូត នោះរមែងឆ្ងាញ់ដល់ខ្លួន តែក្រោយមក មាត់មានពេញទៅដោយក្រួសវិញ”(២០:១៧)។ អ្វីៗដែលយើងទទួលបាន ដោយការបោកប្រាស់ ឬតាមផ្លូវខុស អាចហាក់ដូចជាមានរស់ជាតិផ្អែមពីដំបូង ដោយមានភាពរំភើបរីករាយ និងការអរសប្បាយតែមួយរយៈពេល។ ប៉ុន្តែ ទីបំផុតរស់ជាតិរបស់វា ក៏លែងផ្អែមឆ្ងាញ់ទៀត ហើយការបោកប្រាស់របស់យើង ក៏បាននាំឲ្យយើងមានការភ័យខ្លាច និងមានបញ្ហា។ ផលវិបាកនៃកំហុស ការភ័យខ្លាច និងបាប អាចបំផ្លាញជីវិត និងកេរ្តិ៍ឈ្មោះរបស់យើង។ គឺដូចមានសេចក្តីចែងថា “សូម្បីតែកូនក្មេងក៏សំដែងខ្លួន ដោយសារកិរិយាប្រព្រឹត្តរបស់វាដែរ ឲ្យដឹងជាកិរិយានោះបរិសុទ្ធ ហើយត្រឹមត្រូវឬយ៉ាងណា”(ខ.១១)។ សូមឲ្យពាក្យសម្តី និងសកម្មភាពរបស់យើង បង្ហាញឲ្យគេឃើញចិត្តដ៏បរិសុទ្ធ ដែលយើងមានសម្រាប់ព្រះអម្ចាស់ គឺមិនមែនឃើញចិត្តជូរល្វីង ដែលអាត្មានិយមនោះទេ។
ពេលណាយើងជួបការល្បួង ចូរយើងទូលសូមព្រះអង្គចម្រើនកម្លាំងយើង ហើយជួយយើងឲ្យនៅតែស្មោះត្រង់ចំពោះព្រះអង្គ។ ព្រះអង្គអាចជួយយើងឲ្យជៀសវាង “រស់ជាតិផ្អែម” ដែលមានរយៈពេលខ្លី ជាការចាញ់ការល្បួង ហើយដឹកនាំយើងឲ្យពិចារណាយ៉ាងប្រុងប្រយ័ត្ន អំពីផលវិបាកយូរអង្វែង នៃការសម្រេចចិត្តរបស់យើង។—Marvin Williams
តើការល្បួងនាំទៅរកលទ្ធផលដ៏ជូរល្វីងសម្រាប់អ្នក នៅពេលណាខ្លះ? តើអ្នកនៅតែបន្តមានចិត្តស្មោះត្រង់ចំពោះព្រះដូចម្តេចខ្លះ?
ឱព្រះអម្ចាស់ ទូលបង្គំត្រូវការកម្លាំងមកពីព្រះអង្គ ដើម្បីជម្នះការល្បួង ហើយនៅតែស្មោះត្រង់ចំពោះព្រះអង្គ។
គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ១២-១៣ និង លូកា ១៦
ប្រភេទ
ល្ងាច
បានរាប់យើងបញ្ចូលក្នុងការតាំងសេចក្តីសញ្ញា
ដោយJohn Piper
April 21, 2024
នៅទីនេះ អញនឹងធ្វើឲ្យស្នែងរបស់ដាវីឌប៉ិចឡើង អញបានចាត់ចែងចង្កៀង១ សំរាប់អ្នកដែលអញ បានចាក់ប្រេងតាំងឲ្យ
អញនឹងយកសេចក្តីខ្មាស តាក់តែងឲ្យពួកខ្មាំងសត្រូវរបស់លោក តែនៅលើក្បាលលោកវិញ នោះនឹងមានមកុដដ៏រុងរឿង។ ទំនុកដំកើង ១៣២:១៧-១៨
តើនរណាខ្លះ ដែលនឹងទទួលផលប្រយោជន៍ ពីព្រះបន្ទូលសន្យា ដែលព្រះទ្រង់បានប្រទានស្តេចដាវីឌ?
បទគម្ពីរទំនុកដំកើង ១៣២:១៧-១៨ បានចែងថា : “នៅទីនេះ អញនឹងធ្វើឲ្យស្នែងរបស់ដាវីឌប៉ិចឡើង អញបានចាត់ចែងចង្កៀង១ សំរាប់អ្នកដែលអញ បានចាក់ប្រេងតាំងឲ្យ អញនឹងយកសេចក្តីខ្មាស តាក់តែងឲ្យពួកខ្មាំងសត្រូវរបស់លោក តែនៅលើក្បាលលោកវិញ នោះនឹងមានមកុដដ៏រុងរឿង”។
ឥឡូវនេះសូមយើងភ្ជាប់ខគម្ពីរនេះជាមួយបទគម្ពីរ អេសាយ ៥៥:១,៣ ដែលបានចែងថា “ហឺយ អស់អ្នកដែលស្រេកអើយ ចូរមកឯទីទឹកចុះ ឯអ្នកដែលគ្មានប្រាក់អើយ ចូរមកទិញ ហើយបរិភោគទៅ …ហើយអញនឹងតាំងសេចក្តីសញ្ញានឹងឯងរាល់គ្នា ជាសញ្ញាដ៏នៅអស់កល្បជានិច្ច គឺជាសេចក្តីមេត្តាករុណាស្មោះត្រង់ ដែលបានផ្តល់ដល់ដាវីឌ”។
បើខ្ញុំមើលទៅឈើឆ្កាង តាមន័យនេះ ខ្ញុំអាចបកស្រាយបទគម្ពីរនេះថា ៖ អស់អ្នកណាដែលចូលមករកព្រះ តាមរយៈព្រះយេស៊ូវគ្រីស្ទ ជាព្រះរាជបុត្រាព្រះអង្គ ដោយស្រេកឃ្លានអ្វីដែលព្រះមានសម្រាប់យើង ក្នុងព្រះគ្រីស្ទ ជាជាងពឹងផ្អែកលើអត្តសញ្ញាណរបស់យើង ឬអ្វីដែលយើងធ្វើ នោះព្រះទ្រង់នឹងតាំងសញ្ញានឹងអ្នកនោះ។
តើយើងចាំថា ទំព័រចុងក្រោយនៃព្រះគម្ពីរ បានចែងយ៉ាងដូចម្តេចខ្លះ ក្នុងបទគម្ពីរវិវរណៈ ២២:១៧? “អ្នកណាដែលស្រេក នោះមានតែមក ហើយអ្នកណាដែលចង់បាន មានតែយកទឹកជីវិតនោះចុះ ឥតចេញថ្លៃទេ”។ ព្រះបន្ទូលនេះមិនមែនសម្រាប់តែសាសន៍យូដា នៅសម័យហោរាអេសាយប៉ុណ្ណោះទេ តែសម្រាប់អស់អ្នកណាក៏ដោយ ដែលចូលមករកព្រះគ្រីស្ទ ដើម្បីចម្អែតភាពស្រេកឃ្លាននៃវិញ្ញាណរបស់ខ្លួន។ ហើយព្រះអង្គមានបន្ទូលថា “អញនឹងតាំងសេចក្តីសញ្ញានឹងឯងរាល់គ្នា ជាសញ្ញាដ៏នៅអស់កល្បជានិច្ច!”
តើសេចក្តីសញ្ញាអ្វី? គឺសេចក្តីសញ្ញាដែលមានន័យ និងស្ថិតស្ថេរ ដោយសារ “សេចក្តីមេត្តាករុណាដ៏ស្មោះត្រង់ ដែលព្រះទ្រង់មានចំពោះស្តេចដាវីឌ”។ បទគម្ពីរអេសាយ ៥៥:៣ បានចែងថា “អញនឹងតាំងសេចក្តីសញ្ញានឹងឯងរាល់គ្នា ជាសញ្ញាដ៏នៅអស់កល្បជានិច្ច គឺជាសេចក្តីមេត្តាករុណាស្មោះត្រង់ ដែលបានផ្តល់ដល់ដាវីឌ”។ បានសេចក្តីថា ព្រះអង្គក៏បានរាប់បញ្ចូលខ្ញុំ នៅក្នុងសេចក្តីសញ្ញាដែលព្រះអង្គបានតាំងជាមួយស្តេចដាវីឌផងដែរ។ អ្វីដែលស្តេចដាវីឌទទួល នោះខ្ញុំក៏នឹងទទួលបាន ក្នុងព្រះគ្រីស្ទយេស៊ូវ។
ហើយតើអ្វីដែលខ្ញុំនឹងទទួលនោះមានអ្វីខ្លះ?
ស្នែងនឹងចេញពន្លកឡើង សម្រាប់ខ្ញុំ។ បានសេចក្តីថា ព្រះដែលមានកម្លាំងដ៏អស្ចារ្យ នឹងប្រយុទ្ធជំនួសខ្ញុំ ហើយការពារខ្ញុំ។ ព្រះអង្គនឹងរៀបចំឲ្យមានចង្កៀងមួយ សម្រាប់ខ្ញុំ។ គឺមានន័យថា ពន្លឺនឹងហ៊ុមព័ទ្ធខ្ញុំ ហើយភាពងងឹតនឹងមិនអាចឈ្នះខ្ញុំឡើយ។ ខ្ញុំនឹងមានមកុដមួយ។ បានសេចក្តីថា ខ្ញុំនឹងបានសោយរាជ្យជាមួយព្រះបុត្រានៃស្តេចដាវីឌ និងអង្គុយជាមួយទ្រង់ នៅលើបល្ល័ង្ករបស់ទ្រង់។ គឺដូចមានសេចក្តីចែងថា “ឯអ្នកណាដែលឈ្នះ នោះអញនឹងឲ្យអង្គុយលើបល្ល័ង្កជាមួយនឹងអញ”(វិវរណៈ ៣:២១)។
នេះជាព្រះពរដ៏អស្ចារ្យដែលយើងនឹងទទួលបាន ពីព្រះបន្ទូលសន្យា ដែលព្រះទ្រង់មានចំពោះស្តេចដាវីឌ។ ព្រះទ្រង់សព្វព្រះទ័យឲ្យយើងមានការភ្ញាក់ផ្អើល។ ព្រះអង្គសព្វព្រះទ័យឲ្យភាពស្មោះស្ម័គ្ររបស់យើង មានការភ្ញាក់ផ្អើល ចំពោះព្រះចេស្ដា និងអំណាច ហើយព្រះអង្គបានស្រឡាញ់យើង ដោយអំណាច ព្រះចេស្ដាព្រះអង្គនោះឯង។