អេសាយ ៣៥:១-៧
ទីរហោស្ថាន ហើយទីហួតហែង នឹងមានសេចក្តីអំណរ ឯសមុទ្រខ្សាច់ នឹងរីករាយ ហើយផ្កាឡើងដូចជាកុលាប។ អេសាយ ៣៥:១
កាលពីជាងមួយរយឆ្នាំមុន ព្រៃឈើបានគ្របដណ្តប់ផ្ទៃដីរបស់ប្រទេសអេត្យូពី ប្រហែល៤០ភាគរយ ប៉ុន្តែ សព្វថ្ងៃនេះ ប្រទេសនេះ មានព្រៃឈើនៅសល់តែ៤ភាគរយនៃផ្ទៃដីសរុបប៉ុណ្ណោះ។ ការកាប់ឆ្ការព្រៃធ្វើកសិកម្ម ដោយមិនបានអភិរក្សព្រៃឈើ បានបណ្តាលឲ្យមានវិបត្តិអេកូឡូស៊ីធ្ងន់ធ្ងរ។ ភាគច្រើននៃព្រៃឈើតូចៗដែលនៅសល់ ស្ថិតនៅក្រោមការការពាររបស់ពួកជំនុំ។ អស់ជាច្រើនឆ្នាំមកហើយ ដែលពួកជំនុំតេវ៉ាហ៊ីដូ ជាពួកជំនុំអ័រតូដុកអេត្យូពី បានថែរក្សាព្រៃឈើតូចៗទាំងនោះ នៅក្នុងកណ្តាលវាលរហោស្ថាន ដែលស្ងួតហួតហែង។ បើអ្នកមើលរូបដែលគេថតពីលើយន្តហោះមក អ្នកអាចឃើញបណ្ដុំព្រៃឈើ ប្រៀបដូចជាកោះតូចៗដែលមានពណ៌បៃតងស្រស់ នៅកណ្តាលសមុទ្រខ្សាច់ពណ៌ត្នោត។ អ្នកដឹកនាំពួកជំនុំទាំងនោះបានទទូចថា ការថែទាំព្រៃឈើទាំងនោះ ជាផ្នែកមួយនៃការស្តាប់បង្គាប់ព្រះ ក្នុងនាមជាអ្នកថែរក្សាស្នាព្រះហស្តដែលព្រះអង្គផ្ញើទុកនឹងយើង។
ហោរាអេសាយបានសរសេរបទគម្ពីរផ្ញើទៅកាន់ប្រជាជនអ៊ីស្រាអែល ដែលកំពុងរស់នៅក្នុងទឹកដីដែលមិនសូវមានជីរជាតិ ជាវាលរហោស្ថាន និងទទួលការគំរាមកំហែងពីភាពរាំងស្ងួត។ ហើយគាត់ក៏បានពិពណ៌នា អំពីពេលអនាគត ដែលព្រះទ្រង់បានរៀបចំ យ៉ាងដូចនេះថា “ទីរហោស្ថាន ហើយទីហួតហែង នឹងមានសេចក្តីអំណរ ឯសមុទ្រខ្សាច់ នឹងរីករាយ ហើយផ្កាឡើងដូចជាកុលាប”(អេសាយ ៣៥:១)។ ព្រះអម្ចាស់សព្វព្រះទ័យនឹងប្រោសរាស្រ្តព្រះអង្គឲ្យជា តែព្រះអង្គក៏សព្វព្រះទ័យនឹងប្រោសផែនដីឲ្យជាផងដែរ។ ព្រះអង្គនឹងបង្កើតផ្នៃមេឃ និងផែនដីថ្មី(៦៥:១៧)។ ក្នុងផែនដីថ្មីរបស់ព្រះអង្គ វាលរហោស្ថាននឹងមានផ្ការីកស្គុះស្គាយ(៣៥:១)។
ព្រះអម្ចាស់យកព្រះទ័យទុកដាក់ចំពោះស្នាព្រះហស្តព្រះអង្គ ដែលរាប់បញ្ចូលរាស្ត្រព្រះអង្គផងដែរ ហើយការនេះក៏បានលើកទឹកចិត្តយើងឲ្យថែរក្សាស្នាព្រះហស្តព្រះអង្គ។ យើងអាចរស់នៅស្របតាមផែនការរបស់ព្រះអង្គសម្រាប់ផែនដី ដោយចូលរួមថែរក្សាអ្វីៗដែលព្រះអង្គបានបង្កើត។ យើងអាចចូលរួមជាមួយព្រះអង្គ ក្នុងការកែប្រែវាលរហោស្ថាន ឲ្យមានជីវិត និងភាពស្រស់ស្អាតឡើងវិញ។—Winn Collier
តើអ្នកឃើញផ្នែកណាខ្លះនៃស្នាព្រះហស្តព្រះអង្គ ដែលក្រៀមក្រោះ ឬកំពុងរងទុក្ខ?
តើអ្នកនឹងចូលរួមដូចម្តេចខ្លះ ក្នុងការកែប្រែវាលរហោស្ថានឲ្យក្លាយជាកន្លែងមានផ្ការីកស្គុះស្គាយ?
ឱព្រះអាទិករ សូមព្រះអង្គបង្ហាញទូលបង្គំ នូវរបៀបព្យាបាល និងស្តាឡើងវិញនូវអ្វីៗដែលប្រេះបែក ក្នុងលោកិយនេះ។
Visit ODBU.org/OT216 to discover God’s creative purpose for nature and a nation.
គម្រោងអានព្រះគម្ពីររយៈពេល១ឆ្នាំ : ២ពង្សាវតាក្សត្រ ៧-៩ និង យ៉ូហាន ១:១-២៨
