ផ្លាស់ទៅរស់នៅជាមួយព្រះ
ដោយAnne Cetas
May 16, 2024
២កូរិនថូស ៥:១-១០
យើងខ្ញុំមានចិត្តជឿជាក់ ហើយក៏សុខចិត្តស៊ូចេញពីរូបកាយនេះ ទៅនៅជាមួយនឹងព្រះអម្ចាស់ជាជាង។ ២កូរិនថូស ៥:៨
មិត្តភក្តិរបស់ខ្ញុំឈ្មោះ យ៉ូអាន(Joann) បានលាចាកលោក ដោយសារជំងឺដាច់សរសៃឈាមខួរក្បាល ខណៈពេលដែលវីរុសកូរ៉ូណា កំពុងចាប់ផ្តើមរាតត្បាត ក្នុងឆ្នាំ២០២០។ ពីដំបូង ក្រុមគ្រួសាររបស់គាត់ បានជូនដំណឹងថា កម្មវិធីបុណ្យសពរបស់គាត់ នឹងប្រារព្ធទៅក្នុងព្រះវិហាររបស់គាត់ ប៉ុន្តែ ក្រោយមក ពួកគេក៏បានសម្រេចចិត្តធ្វើពិធីបុណ្យសពនៅផ្ទះវិញ ដើម្បីបន្ថយចំនួនមនុស្សដែលមកជួបជុំគ្នា។ ពួកគេក៏បានជូនដំណឹងតាមបណ្ដាញសង្គមថា ពិធីបុណ្យសពរបស់អ្នកស្រីយ៉ូអាន វេនន័រ(Joann Warners) បានផ្លាស់ប្តូរកន្លែងជួបជុំគ្នា។
ជាការពិតណាស់ វិញ្ញាណរបស់គាត់បានផ្លាស់ទៅរស់នៅកន្លែងថ្មីហើយ! គាត់បានផ្លាស់ពីទីកន្លែងនៅផែនដី ទៅទីកន្លែងក្នុងស្ថានសួគ៌។ ព្រះអម្ចាស់បានកែប្រែជីវិតគាត់ កាលប៉ុន្មានឆ្នាំមុន ហើយគាត់ក៏បានបម្រើព្រះអង្គ ដោយសេចក្តីស្រឡាញ់ ជិត៥០ឆ្នាំហើយ។ សូម្បីតែនៅពេលដែលគាត់ជិតដល់ពេលស្លាប់ ក្នុងមន្ទីរពេទ្យ គាត់នៅតែសួរនាំអំពីមនុស្សជាទីស្រឡាញ់របស់គាត់ ដែលកំពុងជួបការលំបាក។ សព្វថ្ងៃនេះ គាត់បានទៅនៅជាមួយព្រះអង្គហើយ គឺមានន័យថា គាត់បានផ្លាស់ទៅរស់នៅកន្លែងថ្មី។
សាវ័កប៉ុលក៏មានចិត្តចង់ទៅរស់នៅជាមួយព្រះគ្រីស្ទ ក្នុងស្ថានសួគ៌ ជាកន្លែងថ្មីផងដែរ(២កូរិនថូស ៥:៨) តែគាត់ក៏យល់ឃើញថា បើគាត់នៅមានជីវិតនៅលើផែនដី នោះគាត់មានប្រយោជន៍ជាង សម្រាប់មនុស្សដែលគាត់កំពុងធ្វើការបម្រើ។ ហេតុនេះហើយគាត់ក៏បានសរសេរសំបុត្រប្រាប់ពួកជំនុំនៅទីក្រុងភីលីពថា “បើខ្ញុំនៅក្នុងសាច់ឈាមតទៅទៀត នោះមានប្រយោជន៍ដល់អ្នករាល់គ្នាជាជាង”(ភីលីព ១:២៤)។ ពេលណាយើងសោកសង្រេង ចំពោះការលាចេញរបស់នរណាម្នាក់ ដូចអ្នកស្រីយ៉ូអាន យើងប្រហែលជាចង់ស្រែករកព្រះអង្គ ដោយទូលអង្វរ ក្នុងន័យស្រដៀងនេះដែរថា យើងកំពុងត្រូវការពួកគេឲ្យបន្តរស់នៅជាមួយយើង និងមនុស្សជាច្រើន ដែលពួកគេស្រឡាញ់ និងបម្រើ។ ប៉ុន្តែ ព្រះទ្រង់ជ្រាបថា ពេលណាជាពេលល្អបំផុតដែលពួកគេ ក៏ដូចជាយើង ត្រូវផ្លាស់ទៅរស់នៅជាមួយព្រះអង្គ។
ដោយពឹងអាងកម្លាំងមកពីព្រះវិញ្ញាណ ចូរយើងដាក់គោលដៅថា យើងនឹង “សង្វាត ឲ្យបានគាប់ដល់ព្រះហឫទ័យទ្រង់”(២កូរិនថូស ៥:៩) ទាល់តែយើងបានឃើញព្រះអង្គ មុខទល់នឹងមុខ ដែលជាការប្រសើរជាងឆ្ងាយណាស់។—Anne Cetas
តើអ្នកបង្ហាញសេចក្តីស្រឡាញ់ចំពោះព្រះ និងចំពោះអ្នកដទៃ នៅកន្លែងដែលអ្នកកំពុងនៅ ក្នុងពេលនេះ ដោយរបៀបណា?
តើអ្នកអាចបម្រើព្រះអង្គ នៅថ្ងៃនេះ ដោយរបៀបណា?
ឱព្រះអម្ចាស់ ទូលបង្គំសូមថ្វាយជីវិតទូលបង្គំដាច់ដល់ព្រះអង្គ។
សូមព្រះអង្គបំពេញទូលបង្គំ ដោយព្រះវិញ្ញាណនៃសេចក្តីស្រឡាញ់ ហើយធ្វើឲ្យជីវិតទូលបង្គំមានតម្លៃចំពោះព្រះអង្គ។
For further study, read Living in Love—How the Trinity Changes Everything at DiscoverODB.org.
គម្រោងអានព្រះគម្ពីររយៈពេល១ឆ្នាំ: ១របាក្សត្រ ១-៣ និង យ៉ូហាន ៥:២៥-៤៧