ព្រឹក
នាំឲ្យគេស្គាល់ និងសរសើរព្រះអង្គ
ដោយAmy Boucher Pye
May 18, 2024
វិវរណៈ ៧:៩-១២
សេចក្តីសង្គ្រោះស្រេចនូវព្រះនៃយើងរាល់គ្នា ដែលគង់លើបល្ល័ង្ក ហើយស្រេចនឹងកូនចៀមផង។ វិវរណៈ ៧:១០
ការងារបកប្រែព្រះគម្ពីរប៊ីប របស់អ្នកស្រី ខាត់ធ្រីន(Kathryn) បានទទួលការបណ្តាលចិត្ត ពីសេចក្តីស្រឡាញ់ដែលគាត់មានចំពោះព្រះអម្ចាស់ និងចំពោះប្រជាជនឥណ្ឌា។ គាត់មានអំណរណាស់ ពេលដែលបានឃើញស្រ្តីនៅក្នុងប្រទេសឥណ្ឌា មានការយល់ដឹងកាន់តែស៊ីជម្រៅ ក្នុងព្រះគម្ពីរ តាមរយៈការអានព្រះគម្ពីរប៊ីបជាភាសាកំណើតរបស់ពួកគេ។ គាត់ក៏បានកត់សំគាល់ថា ពេលណាពួកគេអានព្រះគម្ពីរ “ពួកគេច្រើនតែចាប់ផ្តើមស្រែកហូរ ឬទះដៃ។ ពួកគេបានអានអំពីព្រះយេស៊ូវ ហើយពួកគេក៏បានលាន់មាត់ថា «ព្រះបន្ទូលព្រះអង្គពិតជាអស្ចារ្យណាស់»”។
អ្នកស្រីខាត់ធ្រីនចង់ឲ្យមនុស្សកាន់តែច្រើនថែមទៀត បានអានព្រះគម្ពីរជាភាសារបស់ពួកគេ។ គាត់ក៏បាននឹកចាំក្នុងចិត្តគាត់ អំពីការបើកសម្តែង ដែលសាវ័កយ៉ូហានបានទទួល នៅលើកោះប៉ាតម៉ូស។ ព្រះអម្ចាស់បាននាំគាត់ឈរនៅចំពោះមុខបល្ល័ង្ករបស់ព្រះអង្គ នៅស្ថានសួគ៌ ដែលនៅទីនោះ គាត់ក៏បានឃើញ “មនុស្ស១ហ្វូងយ៉ាងធំ ដែលគ្មានអ្នកណាអាចនឹងរាប់បានឡើយ គេមកពីគ្រប់ទាំងសាសន៍ គ្រប់ទាំងពូជមនុស្ស គ្រប់ទាំងគ្រួសារ ហើយគ្រប់ទាំងភាសា ក៏ឈរនៅមុខបល្ល័ង្ក និងកូនចៀម”(វិវរណៈ ៧:៩)។ ពួកគេថ្វាយបង្គំព្រះទាំងអស់គ្នា ដោយនិយាយថា “សេចក្តីសង្គ្រោះស្រេចនូវព្រះនៃយើងរាល់គ្នា ដែលគង់លើបល្ល័ង្ក ហើយស្រេចនឹងកូនចៀមផង”(ខ.១០)។
ព្រះទ្រង់បន្តបន្ថែមចំនួនមនុស្សកាន់តែច្រើនលើសលប់ ដែលសរសើរដំកើងព្រះអង្គ។ ព្រះអង្គមិនគ្រាន់តែប្រើការងាររបស់អ្នកបកប្រែព្រះគម្ពីរ និងអ្នកអធិស្ឋានឲ្យពួកគេប៉ុណ្ណោះទេ តែក៏ប្រើអ្នកដែលឈោងទៅរកអ្នកជិតខាង ដោយសេចក្តីស្រឡាញ់ ដើម្បីចែកចាយដំណឹងល្អនៃព្រះយេស៊ូវ។ យើងអាចអរសប្បាយ នៅក្នុងបេសកកម្មដែលពេញដោយអំណរនេះ ដោយមានការស្ងើចចំពោះរបៀប ដែលព្រះទ្រង់នាំមនុស្សកាន់តែច្រើន ឲ្យចូលរួមជាមួយទេវតា ក្នុងការសរសើរដំកើងព្រះអម្ចាស់ថា “សូមថ្វាយព្រះពរ សិរីល្អ ប្រាជ្ញា ពាក្យអរព្រះគុណ កិត្តិនាម ព្រះចេស្តា និងឥទ្ធិឫទ្ធិ ដល់ព្រះនៃយើងរាល់គ្នា នៅអស់កល្បជានិច្ចរៀងរាបតទៅ អាម៉ែន”(ខ.១២)។—Amy Boucher Pye
តើអ្នកបានឃើញព្រះអម្ចាស់នាំមនុស្សឲ្យសរសើរដំកើង និងថ្វាយព្រះកិត្តិនាមដល់ព្រះអង្គដូចម្តេចខ្លះ?
តើព្រះអង្គអាចអញ្ជើញអ្នកឲ្យចូលរួម ក្នុងបេសកកម្មនៃការចែកផ្សាយដំណឹងល្អនៃព្រះយេស៊ូវ ដូចម្តេចខ្លះ?
ឱព្រះដ៏ជួយសង្គ្រោះ ទូលបង្គំសូមអរព្រះគុណព្រះអង្គ ដែលបានប្រទានព្រះយេស៊ូវ ធ្វើជាអំណោយ។
សូមព្រះអង្គជួយទូលបង្គំឲ្យចែកចាយ ដល់អ្នកដទៃ អំពីសេចក្តីស្រឡាញ់ដ៏អស្ចារ្យរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ: ១របាក្សត្រ ៧-៩ និង យ៉ូហាន ៦:២២-៤៤
ប្រភេទ
ល្ងាច
ល្អប្រសើរជាងមាសប្រាក់ ផ្លូវភេទ និងអំណាច
ដោយJohn Piper
May 18, 2024
កុំឲ្យបោះបង់ចោលសេចក្តីក្លាហានរបស់អ្នករាល់គ្នា ដែលមានរង្វាន់ជាធំនោះឡើយ។ ហេព្រើរ ១០:៣៥
យើងចាំបាច់ត្រូវជញ្ជឹងគិតថា ភាពធំបណ្តាច់របស់ព្រះគឺជារង្វាន់ដ៏ធំប្រសើរលើសអ្វីៗទាំងអស់ ដែលលោកិយនេះអាចផ្តល់ឲ្យបាន។ ពុំនោះទេ យើងនឹងស្រឡាញ់លោកិយ និងរស់នៅ ដូចអ្នកដទៃមិនខាន។
ដូចនេះ ចូរយើងពិចារណា អំពីអ្វីៗដែលកំពុងដឹកនាំលោកិយនេះ ហើយជញ្ជឹងគិតថា ព្រះទ្រង់ល្អជាង និងស្ថិតស្ថេរជាងរបស់ទាំងនោះ។ ចូរពិចារណាអំពីទ្រព្យសម្បត្តិ ឬអំពើបាបខាងផ្លូវភេទ ឬអំណាចរបស់មនុស្ស ហើយគិតអំពីទំនាក់ទំនងដែលពួកវាមានជាមួយសេចក្តីស្លាប់។ សេចក្តីស្លាប់នឹងដកពួកវាចេញ។ បើអ្នកកំពុងតែរស់នៅសម្រាប់របស់ទាំងអស់នេះ នោះអ្នកនឹងមិនចំណេញបានច្រើនទេ ហើយអ្វីដែលអ្នកមាន នោះអ្នកក៏នឹងបាត់បង់ទាំងអស់។
តែកំណប់ទ្រព្យរបស់ព្រះល្អប្រសើរជាងរបស់ទាំងនោះឆ្ងាយណាស់ ហើយក៏ស្ថិតស្ថេរផង។ សេចក្តីស្លាប់មិនអាចរារាំងកំណប់ទ្រព្យទាំងនោះបានទេ ក៏ប្រសើរជាងមាសប្រាក់ ព្រោះមាសប្រាក់ទាំងអស់សុទ្ធតែជាកម្មសិទ្ធិព្រះអង្គ ហើយព្រះអង្គជាព្រះវរបិតារបស់យើង។ យើងនឹងទទួលមរតកពីព្រះអង្គ។ “របស់នៅជំនាន់សព្វថ្ងៃ ឬទៅមុខក្តី នោះសុទ្ធតែជារបស់ផងអ្នករាល់គ្នាទាំងអស់ តែឯអ្នករាល់គ្នាជារបស់ផងព្រះគ្រីស្ទវិញ ហើយព្រះគ្រីស្ទ ទ្រង់ជារបស់ព្រះ”(១កូរិនថូស ៣:២២-២៣)។
កំណប់ទ្រព្យនោះប្រសើរជាងផ្លូវភេទ។ ព្រះយេស៊ូវមិនដែលមានទំនាក់ទំនងផ្លូវភេទ ហើយព្រះអង្គជាមនុស្សដែលមានភាពពេញលេញ និងគ្រប់គ្រាន់បំផុត នៅលើផែនដី។ ការរួមដំណេកគឺគ្រាន់តែជាស្រមោល ឬរូបភាពនៃការពិតដែលធំប្រសើរជាង ឬស្រមោលនៃទំនាក់ទំនង និងក្តីអំណរ ដែលនឹងធ្វើយើងគិតថា ការរួមភេទគឺហាក់ដូចជារឿងដែលគួរឲ្យធុញទ្រាន់។
រង្វាន់របស់ព្រះប្រសើរជាងអំណាចក្នុងលោកិយ។ គ្មានអំណាចណាដែលមនុស្សមាន ដែលខ្លាំងជាងអំណាចបានធ្វើជាកូនព្រះដ៏មានចេស្ដានោះឡើយ។ “តើមិនដឹងថា យើងរាល់គ្នានឹងជំនុំជំរះ ដល់ទាំងពួកទេវតាផងទេឬអី?”(១កូរិនថូស ៦:៣)។ “ឯអ្នកណាដែលឈ្នះ នោះអញនឹងឲ្យអង្គុយលើបល្ល័ង្កជាមួយនឹងអញ ដូចជាអញបានឈ្នះ ហើយបានអង្គុយជាមួយនឹងព្រះវរបិតាលើបល្ល័ង្កទ្រង់ដែរ”(វិវរណៈ ៣:២១)។
និយាយរួម ព្រះទ្រង់ល្អប្រសើរជាង និងស្ថិតស្ថេរជាងអ្វីៗទាំងអស់ដែលលោកិយនេះអាចផ្តល់ឲ្យយើងបាន។
គ្មានអ្វីអាចប្រៀបផ្ទឹមនឹងព្រះអង្គបានឡើយ។ ព្រះទ្រង់នៅតែឈ្នះគ្រប់ពេល។ តែយើងត្រូវសួរខ្លួនឯងថា តើយើងនឹងមានព្រះអង្គឬទេ? តើយើងនឹងភ្ញាក់ខ្លួន ឈប់ចាញ់បោកលោកិយនេះ ហើយមើលឃើញ និងជឿ ព្រមទាំងអរសប្បាយ និងស្រឡាញ់ការអ្វីដែលពិត មានតម្លៃ និងអស់កល្បជានិច្ច?