ហេព្រើរ ១២:៤-១១
ព្រះដែលទ្រង់វាយផ្ចាល នោះសំរាប់ជាប្រយោជន៍ដល់យើងវិញ ដើម្បីឲ្យយើងបានសេចក្តីបរិសុទ្ធរបស់ទ្រង់។ ហេព្រើរ ១២:១០
រឿងប្រៀបប្រដូច ដែលលោកចច មែកដូណាល់(George MacDonald) បាននិពន្ធមានចំណងជើងថា ស្រ្តីមានប្រាជ្ញា បានដំណាលអំពីភាពអាត្មានិយមរបស់ក្មេងស្រីពីរនាក់ ដែលនាំមកនូវសេចក្តីទុក ដល់គេរាល់គ្នា រាប់បញ្ចូលទាំងខ្លួនឯងដែរ ទាល់តែមានស្រ្តីមានប្រាជ្ញាម្នាក់ បាននាំពួកគេធ្វើតេស្តជាបន្តបន្ទាប់ ដើម្បីជួយពួកគេឲ្យក្លាយជាក្មេង “គួរឲ្យស្រឡាញ់”ឡើងវិញ។
បន្ទាប់ពីក្មេងស្រីទាំងពីរបានបរាជ័យនៅក្នុងការធ្វើតេស្តនីមួយៗ ហើយមានអារម្មណ៍អៀនខ្មាស និងឯកោ ទីបំផុត រ៉ូសាមុន(Rosamond) ជាក្មេងស្រីម្នាក់ក្នុងចំណោមក្មេងទាំងពីរ ក៏បានដឹងថា នាងមិនអាចកែប្រែអត្តចរិតរបស់នាងបានទេ។ នាងក៏បានសួរស្រ្តីអ្នកប្រាជ្ញថា “អ្នកគ្រូអាចជួយខ្ញុំបានទេ?” ស្រ្តីនោះក៏បានឆ្លើយថា “ដោយសារប្អូនសួរខ្ញុំហើយ នោះខ្ញុំប្រហែលជាអាចជួយប្អូនបាន”។ ដោយសារជំនួយរបស់ស្រ្តីអ្នកប្រាជ្ញ រ៉ូសាមុនក៏បានចាប់ផ្តើមមានការផ្លាស់ប្តូរ។ បន្ទាប់មក នាងក៏បានសុំឲ្យស្រ្តីអ្នកប្រាជ្ញអត់ទោសឲ្យនាង ចំពោះកំហុសដែលនាងបានបង្កឡើង។ ស្រ្តីអ្នកប្រាជ្ញក៏បានប្រាប់នាងថា “អ្នកគ្រូស្តីប្រដៅឲ្យប្អូន គឺដោយសារអ្នកគ្រូស្រឡាញ់ប្អូន”។
នៅពេលខ្លះ ព្រះអម្ចាស់វាយផ្ចាលយើង។ យើងចាំបាច់ត្រូវយល់អំពីហេតុផលរបស់ព្រះអង្គ។ ការកែតម្រង់របស់ព្រះអង្គ គឺមិនមែនជាការសងសឹកមកលើយើងទេ តែដោយសារព្រះអង្គយកព្រះទ័យទុកដាក់ចំពោះសុខុមាលភាពរបស់យើង ក្នុងនាមព្រះអង្គជាឪពុក(ហេព្រើរ ១២:៦)។ ព្រះអង្គក៏សព្វព្រះទ័យឲ្យយើងមានសេចក្តីបរិសុទ្ធរបស់ព្រះអង្គ ដោយអរសប្បាយនឹងការច្រូតកាត់ផលនៃ សេចក្តីសុចរិត និងសេចក្តីសុខសាន្ត(ខ.១០-១១)។ ភាពអាត្មានិយមនាំមកនូវទុក្ខវេទនា តែសេចក្តីបរិសុទ្ធធ្វើឲ្យយើងមានភាពពេញលេញ មានអំណរ និងគួរឲ្យស្រឡាញ់ដូចព្រះអង្គផងដែរ។
រ៉ូសាម៉ុនបានសួរស្រ្តីអ្នកប្រាជ្ញថា ហេតុអ្វីគាត់ស្រឡាញ់ក្មេងស្រីអាត្មានិយមដូចនាង។ គាត់ក៏បានឱនទៅថើបនាង ហើយឆ្លើយប្រាប់ថា គាត់មានការជឿជាក់ថា នាងនឹងក្លាយជាមនុស្សល្អ។ រឿងនេះបានធ្វើឲ្យខ្ញុំនឹកចាំថា ការកែតម្រង់របស់ព្រះ ក៏កើតចេញពីសេចក្តីស្រឡាញ់ និងបំណងព្រះទ័យ ដែលចង់កែប្រែយើងឲ្យបានល្អ តាមបំណងព្រះទ័យព្រះអង្គ។—Sheridan Voysey
តើអ្នកមានការយល់ឃើញដូចម្តេចខ្លះ អំពីការវាយផ្ចាលរបស់ព្រះ កាលពីមុន?
តើព្រះអង្គអាចកែតម្រង់អ្នកដូចម្តេចខ្លះ ក្នុងពេលថ្មីៗនេះ ដើម្បីឲ្យអ្នកកាន់តែមានសេចក្តីបរិសុទ្ធ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការកែតម្រង់ ទោះមានការឈឺចាប់នៅពេលខ្លះក៏ដោយ។
ព្រះអង្គប្រទានការកែតម្រង់ ដើម្បីជាប្រយោជន៍ដល់ទូលបង្គំ។
គម្រោងអានព្រះគម្ពីររយៈពេល១ឆ្នាំ : ១របាក្សត្រ ២២-២៤ និង យ៉ូហាន ៨:២៨-៥៩
