ដល់ពេលទៅផ្ទះរបស់យើង
ដោយAnne Cetas
May 26, 2024
១ពេត្រុស ៥:៦-១១
ចូរឲ្យដឹងខ្លួន ហើយចាំយាមចុះ ព្រោះអារក្សដែលជាខ្មាំងសត្រូវរបស់អ្នករាល់គ្នា វាតែងដើរក្រវែល ទាំងគ្រហឹមដូចជាសិង្ហ ដើម្បីនឹងរកអ្នកណាដែលវានឹងត្របាក់លេបបាន។ ១ពេត្រុស ៥:៨
នៅពេលដែលមិត្តភក្តិខ្ញុំ ឈ្មោះ អៃ(Al) និងខាត់ធី ស្គីហ្វ័រ(Kathy Schiffer) បើកបរយន្តហោះដ៏ល្បីល្បាញរបស់ពួកគេ ដែលនៅសល់ពីសម័យសង្រ្គាមលោកលើកទី២ ទៅកាន់កន្លែងតាំងពិពណ៌យន្តហោះ ការឆ្លើយតបរបស់អតីតយុទ្ធជនចំពោះយន្តហោះរបស់ពួកគេ មានន័យបំផុតចំពោះពួកគេ។ អតីតយុទ្ធជនដែលមានវ័យចាស់មួយចំនួន បានចូលមករកពួកគេ ដើម្បីជជែកគ្នាអំពីសង្រ្គាម ដែលពួកគេបានបម្រើការជាកងទ័ព និងយន្តហោះដែលពួកគេបានបើកបរ។ ភាគច្រើន នៅពេលដែលពួកគេលើកយករឿងសង្រ្គាមរបស់ពួកគេមកនិយាយ ពួកគេបានចែកចាយទាំងទឹកភ្នែក។ ពួកគេជាច្រើននាក់បានមានប្រសាសន៍ថា ដំណឹងល្អបំផុតដែលពួកគេបានទទួល ក្នុងអំឡុងពេលពួកគេកំពុងប្រើប្រទេសជាតិ គឺដំណឹងដែលគេប្រកាសថា “សង្រ្គាមចប់ហើយ! តោះយើងត្រឡប់ទៅផ្ទះវិញ”។
ពាក្យសម្តីដ៏មានន័យ របស់មនុស្សជំនាន់មុន បានធ្វើឲ្យខ្ញុំនឹកចាំ អំពីសង្រ្គាមដែលអ្នកជឿព្រះយេស៊ូវកំពុងតែតយុទ្ធ ជាការប្រយុទ្ធដ៏ល្អនៃសេចក្តីជំនឿ ប្រឆាំងនឹងអារក្សដែលជាសត្រូវខាងវិញ្ញាណរបស់យើង។ សាវ័កពេត្រុសបានដាស់តឿនយើងថា “អារក្សដែលជាខ្មាំងសត្រូវរបស់អ្នករាល់គ្នា វាតែងដើរក្រវែល ទាំងគ្រហឹមដូចជាសិង្ហ ដើម្បីនឹងរកអ្នកណាដែលវានឹងត្របាក់លេបបាន”(១ពេត្រុស ៥:៨)។ វាល្បួងយើង តាមមធ្យោបាយផ្សេងៗ ហើយប្រើការបាក់ទឹកចិត្ត ក្នុងទុក្ខលំបាក និងការបៀតបៀន ដើម្បីព្យាយាមទាញនាំយើង ចេញឆ្ងាយពីជំនឿលើព្រះយេស៊ូវ។ សាវ័កពេត្រុសក៏បានជំរុញអ្នកអានសំបុត្រគាត់ ក៏ដូចជាយើងរាល់គ្នា ក្នុងពេលបច្ចុប្បន្ន “ឲ្យដឹងខ្លួន ហើយចាំយាម” ជានិច្ច(១ពេត្រុស ៥:៨)។ យើងពឹងផ្អែកលើព្រះវិញ្ញាណបរិសុទ្ធ ដើម្បីកុំឲ្យខ្មាំងសត្រូវយើង រុញច្រានយើងឲ្យចុះចាញ់ ហើយដួលចុះនោះឡើយ។
យើងដឹងថា ថ្ងៃមួយ ព្រះយេស៊ូវនឹងយាងមកវិញ។ ពេលណាព្រះអង្គយាងមកវិញ ឬយើងលាចាកលោក មុនពេលព្រះអង្គយាងមកវិញ ព្រះអង្គនាំយើងទៅផ្ទះរបស់យើង នៅស្ថានសួគ៌ បន្ទាប់ពីសង្រ្គាមខាងវិញ្ញាណបញ្ចប់ជាស្ថាពរ យើងនឹងមានអារម្មណ៍ស្រដៀងនឹងពួកទាហាន ដែលបានវិលត្រឡប់ទៅផ្ទះវិញ នៅក្រោយសង្រ្គាមលោកលើកទី២។ ព្រះបន្ទូលព្រះអង្គហៅយើងជាកូនព្រះអង្គ ទៅនៅជាមួយព្រះអង្គ នឹងនាំឲ្យយើងស្រក់ទឹកភ្នែក ដោយក្តីអំណរ ពោរពេញក្នុងចិត្តយើង។—Anne Cetas
តើអ្នកត្រូវការជំនួយអ្វីខ្លះពីព្រះអម្ចាស់ ដើម្បីតតាំងនឹងផែនការរបស់វិញ្ញាណអាក្រក់? តើបងប្អូនរួមជំនឿរបស់អ្នកអាចជួយអ្នកដូចម្តេចខ្លះ ក្នុងរឿងនេះ?
ឱព្រះដ៏មានចេស្តា ព្រះអង្គធំប្រសើរលើសអ្វីៗទាំងអស់ ដែលទាស់ប្រឆាំងនឹងទូលបង្គំ។ សូមព្រះអង្គជួយទូលបង្គំឲ្យពឹងផ្អែកលើកម្លាំង និងព្រះចេស្តាព្រះអង្គ។
For further study, read Know the Enemy: Revealing Truths about Satan at DiscoverySeries.org/HP133.
គម្រោងអានព្រះគម្ពីររយៈពេល១ឆ្នាំ : ២របាក្សត្រ ១-៣ និង យ៉ូហាន ១០:១-២៣