ការសរសើរដំកើង ដោយមិនបានព្រៀងទុក
ដោយNancy Gavilanes
May 27, 2024
កិច្ចការ ១៦:១៦-២៦
លុះពេលប្រហែលជាកណ្តាលអធ្រាត្រ ប៉ុល និងស៊ីឡាស កំពុងតែអធិស្ឋាន ហើយច្រៀងសរសើរដល់ព្រះ។ កិច្ចការ ១៦:២៥
ក្នុងអំឡុងដំណើរបេសកកម្មរយៈពេលខ្លី នៅប្រទេសអេត្យូពី ក្រុមការងាររបស់យើងបានរួមដំណើរជាមួយក្រុមមួយទៀត មកពីអង្គការក្នុងតំបន់ ដើម្បីទៅឈោងចាប់យុវជនមួយក្រុម ដែលកំពុងរស់នៅក្នុងតង់ ក្នុងតំបន់អនាធិបតេយ្យ ដោយការលំបាកជាខ្លាំង។ ពួកគេមានចិត្តរីករាយ ដែលបានជួបយើង! យើងក៏បានចែកចាយទីបន្ទាល់ ពាក្យលើកទឹកចិត្ត និងអធិស្ឋានជាមួយគ្នា។ ផ្នែកដែលខ្ញុំចូលចិត្តបំផុតនៅថ្ងៃនោះ គឺនៅពេលដែលសមាជិកក្រុមការងារប្រចាំតំបន់ បានលេងហ្គីតានាំយើងច្រៀងសរសើរដំកើង និងថ្វាយបង្គំព្រះ ដោយមិនព្រៀងទុក ជាមួយមិត្តភក្តិថ្មីៗរបស់យើង នៅពេលខែភ្លឺ។ ពេលនោះពិតជាមានន័យណាស់។ ពួកគេរស់នៅក្នុងស្ថានភាពដែលហាក់ដូចជាគ្មានសង្ឃឹម តែពួកគេមានក្តីសង្ឃឹម និងក្តីអំណរ ដែលមានតែព្រះយេស៊ូវទេ ដែលអាចប្រទានឲ្យបាន។
បទគម្ពីរកិច្ចការជំពូក១៦ ក៏បានចែងអំពីការច្រៀងសរសើរដំកើង ដោយមិនបានព្រៀងទុកផងដែរ។ តែការច្រៀងសរសើរដំកើងមួយនេះ បានធ្វើឲ្យកក្រើកគុក ក្នុងទីក្រុងភីលីព។ សាវ័កប៉ុល និងលោកស៊ីឡាសត្រូវគេចាប់ខ្លួនដាក់គុក គេវាយដុំ ធ្វើទារុណកម្ម ខណៈពេលដែលពួកគេកំពុងធ្វើការបម្រើព្រះយេស៊ូវ។ ពួកគេមិនបានអស់សង្ឃឹមឡើយ តែផ្ទុយទៅវិញ ពួកគេថ្វាយបង្គំព្រះ ដោយ “ការអធិស្ឋាន និងការច្រៀងសរសើរព្រះអង្គ” នៅក្នុងគុក។ “នោះស្រាប់តែកើតមានកក្រើកដីជាខ្លាំង ដល់ម៉្លេះបានជារញ្ជួយដល់ជើងជញ្ជាំងគុកផង ហើយទ្វារទាំងប៉ុន្មានរបើកចេញភ្លាម ខ្នោះក៏រហើបចេញទាំងអស់ទៅ”(ខ.២៥-២៦)។
ពេលនោះ មេគុកគិតចង់សម្លាប់ខ្លួន ប៉ុន្តែ ពេលគាត់ដឹងថា អ្នកទោសមិនបានគេចខ្លួន គាត់មានការស្ញប់ស្ញែងចំពោះការអ្វីដែលព្រះអម្ចាស់បានធ្វើ ហើយក្រុមគ្រួសាររបស់គាត់ក៏បានទទួលសេចក្តីសង្គ្រោះ(ខ.២៧-៣៤)។
ព្រះអម្ចាស់សព្វព្រះទ័យនឹងស្តាប់យើងសរសើរដំកើងព្រះអង្គ។ ចូរយើងថ្វាយបង្គំព្រះអង្គ ក្នុងអំឡុងពេលដែលយើងរីករាយ ក៏ដូចជាពេលដែលយើងជួបទុក្ខលំបាកក្នុងជីវិតផងដែរ។—Nancy Gavilanes
តើព្រះទ្រង់បានជួយឲ្យអ្នកសរសើរដំកើង និងថ្វាយបង្គំព្រះអង្គដូចម្តេចខ្លះ នៅក្នុងពេលដែលមានការលំបាក? តើព្រះអង្គបានបើកសម្ដែងអង្គទ្រង់ តាមរបៀបដែលគួរឲ្យកត់សំគាល់ដូចម្តេចខ្លះ នៅពេលដែលអ្នកសរសើរដំកើង និងថ្វាយបង្គំព្រះអង្គនៅពេលនោះ?
ឱព្រះអម្ចាស់ សូមព្រះអង្គជួយទូលបង្គំឲ្យសរសើរដំកើងព្រះអង្គ ទោះទូលបង្គំកំពុងប្រឈមមុខដាក់បញ្ហាអ្វីក៏ដោយ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ៤-៦ និង យ៉ូហាន ១០:២៤-៤២