កុំភ្លេចបង្ហាញសេចក្តីសប្បុរស
ដោយJohn Blase
May 28, 2024
អេភេសូរ ៤:២៩-៣២
ចូរមានចិត្តសប្បុរសនឹងគ្នាទៅវិញទៅមក ព្រមទាំងមានចិត្តទន់សន្តោស ហើយអត់ទោសគ្នា។ អេភេសូរ ៤:៣២
“តើខ្ញុំមានការស្តាយក្រោយ ចំពោះរឿងអ្វីខ្លះ?” នេះជាសំណួរ ដែលលោកចន សូនឌ័រ(George Saunders) ជាអ្នកនិពន្ធដ៏ល្បីល្បាញ បានឆ្លើយ ក្នុងការឡើងថ្លែងសន្ទរកថា ក្នុងពិធីចែកសញ្ញាប័ត្រ នៅឆ្នាំ២០១៣ នៅមហាវិទ្យាល័យ ស៊ីរ៉ាគូស។ វិធីសាស្រ្តរបស់គាត់នៅក្នុងការឆ្លើយសំណួរនេះ គឺបានលើកទឹកទឹកចិត្តមនុស្សមានវ័យចាស់ជាង ឲ្យចែកចាយអំពីការស្តាយក្រោយមួយ ឬពីរយ៉ាង ដែលពួកគេមានក្នុងជីវិត ដល់មនុស្សមានវ័យក្មេងជាង ដែលអាចរៀនសូត្រពីគំរូរបស់ពួកគេ។ គាត់ក៏បានលើកឡើងផងដែរ អំពីរឿងមួយចំនួនដែលគេគិតស្មានថា គាត់មានការស្តាយក្រោយ ដែលមានដូចជា ភាពក្រីក្រ និងការមានការងារមិនល្អ។ តែលោកសូនឌ័រ មានប្រសាសន៍ថា គាត់មិនមានការសោកស្តាយចំពោះរឿងទាំងនេះទេ។ ទោះជាយ៉ាងណាក៏ដោយ អ្វីដែលគាត់ពិតជាស្តាយក្រោយនោះ គឺការខកខានមិនបានបង្ហាញសេចក្តីសប្បុរសដល់អ្នកដទៃ ឬខកខានមិនបានឆក់ឱកាសបង្ហាញចិត្តសប្បុរសដល់នរណាម្នាក់។
សាវ័កប៉ុលបានសរសេរសំបុត្រផ្ញើទៅពួកជំនុំនៅទីក្រុងអេភេសូរ ដោយឆ្លើយសំណួរដែលសួរថា តើជីវិតគ្រីស្ទបរិស័ទមានលក្ខណៈដូចម្តេចខ្លះ? យើងប្រហែលប្រញាប់ឆ្លើយសំណួរនេះ ដោយលើកឡើងថា គ្រីស្ទបរិស័ទត្រូវមានទស្សនៈនយោបាយបែបណាមួយ ត្រូវជៀសវាងសៀវភៅ ឬខ្សែភាពយន្ត ដោយថ្វាយបង្គំតាមរបៀបណាមួយជាដើម។ ប៉ុន្តែ សាវ័កប៉ុលមិនបាននិយាយតែអំពីបញ្ហាក្នុងសម័យដែលគាត់រស់នៅនោះទេ។ គាត់បានលើកឡើង អំពីការជៀសវាងការ “ពោលពាក្យអាក្រក់”(អេភេសូរ ៤:២៩) និងការជម្រះចោលចិត្តជូរល្វីង និងកំហឹង (ខ.៣១)។ ហើយគាត់ក៏បានប្រាប់យើងផងដែរថា “ចូរមានចិត្តសប្បុរសនឹងគ្នាទៅវិញទៅមក”(ខ.៣២)។ ហើយមូលហេតុ គឺដោយសារព្រះអម្ចាស់ក៏បានបង្ហាញសេចក្តីសប្បុរស ចំពោះយើង តាមរយៈព្រះគ្រីស្ទផងដែរ។
យើងជឿថា អ្នកជឿព្រះយេស៊ូវត្រូវមានលក្ខណៈសម្បត្តិល្អៗជាច្រើន ហើយក្នុងចំណោមនោះ យើងក៏ត្រូវមានសេចក្តីសប្បុរសចំពោះអ្នកដទៃផងដែរ។—John Blasé
តើថ្មីៗនេះ អ្នកខកខានមិនបានបង្ហាញសេចក្តីសប្បុរស នៅកន្លែងណាខ្លះ? តើអ្នកអាចមានជោគជ័យ នៅក្នុងការបង្ហាញសេចក្តីសប្បុរស នៅថ្ងៃនេះ យ៉ាងដូចម្តេចខ្លះ?
ឱព្រះយេស៊ូវ ដោយសារព្រះអង្គមានសេចក្តីសប្បុរសចំពោះទូលបង្គំ សូមព្រះអង្គជួយទូលបង្គំឲ្យមានចិត្តសប្បុរសចំពោះអ្នកដទៃផងដែរ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ៧-៩ និង យ៉ូហាន ១១:១-២៩