លោកុប្បត្តិ ៣៥:១-៥
ដូច្នេះចូរឯងរាល់គ្នាលះចោលអស់ទាំងព្រះដទៃ ដែលមាននៅក្នុងពួកឯងចេញទៅ ហើយផ្ចង់ចិត្តដំរង់ទៅឯព្រះយេហូវ៉ា ជាព្រះនៃសាសន៍អ៊ីស្រាអែលវិញ។ យ៉ូស្វេ ២៤:២៣
ពួកប្រុសៗខ្លះ នៅក្នុងក្រុមសិក្សាព្រះគម្ពីរ មានអាយុជិត៨០ឆ្នាំហើយ ដូចនេះ ខ្ញុំមានការភ្ញាក់ផ្អើល ពេលដែលបានដឹងថា ពួកគេកំពុងព្យាយាមជម្នះការត្រេកត្រអាលផ្លូវភេទ។ វាជាការតយុទ្ធ ដែលបានចាប់ផ្តើមតាំងពីពេលពួកគេស្ថិតក្នុងវ័យយុវជន ហើយនៅតែបន្តមានក្នុងជីវិតពួកគេ។ ជារៀងរាល់ថ្ងៃ ពួកគេបានធ្វើការប្តេជ្ញាចិត្តថា នឹងដើរតាមព្រះយេស៊ូវ ដោយព្យាយាមជម្នះអំពើបាបនេះ ហើយក៏បានទូលសូមការអត់ទោសបាប នៅពេលណាពួកគេបានភ្លាត់ធ្វើខុសទៀត។
យើងប្រហែលមានការភ្ញាក់ផ្អើល នៅពេលណាបុរសដែលកោតខ្លាចព្រះ នៅតែតយុទ្ធនឹងការល្បួង នៅក្នុងដំណាក់កាលចុងក្រោយនៃជីវិតពួកគេ តែយើងប្រហែលមិនគួរមានការភ្ញាក់ផ្អើលទេ។ រូបព្រះគឺជាអ្វីក៏ដោយ ដែលព្យាយាមជំនួសព្រះ នៅក្នុងចិត្តរបស់យើង ហើយពួកវានឹងលេចឡើងម្តងទៀត បន្ទាប់ពីយើងបានសន្និដ្ឋានថា ពួកវាលែងមានក្នុងជីវិតយើងទៀត តាំងពីយូរមកហើយ។
ក្នុងព្រះគម្ពីរសញ្ញាចាស់ លោកយ៉ាកុបបានទទួលការជួយសង្គ្រោះ ឲ្យរួចពីពូរបស់គាត់ឈ្មោះឡាបាន់ និងលោកអេសាវ ជាបងប្រុសរបស់គាត់។ គាត់បានវិលត្រឡប់មកស្រុកបេតអែលវិញ ដើម្បីថ្វាយបង្គំព្រះ និងសរសើរដំកើងព្រះអង្គ សម្រាប់ព្រះពរជាច្រើន ដែលគាត់បានទទួល តែក្រុមគ្រួសារគាត់នៅតែបន្តរក្សាទុករូបព្រះរបស់សាសន៍ដទៃ ដែលលោកយ៉ាកុបត្រូវតែកប់ចោល(លោកុប្បត្តិ ៣៥:២-៤)។ នៅចុងបញ្ចប់នៃកណ្ឌគម្ពីរយ៉ូស្វេ បន្ទាប់ពីពួកអ៊ីស្រាអែលបាន ឈ្នះខ្មាំងសត្រូវ ក្នុងសង្គ្រាម ហើយចូលតាំងទីលំនៅក្នុងទឹកដីកាណាន លោកយ៉ូស្វេនៅតែបន្តជំរុញពួកគេ ឲ្យលះបង់ព្រះរបស់សាសន៍ដទៃ ដែលរស់នៅក្នុងចំណោមពួកគេ ហើយក៏ឲ្យថ្វាយចិត្តដាច់ដល់ព្រះអម្ចាស់វិញ(យ៉ូស្វេ ២៤:២៣)។ ហើយព្រះនាងមីកាល ជាមហេសីរបស់ស្តេចដាវីឌ ក៏ទំនងជាបានរក្សាទុក្ខរូបព្រះផងដែរ ព្រោះព្រះនាងបានដាក់រូបព្រះមួយ នៅលើគ្រែ ដើម្បីបោកបញ្ឆោតពួកទាហានដែលមកធ្វើគុតទ្រង់(១សាំយ៉ូអែល ១៩:១១-១៦)។
ការថ្វាយបង្គំរូបព្រះ ក្នុងជីវិតគ្រីស្ទបរិស័ទ គឺជារឿងដែលកើតមានជាធម្មតា លើសពីការរំពឹងគិតរបស់យើងទៅទៀត ហើយព្រះអង្គក៏មានព្រះទ័យអត់ធ្មត់ ទោះយើងមិនសមនឹងឲ្យព្រះអង្គអត់ធ្មត់ចំពោះយើងក៏ដោយ។ ការល្បួងឲ្យយើងងាកបែរទៅរកពួកវា ក៏នឹងកើតមាន តែការអត់ទោសរបស់ព្រះអង្គ មានអំណាចខ្លាំងជាងការល្បួងនោះ។ ចូរយើងញែកខ្លួនយើងជាបរិសុទ្ធថ្វាយព្រះយេស៊ូវ ដោយងាកបែរចេញពីបាបយើង ហើយរកឃើញការអត់ទោសក្នុងព្រះអង្គ។—Mike Wittmer
តើអ្នកបានជួបការល្បួង ឲ្យធ្វើអំពើបាបអ្វីខ្លាំងជាងគេ? តើអ្នកត្រូវបំផ្លាញរូបព្រះទាំងនោះ ជាជំហានៗ ដូចម្តេចខ្លះ?
ឱព្រះវរបិតា ទូលបង្គំសូមសារភាពបាបរបស់ទូលបង្គំ ហើយសូមទទួលការអត់ទោសពីព្រះអង្គ តាមរយៈព្រះយេស៊ូវដោយការអរព្រះគុណ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ៣០-៣១ និង យ៉ូហាន ១៨:១-១៨
