សេចក្តីជំនឿដែលសប្បុរស
ដោយMatt Lucas
June 16, 2024
ចោទិយកថា ២៤:១៧-២២
កាលណាច្រូតចំរូតនៅស្រែរបស់ឯង ... ត្រូវទុកសំរាប់អ្នកដទៃ និងពួកកូនកំព្រា ហើយនឹងស្រីមេម៉ាយវិញ។ ចោទិយកថា ២៤:១៩
កាលពីរបីឆ្នាំមុន ពួកជំនុំរបស់យើងបានទទួលការអញ្ជើញ ឲ្យទទួលជនភៀសខ្លួនចូលស្នាក់នៅ បន្ទាប់ពីពួកគេបានភៀសខ្លួនចេញប្រទេសកំណើត ដោយសារការផ្លាស់ប្តូរអ្នកដឹកនាំ ដែលនាំឲ្យមានភាពវឹកវរ។ ក្រុមគ្រួសារទាំងមូលបានធ្វើដំណើរមកដល់ ដោយមានតែបង្វេចតួចមួយ។ ក្រុមគ្រួសារមួយចំនួន ក្នុងពួកជំនុំរបស់ខ្ញុំ បានបើកទ្វារផ្ទះទទួលពួកគេឲ្យចូលរស់នៅជាមួយ ហើយសូម្បីតែគ្រួសារដែលនៅសល់តែបន្ទប់តូចមួយ ក៏បានស្វាគមន៍ពួកគេឲ្យចូលស្នាក់នៅជាមួយផងដែរ។
ការទទួលស្វាគមន៍ដោយចិត្តសប្បុរសដូចនេះ បានឆ្លុះបញ្ចាំង អំពីព្រះរាជបញ្ជារបស់ព្រះ ចំពោះពួកអ៊ីស្រាអែល នៅពេលដែលពួកគេចូលរស់នៅក្នុងទឹកដីសន្យា(ចោទិយថា ២៤:១៩-២១)។ ដោយសារពួកគេរស់នៅក្នុងសង្គមកសិកម្ម ពួកគេមានការយល់ដឹង អំពីសារៈសំខាន់នៃការប្រមូលផល។ ស្រូវដែលពួកគេបានច្រូតកាត់ មានសារៈសំខាន់យ៉ាងខ្លាំង ចំពោះការរស់នៅ ក្នុងឆ្នាំក្រោយ។ ហេតុនេះហើយ ព្រះអម្ចាស់ក៏បានបង្គាប់ពួកគេឲ្យ ទុកគួរស្រូវខ្លះ សម្រាប់ជនបរទេសដែលមកស្នាក់នៅក្នុងចំណោមពួកគេ ក៏ដូចជាសម្រាប់ពួកក្មេងកំព្រា និងស្ត្រីមេម៉ាយ(ខ.១៩) ហើយក៏បានប្រាប់ពួកគេឲ្យទុកចិត្តលើការផ្គត់ផ្គង់របស់ព្រះអង្គ។ ពួកអ៊ីស្រាអែលត្រូវតែបង្ហាញចេញនូវចិត្តសប្បុរស មិនគ្រាន់តែចែករំលែកដល់អ្នកដទៃ នៅពេលដែលពួកគេមានគ្រប់គ្រាន់ប៉ុណ្ណោះទេ តែក៏ត្រូវចែករំលែក ដោយទុកចិត្តលើការផ្គត់ផ្គង់របស់ព្រះអង្គផងដែរ។
ការស្វាគមន៍អ្នកដទៃយ៉ាងដូចនេះ ក៏បានរំឭកពួកគេឲ្យនឹកចាំថា កាលពីមុន ពួកគេក៏ធ្លាប់រស់នៅជាទាសករ ក្នុងទឹកដីអេស៊ីព្ទផងដែរ(ខ.១៨,២២)។ កាលពីមុន ពួកគេធ្លាប់រស់នៅ ក្រោមការគាបសង្កត់ និងភាពលំបាកតោកយ៉ាក។ ការបង្ហាញចេញនូវសេចក្តីសប្បុរសរបស់ពួកគេ គឺជាការរំឭកអំពីសេចក្តីសប្បុរស ដែលព្រះអង្គមានចំពោះពួកគេ នៅក្នុងការរំដោះពួកគេឲ្យរួចពីចំណង។
អ្នកជឿព្រះយេស៊ូវ ក៏បានទទួលការលើកទឹកចិត្តឲ្យប្រព្រឹត្តចំពោះអ្នកដទៃ ដោយចិត្តសប្បុរសផងដែរ។ គឺដូចដែលសាវ័កប៉ុលបានរំឭកយើងថា “ទោះបើទ្រង់ជាសេដ្ឋីក៏ដោយ គង់តែទ្រង់បានត្រឡប់ជាក្រ ដោយព្រោះអ្នករាល់គ្នា ដើម្បីឲ្យអ្នករាល់គ្នាបានមានឡើង ដោយសារសេចក្តីកម្ររបស់ទ្រង់”(២កូរិនថូស ៨:៩)។ ដូចនេះ យើងត្រូវមានចិត្តសប្បុរសចំពោះអ្នកដទៃ ព្រោះព្រះអង្គបានបង្ហាញព្រះទ័យសប្បុរសចំពោះយើងរួចហើយ។—Matt Lucas
តើមាននរណាម្នាក់ជួយអ្នក ក្នុងពេលដែលអ្នកមានការខ្វះខាត នៅពេលណា? តើអ្នកនឹងចែករំលែកដល់អ្នកដទៃ ដោយទុកចិត្តលើការផ្គត់ផ្គង់របស់ព្រះអង្គ ដូចម្តេចខ្លះ?
ឱព្រះវរបិតា សូមព្រះអង្គបើកភ្នែកទូលបង្គំ ឲ្យមើលឃើញតម្រូវការរបស់អ្នកដែលខ្វះខាត ក្នុងសហគមន៍របស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : នេហេមា ៧-៩ និង កិច្ចការ ៣