ជាអ្នកមានខាងឯការល្អ
ដោយKaren Pimpo
June 23, 2024
១ធីម៉ូថេ ៦:៦-១០,១៧-១៩
ចូរបង្គាប់ឲ្យគេធ្វើគុណ និងការល្អជាបរិបូរ ព្រមទាំងចែកទានដោយសទ្ធា ហើយប្រុងប្រៀបនឹងជួយគេផង។ ១ធីម៉ូថេ ៦:១៨
អ្នកស្រី អូសេឡា មែកខាធី(Oseola McCarty) បានធ្វើការងារដ៏ហត់នឿយ ជាអ្នកបោកគក់សំលៀកបំពាក់ អស់៧ទសវត្សរ៍ ដែលមានការបោកគក់ និងការពូតខោអាវដោយដៃ។ នៅទីបំផុត គាត់ក៏បានត្រៀមខ្លួនជាស្រេច ដើម្បីចូលនិវត្តន៍ ក្នុងអាយុ៨៦ឆ្នាំ។ គាត់បានសន្សំប្រាក់ចំណូលតិចតួចរបស់គាត់ ក្នុងរយៈពេលជាច្រើនឆ្នាំនោះ ហើយសហគមន៍របស់គាត់មានការភ្ញាក់ផ្អើលយ៉ាងខ្លាំង នៅពេលដែលគាត់បានបរិច្ចាគលុយ ១៥ម៉ឺនដុល្លា ឲ្យសកលវិទ្យាល័យមួយនៅក្បែរផ្ទះគាត់ ដើម្បីបង្កើតមូលនិធិអាហារូបករណ៍ សម្រាប់សិស្សក្រីក្រ។ មនុស្សរាប់រយនាក់មានការប៉ះពាល់ចិត្ត ចំពោះអំពើសប្បុរសធម៌របស់គាត់ដែលមិនគិតប្រយោជន៍ផ្ទាល់ខ្លួន ហើយក៏បានចូលរួមបរិច្ចាគប្រាក់ជាមួយគាត់ ដែលធ្វើឲ្យមូលនិធិអាហារូបករណ៍នោះ មានចំនួនកើនឡើងច្រើនជាងមុន៣ដង។
អ្នកស្រីអូសេឡា បានយល់ឃើញថា តម្លៃពិតប្រាកដនៃទ្រព្យសម្បត្តិរបស់គាត់ មិនស្ថិតនៅត្រង់ការប្រើប្រាស់វា ដើម្បីប្រយោជន៍ផ្ទាល់ខ្លួននោះទេ តែដើម្បីធ្វើជាព្រះពរសម្រាប់អ្នកដទៃ។ សាវ័កប៉ុលបានបង្រៀនលោកធីម៉ូថេ ឲ្យបង្គាប់ដល់អ្នកមាន ក្នុងលោកិយនេះ ឲ្យធ្វើការល្អ ឲ្យបានច្រើនជាបរិបូរ(១ធីម៉ូថេ ៦:១៨)។ យើងម្នាក់ៗទទួលបានទ្រព្យសម្បត្តិតិចឬច្រើន ជាបញ្ញើពីព្រះអម្ចាស់ ទោះជាលុយកាក់ ឬជាធនធានដទៃទៀតក៏ដោយ។ សាវ័កប៉ុលបានដាស់តឿនយើងឲ្យទុកចិត្តព្រះ ជាជាងទុកចិត្តលើធនធានរបស់យើង(ខ.១៧) ហើយសន្សំទ្រព្យនៅស្ថានសួគ៌ ដោយធ្វើការល្អ និងចែករំលែក(ខ.១៨)។
ក្នុងការបង្រៀនរបស់ព្រះអម្ចាស់ អំពីទ្រព្យសម្បត្តិ ការរស់នៅដោយភាពកំណាញ់ និងគ្មានចិត្តសប្បុរស នឹងនាំឲ្យយើងមានអារម្មណ៍ថាខ្វះខាត និងមិនចេះស្កប់ស្កល់។ ការចែករំលែកដល់អ្នកដទៃ ដោយសេចក្តីស្រឡាញ់ គឺជាផ្លូវឆ្ពោះទៅរកភាពពេញលេញ។ ការមានចិត្តកោតខ្លាច និងស្កប់ស្កល់ចំពោះអ្វីដែលយើងមាន ជាជាងផ្តោតទៅលើការស្វែងរកបន្ថែម គឺជាកំរៃយ៉ាងធំ(ខ.៦)។ តើយើងមានចិត្តសប្បុរសដូចម្តេចខ្លះ ក្នុងការចែករំលែកធនធានរបស់យើង ដូចអ្នកស្រីអូសេឡា? ចូរយើងព្យាយាមធ្វើជាអ្នកមានខាងឯការប្រព្រឹត្តល្អ នៅថ្ងៃនេះ តាមការដឹកនាំរបស់ព្រះ។—Karen Pimpo
តើថ្ងៃនេះ អ្នកមានឱកាសបង្ហាញសេចក្តីសប្បុរស នៅពេលណាខ្លះ? តើការចែករំលែកអ្វីដែលអ្នកមាន នាំឲ្យអ្នកមានចិត្តស្កប់ស្កល់កាន់តែខ្លាំង ដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានប្រទានទូលបង្គំនូវធនធាន សម្រាប់ការរស់នៅ។
ទូលបង្គំសូមថ្វាយធនធានទាំងនោះដាច់ដល់ព្រះអង្គ នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ : នាងអេសធើរ ៩-១០ និង កិច្ចការ ៧:១-២១