អ្នកខ្លាំងពូកែខាងការអធិស្ឋាន
ដោយAmy Boucher Pye
June 25, 2024
អេភេសូរ ១:១៥-២៣
នោះខ្ញុំមិនដែលលែងអរព្រះគុណ ដោយព្រោះអ្នករាល់គ្នាឡើយ គឺខ្ញុំតែងដំណាលពីអ្នករាល់គ្នា ក្នុងសេចក្តីអធិស្ឋានរបស់ខ្ញុំវិញ។ អេភេសូរ ១:១៦
លោកជន(Jørn) ជាកសិករ ដែលជួលដីស្រែរបស់គេ ដើម្បីធ្វើស្រែ។ គេមិនគិតថា គាត់នឹងទទួលបានផលចំណេញច្រើននោះទេ។ តែទោះគាត់មានភ្នែកខ្សោយ និងកាយសម្បទាមិនគ្រប់គ្រាន់ក៏ដោយ គាត់បានធ្វើការលះបង់ ដើម្បីអ្នកភូមិរបស់គាត់ ក្នុងប្រទេសនរវេយ ដោយអធិស្ឋានឲ្យពួកគេ អស់ជាច្រើនយប់ នៅពេលណាការឈឺចាប់ក្នុងខ្លួនគាត់ ធ្វើឲ្យគាត់មិនអាចគេងលក់។ ក្នុងការអធិស្ឋាននោះ គាត់បានអធិស្ឋានឲ្យពួកគេ ម្តងមួយគ្រួសារ ដោយបញ្ចេញឈ្មោះរបស់ពួកគេម្នាក់ៗ និងថែមទាំងបានអធិស្ឋានឲ្យក្មេងៗដែលគាត់មិនទាន់បានជួបផងដែរ។ អ្នកភូមិស្រឡាញ់វិញ្ញាណដ៏សុភាពរបស់គាត់ ហើយក៏បានទៅសុំយោបល់ និងការណែនាំប្រកបដោយប្រាជ្ញាពីគាត់។ បើសិនជាគាត់មិនអាចជួយពួកគេ តាមរបៀបជាក់ស្តែងណាមួយ ពួកគេនៅតែមានអារម្មណ៍ថា ព្រះអម្ចាស់បានប្រទានពរពួកគេ តាមរយៈសេចក្តីស្រឡាញ់ដែលគាត់បានបង្ហាញដល់ពួកគេ ដោយបានទទួលសេចក្តីស្រឡាញ់ពីគាត់។ នៅពេលដែលលោកជនទទួលមរណៈភាព គេបានធ្វើពិធីបុណ្យសពធំជាងគេសម្រាប់គាត់ នៅក្នុងសហគមន៍របស់ពួកគេ ទោះគាត់មិនមានសាច់ញាតិនៅក្នុងភូមិនោះក៏ដោយ។ ការអធិស្ឋានរបស់គាត់ បានបង្កើតផលផ្លែជាច្រើនហួសក្តីស្រមៃរបស់គាត់។
បុរសដែលបានបន្ទាបខ្លួននេះ បានយកគំរូតាមសាវ័កប៉ុល ដែលបានស្រឡាញ់មនុស្សដែលគាត់បានបម្រើ និងអធិស្ឋានឲ្យពួកគេ កាលគាត់កំពុងជាប់ឃុំក្នុងគុក។ គាត់បានសរសេរសំបុត្រទៅពួកជំនុំនៅទីក្រុងអេភេសូរ កាលគាត់កំពុងជាប់គុក នៅទីក្រុងរ៉ូម ដោយអធិស្ឋានសូមព្រះអម្ចាស់ ប្រទានពួកគេនូវ “ព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់” និងសូមឲ្យភ្នែកនៃចិត្តរបស់ពួកគេ “បានភ្លឺឡើង”(អេភេសូរ ១:១៧-១៨)។ គាត់ពិតជាចង់ឲ្យពួកគេស្គាល់ព្រះយេស៊ូវច្បាស់ ហើយរស់នៅ ដោយសេចក្តីស្រឡាញ់ និងការរួបរួម តាមរយៈអំណាចនៃព្រះវិញ្ញាណ។
លោកជន និងសាវ័កប៉ុលមានការប្តូរផ្តាច់ទាំងស្រុង ចំពោះព្រះអម្ចាស់ ដោយបានអធិស្ឋានឲ្យមនុស្សដែលពួកគេស្រឡាញ់ និងបម្រើ។ ចូរយើងរៀនសូត្រពីគំរូរបស់ពួកគេ ហើយយកតម្រាប់តាម ក្នុងការស្រឡាញ់ និងប្រើអ្នកដទៃនៅថ្ងៃនេះ។—Amy Boucher Pye
តើអ្នកបានស្គាល់នរណាខ្លះ ជាមនុស្សខ្លាំងពូកែខាងការអធិស្ឋាន ដោយចិត្តសុភាព? តើគំរូរបស់គាត់បានឆ្លុះបញ្ចាំង ឲ្យគេបានស្គាល់ព្រះទ័យរបស់ព្រះគ្រីស្ទ ដូចម្តេចខ្លះ?
ឱព្រះយេស៊ូវ ព្រះអង្គបម្រើអ្នកដទៃ និងបំពេញតម្រូវការរបស់ពួកគេ។ សូមព្រះអង្គជួយទូលបង្គំ ឲ្យស្រឡាញ់ និងបម្រើព្រះអង្គ ដោយក្តីអំណរ ជារៀងរាល់ថ្ងៃ។
គម្រោងអានព្រះគម្ពីររយៈពេល១ឆ្នាំ : យ៉ូប ៣-៤ និង កិច្ចការ ៧:៤៤-៦០