ហេព្រើរ ១១:១៣-១៦
តែឥឡូវនេះ គេសង្វាតចង់បានស្រុក១ដ៏ប្រសើរជាង គឺខាងស្ថានសួគ៌វិញ។ ហេព្រើរ ១១:១៦
ជារៀងរាល់ឆ្នាំ មានមនុស្សជាង២រយលាននាក់ មានជំនឿសាសនាផ្សេងគ្នា បានធ្វើធម្មយាត្រា ទៅកាន់ទីសក្ការៈសំខាន់ៗរបស់សាសនាពួកគេ។ អស់រយៈពេលជាច្រើនជំនាន់មកហើយ ដែលមនុស្សជាច្រើនយល់ឃើញថា ការធ្វើធម្មយាត្រា គឺជាការធ្វើដំណើរ ទៅកាន់ទីសក្ការៈ ដើម្បីទទួលព្រះពរបែបណាមួយ។ ពួកគេខិតខំធ្វើយ៉ាងណា ទៅឲ្យដល់ព្រះវិហារ ទីសក្ការបូជា ឬទីតាំងផ្សេងទៀត ដែលពួកគេអាចទទួលពរជ័យពីសាសនា ឬព្រះរបស់ពួកគេ។
ទោះជាយ៉ាងណាក៏ដោយ សម្រាប់គ្រីស្ទបរិស័ទជាជនជាតិឃែល នៅចក្រភពអង់គ្លេស ពួកគេបានធ្វើដំណើរទៅទទួលព្រះពរ តាមរបៀបផ្សេងពីនេះ។ ពួកគេធ្វើដំណើរដោយគ្មានគោលដៅ ចូលទៅក្នុងព្រៃ ឬទីវាលដែលគ្មានមនុស្សនៅ ឬជិះទូករសាត់អណ្តែត តាមចរន្តទឹកសមុទ្រ ដោយគ្មានគោលដៅ ព្រោះពួកគេយល់ឃើញថា ការធ្វើដំណើរនោះ គឺជាការរៀនទុកចិត្តព្រោះ ក្នុងទឹកដីដែលពួកគេមិនស្គាល់។ បានសេចក្តីថា សម្រាប់ពួកគេ ព្រះពរមិនមែនជាអ្វីដែលពួកគេអាចរកបាននៅត្រង់គោលដៅនៃការធ្វើដំណើរ តែអាចរកបាននៅតាមផ្លូវដែលពួកគេធ្វើដំណើរ។
បទគម្ពីរហេព្រើរ ជំពូក១១ ជាបទគម្ពីរដ៏សំខាន់ ដែលជនជាតិឃែលបានយកមកប្រើ ក្នុងការធ្វើដំណើរនេះ។ ការរស់នៅក្នុងព្រះគ្រីស្ទ គឺជាការចាកចេញពីផ្លូវរបស់លោកិយ ហើយជាការធ្វើដំណើរ ទៅកាន់ទីក្រុងរបស់ព្រះអម្ចាស់ (ខ.១៣-១៦) ដូចនេះ ពួកគេយល់ឃើញថា ពួកគេត្រូវទុកចិត្តថា ព្រះនឹងផ្គត់ផ្គង់ពួកគេ ក្នុងការធ្វើដំណើរដ៏ពិបាក តាមផ្លូវដែលពួកគេមិនស្គាល់ ដើម្បីឲ្យពួកគេកើតមានសេចក្តីជំនឿដ៏រឹងមាំ ដូចវីរៈបុរសនៃសេចក្តីជំនឿក្នុងសម័យដើម(ខ.១-១២)។
យើងមិនចាំបាច់ត្រូវធ្វើដំណើរខាងសាច់ឈាម ចូលទៅក្នុងវាលរហោស្ថាន ឬសមុទ្រដើម្បីទទួលព្រះពរ ឬរៀនសូត្រអំពីជំនឿនោះទេ ប៉ុន្តែ សម្រាប់អ្នកដែលទុកចិត្តព្រះយេស៊ូវ ការរស់នៅជាគ្រីស្ទបរិស័ទ គឺជាការធ្វើដំណើរខាងវិញ្ញាណឆ្ពោះទៅរកនគរស្ថានសួគ៌ ដែលត្រូវឆ្លងកាត់ព្រៃភ្នំ ភាពទាល់ច្រក និងវាលរហោស្ថានខាងវិញ្ញាណ។ ខណៈពេលដែលយើងកំពុងធ្វើដំណើរខាងវិញ្ញាណ ចូរយើងកុំខកខាន មិនបានទទួលព្រះពរ ក្នុងការដកពិសោធន៍ជាមួយនឹងការផ្គត់ផ្គង់របស់ព្រះ នៅតាមផ្លូវឡើយ។—Sheridan Voysey
តើអ្នកអាចបើកចំហចិត្តដូចម្តេចខ្លះ នៅថ្ងៃនេះ ដើម្បីទទួលអំណោយរបស់ព្រះ នៅតាមផ្លូវនៃជីវិត?
តើអ្នកអាចរំឭកខ្លួនឯងដូចម្តេចខ្លះ ឲ្យនឹកចាំថា លោកិយនេះមិនមែនជាផ្ទះពិតប្រាកដរបស់អ្នកទេ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការបង្ហាញឲ្យទូលបង្គំដឹងថា
ទុក្ខលំបាកក្នុងជីវិត គឺជាឱកាស សម្រាប់ឲ្យសេចក្តីជំនឿរបស់ទូលបង្គំលូតលាស់ កាន់តែស៊ីជម្រៅ។
Learn more here: DiscoverODB.org/articles/gardens-and-the-history-of-humanity.
គម្រោងអានព្រះគម្ពីររយៈពេល១ឆ្នាំ : យ៉ូប ៨-១០ និង កិច្ចការ ៨:២៦-៤០
