រ៉ូម ៨:១២-២១
ដោយហេតុនោះបានជាយើងស្រែកឡើងថា ឱអ័ប្បា ព្រះវរបិតាអើយ។ រ៉ូម ៨:១៥
រយៈពេលប៉ុន្មាននាទី បន្ទាប់ពីលោកប្រធានាធិបតីអាមេរិក ហារី ទ្រូមិន(Harry Truman) ធ្វើការប្រកាសថា សង្គ្រាមលោកលើកទី២បានបញ្ចប់ហើយ ទូរស័ព្ទបានរោទ៍ឡើង ក្នុងផ្ទះឈើតូចមួយ ក្នុងទីក្រុងគ្រែនវីយូ រដ្ឋមីសូរី។ ដូនចាស់ម្នាក់ អាយុ៩២ឆ្នាំ បានទុកកិច្ចការចោលមួយឡែកសិន ដើម្បីលើកទូរស័ព្ទនិយាយ។ ភ្ញៀវដែលមកលេងផ្ទះគាត់ ក៏បានឮគាត់និយាយថា “ហាឡូ … ចាស់ ម៉ាក់សុខសប្បាយទេ។ ចាស់ ម៉ាក់កំពុងស្តាប់វិទ្យុ … ឥឡូវនេះ បើសិនជាអាច កូនមកលេងម៉ាក់ផង… ជំរាបលា”។ ដូនចាស់ក៏បានងាកមកភ្ញៀវរបស់គាត់ ហើយនិយាយថា “ហារី កូនប្រុសខ្ញុំ ទូរស័ព្ទមក។ ហារីគឺជាកូនល្អ … ពេលទូរស័ព្ទរោទ៍ ខ្ញុំដឹងថា គាត់ទូរស័ព្ទមកខ្ញុំ។ គាត់តែងតែទូរស័ព្ទប្រាប់ខ្ញុំ បន្ទាប់ពីបញ្ហាអ្វីមួយបានបញ្ចប់”។
ទោះយើងមានភាពជោគជ័យប៉ុណ្ណា ឬមានវ័យចាស់ប៉ុណ្ណា យើងតែងតែចង់ទូរស័ព្ទទៅកាន់ឪពុកម្តាយរបស់យើង។ យើងចង់ឮពួកគាត់និយាយបញ្ជាក់ថា យើងជា “កូនល្អ!”។ ទោះយើងមានភាពជោគជ័យប៉ុណ្ណាក៏ដោយ ក៏យើងនៅតែជាកូនប្រុស ឬកូនស្រីរបស់ពួកគាត់ជារៀងរហូត។
ប៉ុន្តែ គួរឲ្យស្តាយណាស់ មិនមែនគ្រប់គ្នាសុទ្ធតែមានទំនាក់ទំនងប្រភេទនេះ ជាមួយឪពុកម្តាយនៅផែនដីទេ។ ប៉ុន្តែ តាមរយៈព្រះយេស៊ូវ យើងសុទ្ធតែអាចមានព្រះអម្ចាស់ ធ្វើជាឪពុករបស់យើង។ ព្រះគ្រីស្ទនាំអ្នកដើរតាមព្រះអង្គ ចូលក្នុងមហាគ្រួសារនៃព្រះ ហើយ“អស់អ្នកណាដែលព្រះវិញ្ញាណនៃព្រះទ្រង់នាំ អ្នកទាំងនោះហើយជាពួកកូនរបស់ព្រះ” (រ៉ូម ៨:១៤)។ សព្វថ្ងៃនេះ “យើងក៏បានគ្រងមរដកដែរ គឺជាអ្នកគ្រងមរដកនៃព្រះជាមួយនឹងព្រះគ្រីស្ទផង”(ខ.១៧)។ យើងមិននិយាយទៅកាន់ព្រះអង្គ ក្នុងនាមជាបាវបម្រើទេ តែសព្វថ្ងៃនេះ មានសិទ្ធិហៅព្រះអង្គថា “ឱអប្បា ព្រះវរបិតាអើយ” គឺដូចព្រះយេស៊ូវបានហៅព្រះវរបិតា នៅមុនពេលទ្រង់សុគត(ខ.១៥ និងមើល ម៉ាកុស ១៤:៣៦)។
តើអ្នកចង់ឲ្យមាននរណាម្នាក់ស្តាប់អ្នកនិយាយទេ? តើអ្នកមានតម្រូវការអ្វីខ្លះ? ចូរអធិស្ឋានទៅកាន់ព្រះវរបិតា ដែលកំពុងគង់នៅក្នុងផ្ទះដ៏អស់កល្បរបស់អ្នកចុះ។—Mike Wittmer
តើអ្នកមានដំណឹង ឬតម្រូវការអ្វី ដែលអ្នកចូលចិត្តចែកចាយដល់ឪពុកម្តាយខាងសាច់ឈាមរបស់អ្នក? តើអ្នកអាចទូលព្រះវរបិតាដែលគង់នៅស្ថានសួគ៌ អំពីរឿងអ្វីខ្លះ? ព្រះអង្គកំពុងតែស្តាប់អ្នកស្រាប់ហើយ។
ឱព្រះវរបិតា ប្រកបដោយព្រះគុណ ទូលបង្គំសូមអរព្រះគុណព្រះអង្គ ដែលបានប្រទានឯកសិទ្ធិឲ្យទូលបង្គំអាចចូលទៅជួបព្រះអង្គ ដោយការអធិស្ឋាននៅពេលណាក៏បាន។
For further study, read Talking with My Father: Jesus Teaches on Prayer at DiscoverySeries.org/HP171.
គម្រោងអានព្រះគម្ពីររយៈពេល១ឆ្នាំ: យ៉ូប ២៨-២៩ និង កិច្ចការ ១៣:១-២៥
