សាស្តា ១២:១៣-១៤
ពីព្រោះព្រះទ្រង់នឹងនាំគ្រប់ការទាំងអស់មកដើម្បីជំនុំជំរះ ព្រមទាំងអ្វីៗដែលលាក់កំបាំងផង ទោះល្អឬអាក្រក់ក្តី។ សាស្តា ១២:១៤
មានចោរម្នាក់បានលួចចូលក្នុងហាងជួសជុលទូរស័ព្ទមួយកន្លែង ដោយវាយបំបែកទូកញ្ចក់ដាក់តាំងទូរស័ព្ទ ហើយក៏បានចាប់ផ្តើមប្រមូលទូរស័ព្ទ និងសម្ភារៈមួយចំនួនទៀត ចូលក្នុងហោប៉ៅរបស់ខ្លួន។ គាត់បានព្យាយាមលាក់បាំងអត្តសញ្ញាណរបស់គាត់ មិនឲ្យគេមើលមុខគាត់ស្គាល់ ក្នុងកាមេរ៉ាសុវត្ថិភាព ដោយគាត់បានយកប្រអប់ក្រដាសឡាំងមកគ្របក្បាលគាត់។ ប៉ុន្តែ ក្នុងអំឡុងពេលធ្វើសកម្មភាព ក្រដាសឡាំងនោះក៏បានរបើកចេញពីក្បាលគាត់ បានមួយភ្លែត ធ្វើឲ្យគេអាចមើលឃើញមុខគាត់។ ពីរបីនាទីក្រោយមក ក៏បានបើកមើលវីដេអូដែលកាមេរ៉ាសុវត្ថិភាពថតបានសកម្មភាពលួចរបស់ចោរនោះ ហើយក៏បានទូរស័ព្ទប្តឹងប៉ូលិស។ ប៉ូលិសក៏បានចាប់ខ្លួនចោរនោះ នៅក្រៅហាងមួយ នៅក្បែរនោះ។ រឿងនេះបានក្រើនរំឭកយើងថា អំពើបាបនីមួយៗដែលយើងមាន នឹងត្រូវបានបើកបង្ហាញ នៅថ្ងៃណាមួយមិនខាន។
មនុស្សតែងតែព្យាយាមលាក់បាំងបាបរបស់ខ្លួន ដោយសារនិស្ស័យសាច់ឈាមរបស់ពួកគេ។ ប៉ុន្តែ កណ្ឌគម្ពីរសាស្តាបានចែងថា យើងត្រូវស្តាប់បង្គាប់តាមក្រឹត្យវិន័យរបស់ព្រះអម្ចាស់ អំពើបាបទាំងអស់ដែលយើងបានលាក់បាំង នឹងត្រូវបើកបង្ហាញ នៅចំពោះព្រះនេត្រដ៏សុចរិត និងការជំនុំជម្រះដ៏សុចរិតរបស់ព្រះអង្គ(១២:១៤)។ អ្នកនិពន្ធបានសរសេរថា “ចូរកោតខ្លាចដល់ព្រះ ហើយកាន់តាមបញ្ញត្តទ្រង់ចុះ ដ្បិតប៉ុណ្ណេះឯងជាកិច្ចទាំងមូលដែលមនុស្សត្រូវធ្វើ”(ខ.១៣)។ រាល់ការប្រព្រឹត្តទាំងអស់ ដែលក្រឹត្យវិន័យ១០ប្រការបានហាម(លេវីវិន័យ ៤:១៣) នឹងមិនអាចគេចផុតពីការជំនុំជម្រះរបស់ព្រះអង្គបានទេ។ ព្រះទ្រង់នឹងនាំគ្រប់ការទាំងអស់ទៅជំនុំជំរះ ព្រមទាំងអ្វីៗដែលលាក់កំបាំងផង ទោះល្អឬអាក្រក់ក្តី។ ប៉ុន្តែ ដោយសារព្រះគុណព្រះអង្គ យើងអាចរកឃើញការអត់ទោសបាប ក្នុងព្រះយេស៊ូវ និងក្នុងការលះបង់របស់ព្រះអង្គ ដើម្បីយើងរាល់គ្នា(អេភេសូរ ២:៤-៥)។
ពេលណាយើងបានស្គាល់ព្រះរាជបញ្ជារបស់ព្រះអង្គ ហើយកត់ទុកក្នុងចិត្តយើង ការនេះអាចនាំឲ្យយើងកោតខ្លាចព្រះអង្គ និងមានការរស់នៅ ស្របតាមព្រះរាជបញ្ជាព្រះអង្គ។ ចូរយើងថ្វាយបាបរបស់យើងដល់ព្រះអង្គ ហើយដកពិសោធន៍ជាថ្មី ជាមួយព្រះទ័យរបស់ព្រះអង្គ ដែលមានក្តីស្រឡាញ់ និងការអត់ទោស។—Marvin Williams
តើអ្នកអាចបន្តកោតខ្លាចព្រះ យ៉ាងដូចម្តេចខ្លះ? តើធ្វើដូចម្តេច ឲ្យអ្នកអាចនឹកចាំព្រះរាជបញ្ជារបស់ព្រះអង្គ ក្នុងសប្តាហ៍នេះ?
ឱព្រះអម្ចាស់ ទូលបង្គំសូមប្រែចិត្តចេញពីបាប ដែលទូលបង្គំបានលាក់បាំង។
សូមព្រះអង្គទតមើលទូលបង្គំ ដោយព្រះទ័យមេត្តា និងជួយទូលបង្គំរស់នៅ ឲ្យបានត្រឹមត្រូវ នៅចំពោះព្រះអង្គ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៤-៦ និង កិច្ចការ ១៧:១៦-៣៤
