ទំនុកដំកើង ១៣៣
ក៏ធៀបដូចជាទឹកសន្សើមនៅលើភ្នំហ៊ើម៉ូន ដែលធ្លាក់មកលើភ្នំនៃក្រុងស៊ីយ៉ូន។ ទំនុកដំកើង ១៣៣:៣
បណ្ឌិត ទីហ្វែនី ហ្គោលសិន(Dr. Tiffany Gholson) បានឃើញអំពើឧក្រិដ្ឋកម្មកំពុងមានផលប៉ះពាល់តាមរបៀបជាច្រើន មកលើទីក្រុងរបស់គាត់ គឺទីក្រុងសេន លូអ៊ីស ខាងកើត ជាទីក្រុងតូចមួយ នៅរដ្ឋមីសូរី សហរដ្ឋអាមេរិក។ ទោះជាយ៉ាងណាក៏ដោយ នៅឆ្នាំ២០២៣ អំពើឃាតកម្មក្នុងទីក្រុងនេះ បានធ្លាក់ចុះ៣១ភាគរយ ហើយអំពើឧក្រិដ្ឋកម្មជាទូទៅក៏បានថយចុះ៣៧ភាគរយផងដែរ។ តើរឿងនេះបានកើតឡើងដោយរបៀបណា? ការថយចុះនេះ គឺបណ្តាលមកពីការធ្វើការជាដៃគូរ។ អង្គការគ្រីស្ទបរិស័ទមួយ បានសហការជាមួយ ប៉ូលិសរដ្ឋ និងប៉ូលិសទីក្រុង និងសាលារៀន ដើម្បីបង្កើតក្រុមអនុវត្តន៍ច្បាប់ដើម្បីសុវត្ថិភាពសាធារណៈ ដោយរួមកម្លាំងគ្នាបង្កើតឲ្យមានការផ្លាស់ប្តូរ ដើម្បីប្រជាពលរដ្ឋទាំងអស់។
បណ្ឌិត ហ្គោលសិន ក៏បានលើកឡើងថា ការសហការគ្នានេះមានភាពស្អិតរមួត គឺប្រៀបដូចជាការរៀបការជាប្តីប្រពន្ធ ដោយសមាជិកម្នាក់ៗនៃក្រុមការងារនេះរួបរួមគ្នាជាដៃគូ ដើម្បីជួយប្រជាពលរដ្ឋ។ មជ្ឈមណ្ឌលសុខភាពផ្លូវចិត្ត ជាសាលារៀនដែលគាត់កំពុងដឹកនាំ ក៏បានរាប់បញ្ចូលគ្រូបង្រៀន គិលានុបដ្ឋាយិកា និងបុគ្គលិករបស់សាលា នៅក្នុងការជួយទ្រទ្រង់កុមារ ដែលបានទទួលផលប៉ះពាល់ពីអំពើឧក្រឹដ្ឋកម្ម ឬគ្រោះថ្នាក់ផ្សេងៗ។ ភ្នាក់ងារដទៃទៀត ក៏បានផ្តល់ជំនួយផ្សេងៗផងដែរ។ ប៉ូលិសបានប្តេជ្ញាចិត្តថា នឹងធ្វើការសន្ទនាបន្ថែមទៀត ជាមួយប្រជាជននៅតាមដងផ្លូវ ហើយស្តាប់សំណើរបស់ពួកគេ។
ស្តេចដាវីឌ ជាអ្នកនិពន្ធកណ្ឌគម្ពីរទំនុកដំកើងបានពោលថា “មើល ដែលបងប្អូននៅមូលជាមួយគ្នា
ដោយចិត្តព្រមព្រៀង នោះជាការល្អ ហើយសមគួរយ៉ាងណាទៅ”(ទំនុកដំកើង ១៣៣:១)។ ទ្រង់មានបន្ទូលទៀតថា ការរួបរួមគ្នានេះ “ក៏ធៀបដូចជាទឹកសន្សើមនៅលើភ្នំហ៊ើម៉ូន ដែលធ្លាក់មកលើភ្នំនៃក្រុងស៊ីយ៉ូន ដ្បិតនៅទីនោះព្រះយេហូវ៉ាបានប្រទានព្រះពរ គឺជាជីវិតដ៏នៅអស់កល្បជានិច្ច” (ខ.៣)។ ត្រង់ចំណុចនេះ ស្តេចដាវីឌកំពុងមានបន្ទូលសំដៅទៅលើមនុស្សដែលមានជំនឿតែមួយដ៏ត្រឹមត្រូវ ចំពោះព្រះអម្ចាស់។ យើងរួបរួមគ្នាជាធ្លុងមួយ ទោះយើងមាននិន្នាការនយោបាយ និងស្ថិតនៅក្នុងក្រុមផ្សេងគ្នាក៏ដោយ។ ការរួបរួមនេះអាចពិបាកកើតមាន តែនឹងធ្វើជាព្រះពរដល់មនុស្សទាំងអស់។ គោលដៅដ៏ប្រសើររបស់អ្នកជឿ គឺត្រូវបង្ហាញការយកចិត្តទុកដាក់ចំពោះគ្នាទៅវិញទៅមក ជាពិសេស ក្នុងទីក្រុង ដែលកំពុងស្រេកឃ្លានសេចក្តីស្រឡាញ់របស់ព្រះយេស៊ូវ។—Patricia Raybon
តើអ្នកមើលឃើញកន្លែងណាខ្លះ កំពុងខ្វះការរួបរួមគ្នា? តើព្រះអម្ចាស់អាចបណ្តាលចិត្តអ្នកដូចម្តេចខ្លះ
ដើម្បីឲ្យអ្នកលើកកម្ពស់ការរួបរួមគ្នា ដោយបង្ហាញចេញនូវសេចក្តីជំនឿ?
ឱព្រះវរបិតា សូមព្រះអង្គជួយទូលបង្គំ ដោយអំណាចនៃព្រះវិញ្ញាណព្រះអង្គ ដើម្បីឲ្យមានការរួបរួម ក្នុងសហគមន៍របស់ទូលបង្គំ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១០-១២ និង កិច្ចការ ១៩:១-២០
