អ្នកបញ្ចប់កិច្ចការក្នុងព្រះគ្រីស្ទ
ដោយKirsten Holmberg
August 3, 2024
១ពង្សាវតាក្សត្រ ១៩:១៤-២១
តែអ្នករាល់គ្នាជាពូជជ្រើសរើស ... ដើម្បីឲ្យអ្នករាល់គ្នាបានសំដែងចេញ ឲ្យឃើញអស់ទាំងលក្ខណៈរបស់ព្រះ។ ១ពេត្រុស ២:៩
អ្នកស្រីបាបារ៉ា(Barbara) បានចាក់អាវរងា ឲ្យចៅប្រុសគាត់ ឈ្មោះ អីធិន(Ethan)។ តែគាត់ក៏បានលាចាកលោក មុនពេលគាត់អាចបញ្ចប់កិច្ចការនេះ។ គេក៏បានយកអាវរងាដែលចាក់មិនទាន់ហើយនោះ ទៅឲ្យមនុស្សម្នាក់ទៀត ដែលចូលចិត្តចាក់អាវ ដើម្បីបន្តកិច្ចការនេះឲ្យរួចរាល់។ កិច្ចការនេះអាចបន្តទៅបាន ដោយសារអង្គការមួយមានបណ្ដាញជាមួយសិប្បករ ជាអ្នកស្ម័គ្រចិត្ត ធ្វើជា “អ្នកបញ្ចប់កិច្ចការ” ឲ្យមនុស្សជាទីស្រឡាញ់របស់គ្រួសារណាមួយ ដែលបានលាចាកលោក មុនពេលពួកគេអាចបញ្ចប់កិច្ចការនោះ។ “អ្នកបញ្ចប់កិច្ចការ”ទាំងនោះ បានលះបង់ពេលវេលា និងជំនាញ ដើម្បីបញ្ចប់កិច្ចការ ដែលនាំមកនូវការកម្សាន្តចិត្តដល់ក្រុមគ្រួសារដែលកំពុងកាន់ទុក្ខ។
នៅគ្រាសញ្ញាចាស់ ព្រះអម្ចាស់ក៏បានតែងតាំង “អ្នកបញ្ចប់កិច្ចការម្នាក់” សម្រាប់លោកអេលីយ៉ាផងដែរ។ កាលនោះ លោកហោរាកំពុងស្ថិតក្នុងភាពឯកោ និងបាក់ទឹកចិត្ត ដោយសារពួកអ៊ីស្រាអែលបដិសេធន៍សេចក្តីសញ្ញារបស់ព្រះអង្គ ហើយកំពុងកាប់សម្លាប់ពួកហោរារបស់ព្រះអង្គ។ ព្រះអម្ចាស់ក៏បានឆ្លើយតបចំពោះបញ្ហានេះ ដោយបង្គាប់គាត់ឲ្យទៅចាក់ប្រេងតាំងលោកអេលីសេ ធ្វើជាអ្នកស្នងការងាររបស់គាត់ ជាហោរា(១ពង្សាវតាក្សត្រ ១៩:១៦)។ ការនេះបានធានាថា ការងារប្រកាសសេចក្តីពិតរបស់ព្រះ នឹងនៅតែបន្ត បន្ទាប់ពីលោកអេលីយ៉ាលាចាកលោក។
ដើម្បីបង្ហាញលោកអេលីសេថា ព្រះអម្ចាស់បានត្រាស់ហៅគាត់ ឲ្យស្នងតំណែងលោកអេលីយ៉ា ធ្វើជាហោរារបស់ព្រះអម្ចាស់ លោកអេលីយ៉ាក៏បានបោះក្រមា ទៅលើខ្លួនលោកអេលីសេ(ខ.១៩)។ ដោយសារក្រមារបស់ហោរា ជាតំណាងឲ្យអំណាចរបស់គាត់ ជាអ្នកនាំព្រះរាជសារដែលព្រះអង្គបានជ្រើសរើស(២ពង្សាវតាក្សត្រ ២:៨) នោះលោកអេលីសេក៏បានដឹងច្បាស់ថា ព្រះអម្ចាស់ពិតជាបានត្រាស់ហៅខ្លួនឲ្យធ្វើជាហោរា។
ក្នុងនាមយើងជាអ្នកជឿព្រះយេស៊ូវ ព្រះអង្គបានត្រាស់ហៅយើងឲ្យចែកចាយសេចក្តីស្រឡាញ់របស់ព្រះអង្គ ដល់អ្នកដទៃ ហើយសរសើរដំកើងព្រះអង្គ ឲ្យគេបានស្គាល់ព្រះអង្គ(២ពង្សាវតាក្សត្រ ២:៩)។ បើយើងមិនអាចបញ្ចប់កិច្ចការនេះបាន មុនពេលយើងលាចាកលោក យើងអាចទុកចិត្តថា ព្រះអង្គនឹងទ្រទ្រង់កិច្ចការនេះ ហើយនឹងបន្តត្រាស់ហៅ អ្នកផ្សេង ឲ្យបន្តការងារប្រកាសព្រះបន្ទូល ឲ្យគេស្គាល់ព្រះអង្គ។—Kirsten Holmberg
តើនរណាបានប្រកាសសេចក្តីពិតរបស់ព្រះ ឲ្យអ្នកបានស្គាល់ព្រះអង្គ? តើអ្នកអាចរួមចំណែកក្នុងការងារនាំលោកិយឲ្យស្គាល់ព្រះអង្គ ដោយរបៀបណា?
ឱព្រះវរបិតា សូមព្រះអង្គប្រើទូលបង្គំ ឲ្យរួមចំណែក ក្នុងការសម្រេចកិច្ចការព្រះអង្គ ក្នុងលោកិយនេះ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៦៣-៦៥ និង រ៉ូម ៦