ម៉ាកុស ៦:១-៦
អ្នកទាំងនោះក៏អាក់អន់ចិត្តនឹងទ្រង់។ ម៉ាកុស ៦:៣
លោកចន(Jon) បានទទួលការតែងតាំងជាសាស្ដាចារ្យ ធ្វើការពេញពេល ក្នុងមហាវិទ្យាល័យដ៏ល្បីល្បាញមួយ។ លោកដាវីឌ ជាបងប្រុសរបស់គាត់ មានចិត្តរីករាយចំពោះគាត់ ប៉ុន្តែ មិនអាចឃាត់ចិត្តខ្លួនឯង មិនឲ្យនិយាយបង្អាប់លោកចន អំពីរឿងដែលពួកគេធ្លាប់បោកចំបាប់គ្នានៅលើដី កាលពីក្មេង។ លោកចនមានភាពថ្កុំថ្កើងក្នុងជីវិត ប៉ុន្តែ គាត់នៅតែជាប្អូនប្រុសរបស់លោកដាវីឌ។
ពេលខ្លះសាច់ញាតិរបស់យើងមិនងាយមានចិត្តស្ញប់ស្ញែង ចំពោះភាពជោគជ័យរបស់យើង ហើយសូម្បីតែព្រះមែស៊ីក៏ធ្លាប់ជួបរឿងនេះផងដែរ។ ព្រះយេស៊ូវបានចម្រើនវ័យធំឡើង ក្នុងចំណោមប្រជាជននៅស្រុកណាសារ៉ែត ដូចនេះ ពួកគេពិបាកនឹងជឿថា ព្រះអង្គមានអ្វីដែលពិសេសខុសពីធម្មតា។ ប៉ុន្តែ ពួកគេមានការភ្ញាក់ផ្អើល ចំពោះការអ្វីដែលព្រះអង្គបានធ្វើ និងមានបន្ទូល។ បានជាពួកគេសួរគ្នាទៅវិញទៅមកថា “អ្នកនេះបានសេចក្តីទាំងនេះពីណាមក ចំណេះណាហ្ន ដែលបានឲ្យមកគាត់ បានជាមានការឫទ្ធិបារមីយ៉ាងនេះកើតមក ដោយសារដៃគាត់ដូច្នេះ តើគាត់មិនមែនជាជាងឈើ ជាកូននៃនាងម៉ារា…ទេឬអី?”(ម៉ាកុស ៦:២-៣)។ ព្រះយេស៊ូវក៏បានមានបន្ទូលកត់សំគាល់ថា “ហោរាមិនមែនឥតគេរាប់អានទេ លើកតែនៅក្នុងស្រុកខ្លួន ឬក្នុងពួកញាតិសន្តាន ហើយនៅក្នុងផ្ទះខ្លួនចេញ”(ខ.៤)។ អ្នកទាំងនោះស្គាល់ព្រះយេស៊ូវច្បាស់ ប៉ុន្តែ ពួកគេមិនអាចជឿទេថា ព្រះអង្គជាព្រះរាជបុត្រានៃព្រះ។
ទោះអ្នកធ្លាប់បានទទួលការចិញ្ចឹមបីបាច់ក្នុងគ្រួសារដែលកោតខ្លាចព្រះឬអត់ ឬធ្លាប់បានទៅព្រះវិហារ ច្រៀងសរសើរព្រះ កាលពីក្មេងឬអត់ ព្រះយេស៊ូវតែងតែចាត់ទុកអ្នកជាសមាជិកគ្រួសាររបស់ព្រះអង្គ បើសិនជាអ្នកជឿ និងដើរតាមព្រះអង្គ។ ព្រះអង្គមិនខ្មាសអៀន នៅក្នុងការហៅយើងថា បងប្អូនរបស់ព្រះអង្គឡើយ (ហេព្រើរ ២:១១)។ ព្រះយេស៊ូវជាបងប្រុសរបស់យើង ក្នុងមហាគ្រួសារនៃព្រះ(រ៉ូម ៨:២៩)។ នេះជាឯកសិទ្ធិដ៏អស្ចារ្យ ប៉ុន្តែ ភាពជិតស្និទ្ធដែលយើងមានជាមួយព្រះអង្គ អាចធ្វើឲ្យយើងមានអារម្មណ៍ថា ព្រះអង្គហាក់ដូចជាគ្មានអ្វីប្លែកសម្រាប់យើង។ ប៉ុន្តែ ដោយសារនរណាម្នាក់ស្ថិតក្នុងគ្រួសារតែមួយជាមួយយើង គឺមិនមានន័យថា ពួកគេមិនពិសេសចំពោះយើងនោះទេ។
តើអ្នកមិនសប្បាយចិត្តទេឬ ពេលដែលបានដឹងថា ព្រះយេស៊ូវជាបងប្រុសរបស់យើង ហើយលើសពីបងប្រុសផង? ចូរយើងមានទំនាក់ទំនងផ្ទាល់ខ្លួនជាមួយព្រះអង្គ ដោយចាត់ទុកព្រះអង្គជាបុគ្គលពិសេសក្នុងជីវិតយើង ខណៈពេលដែលយើងដើរតាមព្រះអង្គ ជារៀងរាល់ថ្ងៃ។—Mike Wittmer
តើព្រះយេស៊ូវមានទំនាក់ទំនងជាមួយអ្នកដោយផ្ទាល់ខ្លួន ដូចម្តេចខ្លះ? តើធ្វើដូចម្តេចឲ្យអ្នកនៅតែចាត់ទុកព្រះអង្គ ជាបុគ្គលពិសេស?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការនាំទូលបង្គំចូលមហាគ្រួសាររបស់ព្រះ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៩៤-៩៦ និង រ៉ូម ១៥:១៤-៣៣
