១កូរិនថូស ៣:៣-៩
ដ្បិតយើងរាល់គ្នាជាអ្នកធ្វើការជាមួយនឹងព្រះ ឯអ្នករាល់គ្នាជាស្រែដែលព្រះទ្រង់ភ្ជួរ ហើយជាផ្ទះដែលព្រះទ្រង់ធ្វើ។ ១កូរិនថូស ៣:៩
កាលពីថ្ងៃទី២៩ ខែមិថុនា ឆ្នាំ១៩៥៥ សហរដ្ឋអាមេរិកបានប្រកាស អំពីគោលបំណងរបស់ខ្លួន ដែលចង់បង្ហោះផ្កាយរណប ចូលទៅក្នុងគន្លង ក្នុងទីអវកាស។ មិនយូរប៉ុន្មាន សហភាពសូវៀតក៏បានប្រកាស អំពីផែនការបាញ់បង្ហោះផ្កាយរណបរបស់ខ្លួនផងដែរ។ ការប្រកួតប្រជែងក្នុងវិស័យអវកាសក៏បានចាប់ផ្តើម តាំងពីពេលនោះមក។ សហភាពសូវៀតក៏បានបាញ់បង្ហោះផ្កាយរណបដំបូងបំផុត(ឈ្មោះ ស្ពុតនីក) ហើយក៏បានបញ្ជូនមនុស្សដំបូងបំផុត ចូលទៅក្នុងទីអវកាស ដែលនៅពេលនោះ លោកយូរី ហ្កាហ្ការីន(Yuri Gagarin) បានធ្វើដំណើរក្នុងទីអវកាសក្រឡឹងជុំវិញផែនដីបានមួយជុំ។ ការប្រកួតប្រជែងនេះបានបន្តរហូតដល់ថ្ងៃទី២០ ខែកក្កដា ឆ្នាំ១៩៦៩ នៅពេលដែលលោកនេល អាមស្រ្តង(Neil Armstrong’s) បានក្លាយជាមនុស្សទីមួយ ដែលបានជាន់ស្ថានព្រះច័ន្ទ ដែលការនេះក៏បានបញ្ចប់ការប្រកួតប្រជែងនេះជាផ្លូវការ។ រដូវកាលនៃការសហការគ្នារវាងប្រទេសទាំងពីរ ក៏បានចាប់ផ្តើម ដែលនាំឲ្យមានការសាងសង់ស្ថានីយអវកាសអន្តរជាតិ។
ជួនកាល ការប្រកួតប្រជែងអាចមានប្រយោជន៍ ត្រង់ចំណុចដែលថា វាជំរុញយើងឲ្យសម្រេចបានការអ្វី ដែលយើងមិនអាចធ្វើបាន បើសិនជាគ្មានការប្រកួតប្រជែងទេនោះ។ ទោះជាយ៉ាងណាក៏ដោយ ការប្រកួតប្រជែងនាំឲ្យមានការបំផ្លាញគ្នាទៅវិញទៅមក។ នេះជាបញ្ហាដែលបានកើតឡើង ក្នុងពួកជំនុំនៅទីក្រុងកូរិនថូស ខណៈពេលដែលពួកគេបានចែកបក្សពួក ដោយក្រុមនីមួយៗបានប្រជែងគ្នាលើកដំកើងអ្នកដឹកនាំខុសៗគ្នា ធ្វើជាពន្លឺនៃក្តីសង្ឃឹមរបស់ខ្លួន។ សាវ័កប៉ុលបានព្យាយាមលើកយកបញ្ហានេះមកចែកចាយ ក្នុងសំបុត្ររបស់គាត់ ដោយបង្រៀនពួកគេថា “ហេតុនោះបានជាអ្នកសាបព្រោះ និងអ្នកដែលស្រោច នោះមិនមែនជាអ្វីទេ ស្រេចនឹងព្រះដែលធ្វើឲ្យដុះវិញទេតើ”(១កូរិនថូស ៣:៧) ហើយគាត់ក៏បាននិយាយបង្រួមន័យថា យើងរាល់គ្នាជាអ្នកធ្វើការជាមួយព្រះ (ខ.៩)។
យើងសុទ្ធតែជាអ្នកធ្វើការជាមួយព្រះអង្គ ដូចនេះ យើងត្រូវរួបរួមគ្នា មិនមែនជាគូរប្រជែងឡើយ។ ហើយក៏មិនគ្រាន់តែធ្វើការជាមួយគ្នា តែក៏ធ្វើការជាមួយព្រះអង្គផងដែរ។ តាមរយៈការប្រទានអំណាច និងការដឹកនាំរបស់ព្រះអង្គ យើងអាចបម្រើព្រះអង្គជាមួយគ្នា ក្នុងនាមជាដៃគូដំណឹងល្អរបស់ព្រះយេស៊ូវ ដើម្បីថ្វាយព្រះកិត្តិនាមដល់ព្រះអង្គ មិនមែនដើម្បីលើកតម្កើងខ្លួនឯងនោះទេ។—Bill Crowder
តើអ្នកបានជួបការប្រកួតដ៏គ្រោះថ្នាក់នៅពេលណា តើវាមានលក្ខណៈដូចម្តេចខ្លះ? តើព្រះយេស៊ូវបានជួយអ្នកឲ្យបន្ទាបខ្លួនបម្រើអ្នកដទៃ ដូចម្តេចខ្លះ?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការប្រទានឯកសិទ្ធិក្នុងការបម្រើព្រះអង្គ។ សូមព្រះអង្គបង្រៀនទូលបង្គំ ឲ្យស្គាល់តម្លៃនៃការធ្វើការ ដើម្បីថ្វាយព្រះកិត្តិនាមដល់ព្រះអង្គ និងដើម្បីជួយអ្នកដទៃ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១១៩:១-៨៨ និង ១កូរិនថូស ៧:២០-៤០
