ឆ្លងកាត់វាលរហោស្ថានខាងវិញ្ញាណ
ដោយAlyson Kieda
August 25, 2024
ចោទិយកថា ២:១-៧
ដ្បិតព្រះយេហូវ៉ាជាព្រះនៃឯង ... ទ្រង់ក៏ស្គាល់ផ្លូវដែលឯងបានដើរក្នុងទីរហោស្ថានសំបើមនេះផង។ ចោទិយកថា ២:៧
កាលខ្ញុំនៅមានភាពក្មេងខ្ចីក្នុងជំនឿ ខ្ញុំយល់ឃើញថា ពេលណាខ្ញុំបានដកពិសោធន៍ភាពរំភើបរីករាយបំផុត ក្នុងព្រះវត្តមានព្រះអង្គ ក្នុងកំរិតខ្ពស់ដូចកំពូលភ្នំ នោះមានន័យថា ខ្ញុំបានជួបជាមួយព្រះយេស៊ូវ។ ប៉ុន្តែការមានអារម្មណ៍រំភើបក្នុងកំរិតខ្ពស់ដូចនេះ កម្រកើតមាន ហើយក៏កម្រនាំឲ្យមានការលូតលាស់ខាងវិញ្ញាណ។ អ្នកនិពន្ធឈ្មោះ លីណា អាប៊ូចាំរ៉ា(Lina AbuJamra) បានមានប្រសាសន៍ថា កន្លែងដែលយើងជួបព្រះ ហើយមានការរីកលូតលាស់ គឺមានលក្ខណៈដូចវាលរហោស្ថាន មិនមែនមានកំរិតខ្ពស់ដូចកំពូលភ្នំនោះទេ។ ក្នុងសៀវភៅដែលគាត់បាននិពន្ធមានចំណងជើងថា ការសិក្សាព្រះបន្ទូលក្នុងវាលរហោស្ថាន គាត់បានពិពណ៌នាថា “គោលបំណងរបស់ព្រះ គឺដើម្បីប្រើវាលរហោស្ថាន ក្នុងជីវិតយើង ដើម្បីជួយឲ្យយើងកាន់តែរឹងមាំឡើង។ ព្រះអង្គប្រទានសេចក្តីល្អរបស់ព្រះអង្គមកដល់យើង នៅពេលដែលយើងមានការឈឺចាប់ ហើយមិនមែនទាល់តែយើងគ្មានការឈឺចាប់នោះទេ”។
កន្លែងដែលពិបាកបំផុត ដែលមានទុក្ខព្រួយ ការបាត់បង់ និងការឈឺចាប់ គឺជាកន្លែងដែលព្រះអង្គជួយយើងឲ្យលូតលាស់ ក្នុងជំនឿ ហើយកាន់តែមានភាពជិតស្និទ្ធជាមួយព្រះអង្គ។ ការលំបាក និងបញ្ហាប្រឈម ប្រៀបដូចការធ្វើដំណើរក្នុងវាលរហោស្ថាន មិនបានកើតឡើងដោយចៃដន្យ ឬគ្មានន័យអ្វី ក្នុងផែនការរបស់ព្រះនោះទេ តែជាផ្នែកមួយដ៏សំខាន់ ក្នុងដំណើរការនៃការលូតលាស់របស់យើង។
នៅគ្រាសញ្ញាចាស់ ព្រះអម្ចាស់បានដឹកនាំពួកព្ធយុកោនៃសាសន៍អ៊ីស្រាអែលជាច្រើននាក់ចូលវាលរហោស្ថាន។ លោកអ័ប្រាហាំ លោកអ៊ីសាក និងលោកយ៉ាកុប គឺសុទ្ធតែធ្លាប់ឆ្លងកាត់វាលរហោស្ថាន។ វាលរហោស្ថាន ជាកន្លែងដែលព្រះអម្ចាស់បានរៀបចំចិត្តរបស់លោកម៉ូសេ និងត្រាស់ហៅគាត់ឲ្យដឹកនាំរាស្រ្តព្រះអង្គ ចេញពីភាពជាទាសករ ក្នុងទឹកដីអេស៊ីព្ទ(និក្ខមនំ ៣:១-២,៩-១០)។ ហើយវាលរហោស្ថាន ក៏ជាកន្លែងដែលព្រះអង្គដឹកនាំការធ្វើដំណើររបស់ពួកអ៊ីស្រាអែល អស់រយៈពេល៤០ឆ្នាំ ដោយជំនួយ និងការដឹកនាំរបស់ព្រះអង្គ(ចោទិយកថា ២:៧)។
ព្រះអម្ចាស់បានយាងទៅជាមួយលោកម៉ូសេ និងពួកអ៊ីស្រាអែលគ្រប់ជំហាន ក្នុងដំណើរឆ្លងកាត់វាលរហោស្ថាន ហើយព្រះអង្គក៏យាងទៅជាមួយអ្នក និងខ្ញុំផងដែរ។ វាលរហោស្ថាន ជាកន្លែងដែលយើងរៀនពឹងផ្អែកលើព្រះអង្គ ជាកន្លែង ដែលព្រះអង្គជួបជាមួយយើង ហើយជួយយើងឲ្យចម្រើនឡើង។—Alyson Kieda
តើព្រះអម្ចាស់បានជួបជាមួយអ្នក ក្នុងវាលរហោស្ថានខាងវិញ្ញាណ នៅពេលណា? តើអ្នកបានទទួលលទ្ធផលអ្វីខ្លះ ពីការជួបយ៉ាងដូចនេះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានគង់នៅជាមួយទូលបង្គំ ក្នុងពេលដ៏ពិបាកនៃជីវិតរបស់ទូលបង្គំ ដូចការឆ្លងកាត់វាលរហោស្ថាន។ ព្រះអង្គស្មោះត្រង់ ហើយមានសេចក្តីអាណិត។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១១៩:៨៩-១៧៦ និង ១កូរិនថូស ៨