សាស្តា ៥:១៣-២០
មានការអាក្រក់យ៉ាងធ្ងន់១មុខ ដែលយើងបានឃើញនៅក្រោមថ្ងៃ គឺមានទ្រព្យសម្បត្តិដែលម្ចាស់រក្សាទុកដរាបដល់កើតអន្តរាយដល់ខ្លួន។ សាស្តា ៥:១៣
ក្នុងខ្សែភាពយន្តចំណាស់មួយ មានចំណងជើងថា លោកខេន មិនមែនជាពលរដ្ឋធម្មតា លោកឆាលី ហ្វូស្ទ័រ ខេន(Charlie Foster Kane) រកបានទ្រព្យសម្បត្តិច្រើនសន្ធឹក និងក្លាយជាអ្នកមានអំណាច តាមរយៈការពង្រីកមុខជំនួញផ្នែកសារព័ត៌មានរបស់គាត់។ ក្នុងរឿងមួយ ដែលបានឆ្លុះបញ្ចាំងបទគម្ពីរសាស្តា ២:៤-១១ លោកខេន បានស្វែងរកការសប្បាយគ្រប់យ៉ាង ដោយបានសាងសង់ប្រាសាទ ដែលមានសួនច្បារធំៗ មានពេញទៅដោយស្នាដៃសិល្បៈដ៏មានតម្លៃ។
អ្វីដែលលោកខេនពិតជាចង់បាននោះ គឺការលើកដំកើងខ្លួនឯង មិនខុសពីមហាសេដ្ឋីដទៃទៀតឡើយ។ គាត់បានចំណាយធនធានរបស់គាត់ ក្នុងការប្រកួតប្រជែងក្នុងឆាកនយោបាយ ហើយនៅពេលដែលគាត់ទទួលបរាជ័យ ដើម្បីបិទបាំងភាពអាមាសរបស់ខ្លួន គាត់ក៏បានចោទប្រកាន់គូរប្រកួតថា បានកេងបន្លំសន្លឹកឆ្នោត។ ដើម្បីឲ្យគេស្ញប់ស្ញែងគាត់ គាត់ក៏បានសាងសង់សាលមហោស្រពអូប៉េរ៉ា សម្រាប់ភរិយារបស់គាត់ ហើយក៏បានបង្ខំនាងឲ្យប្រលូកក្នុងអាជីពជាអ្នកចម្រៀង ដែលមិនសក្តិសមនឹងទេពកោសល្យរបស់នាង។ ត្រង់ចំណុចនេះ រឿងរបស់លោកខេនក៏បានធ្វើឲ្យយើងនឹកចាំបទគម្ពីរសាស្តា ដែលក្នុងនោះ ទ្រព្យសម្បត្តិនាំមកនូវគ្រោះថ្នាក់ ដល់មនុស្សដែលដេញតាម និងបង្គរវាទុក(៩:១០-១៥) ដោយត្រូវរោយរៀវទៅក្នុងសេចក្តីងងឹត ក៏កើតមានទុក្ខព្រួយច្រើន(៥:១៧)។ នៅចុងបញ្ចប់នៃជីវិតរបស់លោកខេន គាត់ត្រូវរស់នៅតែម្នាក់ឯង នៅក្នុងប្រាសាទ ដោយសេចក្តីកំហឹង។
រឿងរបស់លោកខេន បានបញ្ចប់ ដោយបើកបង្ហាញការពិតដែលថា ការដេញតាមទ្រព្យសម្បត្តិ និងភាពល្បីល្បាញរបស់លោកខេន គឺគ្រាន់តែបានធ្វើឲ្យចិត្តគាត់មានចន្លោះប្រហោងកាន់តែធំឡើង ដែលរាប់បញ្ចូលទាំងការបាត់បង់សេចក្តីស្រឡាញ់ពីឪពុកម្តាយ តាំងពីក្មេងមក។ កណ្ឌគម្ពីរសាស្តាក៏បានបង្រៀនយើងអំពីបញ្ហានេះផងដែរ។ ព្រះវរបិតានៃយើងបានបណ្តាលចិត្តយើង ឲ្យមានក្តីសង្ឃឹមដល់អស់កល្បទៅមុខ(៣:១១) ហើយជីវិតរបស់យើងអាចមានក្តីអំណរពិតប្រាកដបាន ដោយសារព្រះអង្គប៉ុណ្ណោះ(២:២៥)។ រឿងរបស់លោកខេន បានដាស់តឿនយើងរាល់គ្នាឲ្យមានការប្រុងប្រយ័ត្នក្នុងការរស់នៅ ដោយប្រាប់យើង មិនឲ្យស្វែងរកការស្កប់ចិត្ត ឬភាពពេញលេញខាងវិញ្ញាណ តាមរយៈទ្រព្យសម្បត្តិ និងកេរ្តិ៍ឈ្មោះឡើយ តែតាមរយៈព្រះមួយអង្គដែលចាក់បង្ហូរសេចក្តីស្រឡាញ់របស់ព្រះអង្គ ចូលក្នុងចិត្តយើង(រ៉ូម ៥:៥)។—Sheridan Voysey
តើអ្នកកំពុងយកតម្រាប់តាមលោកឆាលី ខេន ដោយមិនដឹងខ្លួនដែរឬទេ? តើអ្នកមានសេចក្តីត្រូវការខាងវិញ្ញាណអ្វីខ្លះ ដែលត្រូវការឲ្យព្រះទ្រង់បំពេញឲ្យ នៅថ្ងៃនេះ?
ឱព្រះនៃសេចក្តីស្រឡាញ់ សូមព្រះអង្គអត់ទោសឲ្យទូលបង្គំ ដែលចង់ស្វែងរកការស្កប់ចិត្ត តាមរយៈទ្រព្យសម្បត្តិ និងការសរសើររបស់មនុស្ស។ មានតែព្រះអង្គទេ ដែលអាចបំពេញតម្រូវការខាងវិញ្ញាណរបស់ទូលបង្គំបាន។
Visit ODBU.org/OT022 to understand the book of Ecclesiastes better.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១៣២-១៣៤ និង ១កូរិនថូស ១១:១៧-៣៤
