យ៉ូស្វេ ៣:៧-១៧
កាលណាទៅដល់មាត់ទឹកទន្លេយ័រដាន់ហើយ នោះត្រូវចុះទៅឈរនៅក្នុងទឹកនោះទៅ។ យ៉ូស្វេ ៣:៨
គ្រូគង្វាលម្នាក់បានមកអធិប្បាយព្រះបន្ទូល ក្នុងលក្ខណៈជាភ្ញៀវរបស់ព្រះវិហារមួយកន្លែង។ គាត់បានចែកចាយអំពីប្រាជ្ញា នៅក្នុងការទុកចិត្តព្រះ ហើយបោះជំហានទៅមុខ ដោយចិត្តក្លាហាន។ គាត់បានចែកចាយទីបន្ទាល់របស់គ្រូគង្វាលម្នាក់ ដែលបានទុកចិត្តព្រះ ហើយបានសម្រេចចិត្តចែកចាយតែសេចក្តីពិតដែលមានចែងក្នុងព្រះគម្ពីរប៊ីប ក្នុងការអធិប្បាយព្រះបន្ទូល ទោះច្បាប់ក្នុងប្រទេសគាត់បានហាមយ៉ាងណាក៏ដោយ។ គេក៏បានកាត់ទោសគាត់ ពីបទញុះញង់ឲ្យមានការរើសអើង ហើយក៏បានជាប់គុកអស់រយៈពេល៣០ថ្ងៃ។ ប៉ុន្តែ គាត់ក៏បានប្តឹងឧទរ ហើយតុលាការក៏បានសម្រេចឲ្យគាត់មានសិទ្ធិក្នុងការចែកចាយព្រះបន្ទូល តាមការកាត់ស្រាយផ្ទាល់ខ្លួន និងមានសិទ្ធិជំរុញអ្នកដទៃឲ្យដើរតាមព្រះបន្ទូលព្រះ។
នៅគ្រាសញ្ញាចាស់ ពួកសង្ឃដែលមានតួនាទីសែងហិបសញ្ញា ក៏ត្រូវធ្វើការសម្រេចចិត្តផ្ទាល់ខ្លួនផងដែរថា ពួកគេត្រូវបោះជំហានចូលទៅក្នុងទឹកទន្លេ ឬបន្តឈរនៅលើច្រាំងទន្លេ។ បន្ទាប់ពីប្រជាជនអ៊ីស្រាអែលបានភៀសខ្លួនចេញពីទឹកដីអេស៊ីព្ទមក ពួកគេបានរស់នៅវិលវល់ក្នុងវាលរហោស្ថានអស់រយៈពេល៤០ឆ្នាំ។ ទីបំផុតពួកគេក៏បានឈរនៅមាត់ច្រាំងទន្លេយ័រដាន់ ដែលកំពុងមានទឹកជន់ជោរ។ ប៉ុន្តែ ពួកគេបានបោះជំហានទៅមុខចូលទៅក្នុងទឹកទន្លេ ហើយព្រះអម្ចាស់ក៏បានធ្វើឲ្យទឹកស្រក។ គឺដូចមានសេចក្តីចែងថា “ពួកសង្ឃដែលសែងហិប បានមកដល់ទន្លេយ័រដាន់ ក៏ដាក់ជើងចុះទៅក្នុងទឹកនៅមាត់ទន្លេ … នោះទឹកដែលហូរចុះពីលើមក ក៏ឈប់នៅនឹង”(យ៉ូស្វេ ៣:១៥-១៦)។
ពេលណាយើងថ្វាយជីវិតយើងដាច់ដល់ព្រះអង្គ ព្រះអង្គនឹងប្រទានយើងនូវសេចក្តីក្លាហាន ដើម្បីបោះជំហានទៅមុខ ទោះនោះជាការសម្រេចចិត្តចែកចាយសេចក្តីពិតក្នុងព្រះគម្ពីរប៊ីប ឬបោះជំហានចូលទៅក្នុងទឹកដីដែលអ្នកមិនស្គាល់ក៏ដោយ។ ក្នុងអំឡុងពេលនៃការកាត់ទោសគ្រូគង្វាលរូបនោះ គាត់ក៏បានឆ្លៀតឱកាសចែកចាយអត្ថន័យនៃដំណឹងល្អ ក្នុងមនុស្សទាំងអស់នៅក្នុងបន្ទប់កាត់ក្តី។ ហើយក្នុងកណ្ឌគម្ពីរយ៉ូស្វេ ពួកអ៊ីស្រាអែលបានឆ្លងទន្លេយ័រដាន់ចូលទឹកដីសន្យាដោយជោគជ័យ ហើយក៏បានចែកចាយ អំពីព្រះចេស្តារបស់ព្រះ ទៅដល់មនុស្សជំនាន់ក្រោយ(ខ.១៧ ៤:២៤)។
ពេលណាយើងបោះជំហានទៅក្រៅ ដោយជំនឿ ព្រះអង្គនឹងចាត់ចែងការអ្វីផ្សេងទៀត។—Alyson Kieda
តើនៅពេលណា អ្នកបានប្រឈមមុខដាក់ស្ថានភាពគួរឲ្យភ័យខ្លាច ហើយមិនហ៊ានចាប់ផ្តើមបោះជំហានទីមួយ? តើព្រះអម្ចាស់បានជួយអ្នកបោះជំហានទៅមុខ ដោយរបៀបណា?
ឱព្រះអម្ចាស់ សូមព្រះអង្គប្រទានទូលបង្គំ នូវចិត្តក្លាហាន។ សូមព្រះអង្គជួយទូលបង្គំបោះជំហានចេញទៅក្រៅ ដោយជំនឿ។
For further study, read When Fear Seems Overwhelming at DiscoverySeries.org/CB031.
គម្រោងអានព្រះគម្ពីររយៈពេល១ឆ្នាំ: សុភាសិត ១-២ និង ១កូរិនថូស ១៦
