ម៉ាថាយ ១៦:១៣-១៩
ខ្ញុំប្រាប់អ្នកថា អ្នកឈ្មោះពេត្រុស ខ្ញុំនឹងតាំងពួកជំនុំខ្ញុំនៅលើថ្មដានេះ។ ម៉ាថាយ ១៦:១៨
មានពេលមួយ អគ្គីភ័យបានបំផ្លិចបំផ្លាញព្រះវិហារបាទីស្ទបាលសូរ៉ា ខ្ទេចគ្មានសល់។ ខណៈពេលដែលភ្នាក់ងារពន្លត់អគ្គីភ័យ និងសមាជិកសហគមន៍ កំពុងជួបជុំគ្នា បន្ទាប់ពីការឆាប់ឆេះមានការថមថយ ពួកគេមានការភ្ញាក់ផ្អើល ពេលដែលបានឃើញឈើឆ្កាងដែលត្រូវភ្លើងឆេះ ជាមួយអគារព្រះវិហារ នៅតែឈរមាំ នៅក្នុងកំសួលផ្សែង និងផេះដែលកំពុងហុយតាមខ្យល់។ អ្នកពន្លត់អគ្គីភ័យម្នាក់បានរៀបរាប់ថា “វាជារឿងចម្លែក ដែលអគ្គីភ័យបានបំផ្លាញសំណង់អគារទាំងស្រុង ប៉ុន្តែ មិនបានបំផ្លាញឈើឆ្កាង។ រឿងនេះបានធ្វើឲ្យខ្ញុំនឹកចាំថា អគារព្រះវិហារគ្រាន់តែជាទីកន្លែងជួបជុំបណ្តោះអាសន្ន ប៉ុន្តែ ពួកជំនុំជាសហគមន៍នៃអ្នកជឿដែលស្ថិតស្ថេរអស់កល្ប។
ពួកជំនុំជាសហគមន៍នៃអ្នកជឿ ដែលរួបរួមគ្នាតែមួយ ដោយសារឈើឆ្កាងរបស់ព្រះគ្រីស្ទ ដែលបានសុគត សពព្រះអង្គត្រូវគេបញ្ចុះក្នុងផ្នូរ ហើយព្រះអង្គមានព្រះជន្មរស់ឡើងវិញ។ កាលព្រះយេស៊ូវមានព្រះជន្មនៅលើផែនដី ព្រះអង្គបានប្រាប់លោកពេត្រុសថា ព្រះអង្គនឹងសង់ពួកជំនុំរបស់ព្រះអង្គ ដែលគ្មានអ្វីអាចបំផ្លាញបានឡើយ(ម៉ាថាយ ១៦:១៨)។ ព្រះអង្គនឹងប្រមូលអ្នកជឿទាំងអស់មកពីគ្រប់តំបន់ទាំងអស់ ក្នុងពិភពលោក ឲ្យរួមមកជាក្រុមតែមួយ ដែលនឹងស្ថិតស្ថេរនៅអស់កល្ប។ សហគមន៍នេះនឹងប្រឈមមុខដាក់ទុក្ខលំបាកធ្ងន់ធ្ងរ ប៉ុន្តែ ពួកគេនឹងស៊ូទ្រាំដល់ទីបញ្ចប់។ ព្រះទ្រង់នឹងគង់នៅក្នុងចំណោមពួកគេ ហើយទ្រទ្រង់ពួកគេ(អេភេសូរ ២:២២)។
ពេលណាពួកជំនុំប្រចាំតំបន់មានការអន់ថយ និងទន់ខ្សោយ ឬសំណង់ព្រះវិហារបានទទួលរងការបំផ្លិចបំផ្លាញ ឬនៅពេលដែលយើងគិតអំពីពួកជំនុំ ដែលកំពុងជួបការលំបាក ក្នុងផ្នែកផ្សេងទៀតនៃពិភពលោក យើងអាចចាំថា ព្រះយេស៊ូវមានព្រះជន្មគង់នៅ ព្រះអង្គកំពុងចម្រើនកម្លាំងរាស្រ្តព្រះអង្គ ឲ្យអាចស៊ូទ្រាំនឹងទុក្ខលំបាក។ យើងជាផ្នែកមួយនៃពួកជំនុំដែលព្រះអង្គកំពុងសង់ឡើងក្នុងពេលបច្ចុប្បន្ន។ ព្រះអង្គគង់នៅជាមួយយើង និងថែរក្សាការពារយើង។ ការសុគតរបស់ព្រះអង្គនៅលើឈើឆ្កាង នៅតែបន្តឆ្លុះបញ្ចាំងអំពីសេចក្តីស្រឡាញ់ ការប្រោសលោះ ការប្តូរផ្តាច់ព្រះទ័យចំពោះយើងជារៀងរហូត។—Jennifer Benson Schuldt
តើអ្នកអាចជួយទ្រទ្រង់បងប្អូនរួមជំនឿដទៃទៀត ដោយរបៀបណា? តើការចែកចាយ អំពីដំណឹងល្អ មានការជាប់ទាក់ទងអ្វីខ្លះជាមួយផែនការដែលព្រះអង្គមានសម្រាប់ពួកជំនុំ?
ឱព្រះអម្ចាស់ សូមព្រះអង្គចម្រើនកម្លាំងដល់រាស្រ្តព្រះអង្គ នៅគ្រប់ទិសទី។ សូមបំពេញពួកគេ ដោយប្រាជ្ញា និងការពារ ហើយជួយពួកគេឲ្យនៅតែស្មោះត្រង់ចំពោះព្រះអង្គ។
គម្រោងអានព្រះគម្ពីររយៈពេល១ឆ្នាំ: សុភាសិត ៦-៧ និង ២កូរិនថូស ២
