ធ្វើតាមបង្គាប់របស់ព្រះអង្គ
ដោយKaren Huang
September 13, 2024
២ពង្សាវតាក្សត្រ ៥:១-៣,៩-១៤
ដូច្នេះ លោកក៏ចុះទៅមុជទឹកក្នុងទន្លេយ័រដាន់អស់៧ដង តាមពាក្យនៃអ្នកសំណប់របស់ព្រះ។ ២ពង្សាវតាក្សត្រ ៥:១៤
នៅក្នុងតូបលក់អាហាររបស់អ្នកស្រីចូសេលីន(Jocelyn) បបរសរគឺជាអាហារដែលលក់ដាច់ជាងគេ។ គាត់បានកូរបបរសយ៉ាងប្រុងប្រយ័ត្ន ទាល់តែបបររីកបានល្អ។ ហេតុនេះហើយ គាត់មានការភ្ញាក់ផ្អើលណាស់ ពេលដែលភ្ញៀវមកញាំបបរជាប្រចាំ បានប្រាប់គាត់ថា បបររបស់គាត់មានរសជាតិមិនឆ្ងាញ់ដូចមុនសោះ ហើយបបរក៏មិនរីកបានល្អដែរ។
នៅថ្ងៃនោះ ជំនួយការថ្មីរបស់អ្នកស្រីចូស៊ីលីនជាអ្នកដាំបបរ ហើយក៏បានពន្យល់ អំពីមូលហេតុដែលវាមានរស់ជាតិខុសពីមុន។ គាត់ប្រាប់អ្នកស្រីចូស៊ីលីនថា គាត់មិនបានកូរបបរឲ្យសព្វទេ ព្រោះគាត់ធ្លាប់តែធ្វើដូចនេះនៅផ្ទះ។ គាត់ក៏បានបន្ថែមប្រេងល្ងក្នុងឆ្នាំងបបរ ដោយយល់ឃើញថា វាជួយឲ្យបបរមានរសជាតិឆ្ងាញ់ជាងមុន។ ដូចនេះ ជំនួយការថ្មីរូបនោះ បានសម្រេចចិត្តមិនធ្វើតាមក្បួនដាំបបររបស់ហាង ហើយក៏បានអនុវត្តតាមរបៀបរបស់គាត់ទៅវិញ។
នៅពេលខ្លះ ខ្ញុំក៏បានឆ្លើយតបចំពោះការបង្គាប់របស់ព្រះអម្ចាស់ តាមរបៀបនេះផងដែរ។ ខ្ញុំមិនបានស្តាប់បង្គាប់តាមព្រះរាជបញ្ជា ក្នុងព្រះគម្ពីរប៊ីបទាំងស្រុងទេ ផ្ទុយទៅវិញ ខ្ញុំអនុវត្តតាមគំនិត និងរបៀបរបស់ខ្ញុំ។
លោកណាម៉ាន ជាមេទ័ពរបស់សាសន៍ស៊ីរី ក៏ហៀបនឹងប្រព្រឹត្តនូវកំហុសស្រដៀងនេះផងដែរ។ កាលព្រះអម្ចាស់បង្គាប់តាមរយៈហោរាអេលីសេ ឲ្យគាត់ទៅលាងសម្អាតខ្លួន នៅក្នុងទន្លេយ័រដាន់ ដើម្បីឲ្យគាត់បានជាពីជំងឺឃ្លង់ មេទ័ពដែលមានអំនួតរូបនេះ ក៏បានខឹងនឹងលោកអេលីសេ។ គាត់បានរំពឹងថា គាត់នឹងទទួលការប្រោសឲ្យជា តែមិនមែនតាមរបៀបនេះទេ ដោយគាត់ជឿថា ការយល់ឃើញរបស់គាត់ មានភាពខ្ពង់ខ្ពស់ជាងបង្គាប់របស់ព្រះ(២ពង្សាវតាក្សត្រ ៥:១១-១២)។ ទោះជាយ៉ាងណាក៏ដោយ អ្នកបម្រើរបស់គាត់ក៏បានលើកទឹកចិត្តគាត់ឲ្យស្តាប់តាមពាក្យដែលហោរាអេលីសេបានប្រាប់(ខ.១៣)។ ជាលទ្ធផល លោកណាម៉ានក៏បានជាពីជំងឺឃ្លង់។
ពេលណាយើងធ្វើអ្វីៗតាមផ្លូវរបស់ព្រះ យើងនឹងទទួលបានសន្តិភាពក្នុងចិត្ត លើសពីពាក្យពណ៌នា។ ចូរយើងចុះចូលនឹងបំណងព្រះទ័យព្រះអង្គ នៅក្នុងការសម្រេចគោលបំណងរបស់ព្រះអង្គ។—Karen Huang
តើអ្នកបានបណ្តោយឲ្យទស្សនៈរបស់អ្នក រារាំងមិនឲ្យអ្នកស្តាប់បង្គាប់ព្រះដូចម្តេចខ្លះ? តើបញ្ហានេះបានរារាំងព្រះអង្គមិនឲ្យធ្វើការក្នុងជីវិតអ្នកដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យស្តាប់បង្គាប់តាមព្រះអង្គទាំងស្រុង ដ្បិតព្រះរាជបញ្ជារបស់ព្រះអង្គធំជាងគំនិតរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : សុភាសិត ១៩-២១ និង ២កូរិនថូស ៧