បានសង់ឡើងនៅលើគ្រឹះរបស់ព្រះគ្រីស្ទ
ដោយBill Crowder
September 15, 2024
១ពេត្រុស ២:៤-១០
នោះអ្នករាល់គ្នាក៏បានស្អាងឡើង ដូចជាថ្មរស់ដែរ ឲ្យបានធ្វើជាផ្ទះខាងឯវិញ្ញាណ។ ១ពេត្រុស ២:៥
អគារមានតួនាទីដ៏សំខាន់ សម្រាប់ការរស់នៅ និងការធ្វើការងារ និងសម្រាប់គោលបំណងដ៏ចាំបាច់ជាច្រើនទៀត ទោះនៅក្នុងសង្គម និងក្នុងសម័យកាលមួយណាក៏ដោយ។ ប៉ុន្តែ ទោះអគារមានទំហំតូចឬធំយ៉ាងណាក៏ដោយ ក៏គ្រឹះរបស់ពួកវានៅតែមានភាពចាំបាច់ ហើយគេក៏ចង់បានជាងសំណង់ល្អៗសម្រាប់ការសាងសង់ផងដែរ ដើម្បីឲ្យគេអាចប្រើប្រាស់ពួកវាបានយូរអង្វែង។
ព្រះគម្ពីរប៊ីបបានពិពណ៌នា អំពីអ្នកជឿព្រះយេស៊ូវ ដោយប្រើពាក្យប្រៀបប្រដូចជាច្រើន ដែលពាក្យប្រៀបប្រដូចនីមួយៗសុទ្ធតែបានឆ្លុះបញ្ចាំង អំពីអត្តសញ្ញាណ និងតួនាទីជាប្រយោជន៍រួម។ ជាក់ស្តែងសាវ័កប៉ុលបានហៅពួកគេថា ផ្ទះ ដែលព្រះអង្គបានសង់(១កូរិនថូស ៣:៩)។ ពាក្យប្រៀបប្រដូចទៅនឹងសំណង់យ៉ាងដូចនេះ គឺបានឆ្លុះបញ្ចាំង អំពីការរួបរួមជាកម្លាំងខាងវិញ្ញាណ របស់ពួកស្មោះត្រង់។
ដោយឡែក ការប្រៀបប្រដូចពួកជំនុំទៅនឹងអគារ ក៏មានចែងក្នុងបទគម្ពីរ ១ពេត្រុសស ២:៥ ផងដែរ ដែលក្នុងនោះសាវ័កពេត្រុសបានមានប្រសាសន៍ទៅកាន់ពួកជំនុំថា “អ្នករាល់គ្នាក៏បានស្អាងឡើង ដូចជាថ្មរស់ដែរ ឲ្យបានធ្វើជាផ្ទះខាងឯវិញ្ញាណ”។ បន្ទាប់មក ក្នុងខ.៦ សាវ័កពេត្រុសក៏បានដកស្រង់បទគម្ពីរ អេសាយ ២៨:១៦ ដែលបានចែងថា “ព្រះអម្ចាស់យេហូវ៉ាទ្រង់មានព្រះបន្ទូលថា មើល អញដាក់ថ្ម១នៅក្រុងស៊ីយ៉ូន ទុកជាជើងជញ្ជាំង ជាថ្មដែលបានល្បងហើយ ជាថ្មជ្រុងដ៏មានដំឡៃ”។ ព្រះយេស៊ូវជាគ្រឹះនៃផ្ទះខាងវិញ្ញាណនោះឯង។
យើងប្រហែលជាយល់ឃើញថា ការងាររបស់យើង គឺត្រូវសង់ពួកជំនុំឡើង ប៉ុន្តែ ព្រះយេស៊ូវមានបន្ទូលថា ព្រះអង្គនឹងសង់ពួកជំនុំរបស់ព្រះអង្គ(ម៉ាថាយ ១៦:១៨)។ ព្រះអម្ចាស់បានជ្រើសរើសយើង ដើម្បីឲ្យយើងបានសរសើរដំកើងព្រះអង្គ ដែលបានហៅយើងចេញពីភាពងងឹត ចូលទៅក្នុងពន្លឺដ៏អស្ចារ្យរបស់ព្រះអង្គ(១ពេត្រុស ២:៩)។ ខណៈពេលដែលយើងបន្លឺសម្លេងសរសើរដំកើងព្រះអង្គយ៉ាងដូចនេះ យើងក៏បានក្លាយជាឧបករណ៍ សម្រាប់ឲ្យព្រះហស្តព្រះអង្គប្រើ ដើម្បីធ្វើការល្អ។—Bill Crowder
តើការដែលព្រះយេស៊ូវសង់ពួកជំនុំរបស់ព្រះអង្គ មានអត្ថន័យដូចម្តេចខ្លះ ចំពោះអ្នក? តើអ្នកអាចចូលរួមជាមួយព្រះអង្គ ក្នុងកិច្ចការនេះដូចម្តេចខ្លះ?
ឱព្រះអម្ចាស់ សូមព្រះអង្គអត់ទោសឲ្យទូលបង្គំ ដែលមិនបានពឹងផ្អែកព្រះអង្គ ក្នុងការរស់នៅ។ សូមព្រះអង្គប្រើទូលបង្គំឲ្យបម្រើព្រះអង្គ និងស្រឡាញ់អ្នកដទៃ ខណៈពេលដែលព្រះអង្គកំពុងសង់ពួកជំនុំព្រះអង្គឡើង។
គម្រោងអានព្រះគម្ពីររយៈពេល១ឆ្នាំ : សុភាសិត ២៥-២៦ និង ២កូរិនថូស ៩