សុភាសិត ៣:១-១២
កូនអើយ កុំឲ្យភ្លេចឱវាទអញឡើយ គួរឲ្យចិត្តឯងកាន់តាមបណ្តាំរបស់អញទាំងប៉ុន្មាន។ សុភាសិត ៣:១
អ្នកស្រីសូហ្វៀ រ៉ូបឺត(Sophia Roberts) បានមើលឃើញការវះកាត់បេះដូង ដោយផ្ទាល់ភ្នែក ជាលើកដំបូង កាលគាត់មានអាយុប្រហែល១១ឆ្នាំ។ អ្នកប្រហែលជាគិតថា គាត់នៅក្មេងពេក មិនគួរឈរមើលពេទ្យវះកាត់បេះដូងឲ្យអ្នកជំងឺដូចនេះទេ តែអ្នកចាំបាច់ត្រូវដឹងថា វេជ្ជបណ្ឌិត ហារ៉ូល រ៉ូបឺត(Harold Roberts Jr) ជាឪពុករបស់នាង និងជាពេទ្យវះកាត់បេះដូង។ កាលពីឆ្នាំ២០២២ សូហ្វៀ ក្នុងវ័យ៣០ឆ្នាំ ក្នុងនាមនាងជាគ្រូពេទ្យឯកទេសខាងវះកាត់ នាងបានចូលរួមជាមួយឪពុករបស់នាង ក្នុងការវះកាត់ផ្លាស់ប្តូរប្រឺសបេះដូងយ៉ាងជោគជ័យ។ លោកហារ៉ូល ក៏បានមានប្រសាសន៍ថា “តើមានអ្វីល្អជាងនេះទៀត? ខ្ញុំបានបង្រៀនក្មេងម្នាក់នេះ ឲ្យចេះជិះកង់កាលនាងនៅតូច … សព្វថ្ងៃនេះ ខ្ញុំក៏បានបង្រៀននាង ឲ្យចេះវះកាត់បេះដូងមនុស្សទៀត ខ្ញុំពិតជាមានចិត្តរំភើបរីករាយណាស់”។
មិនមានមនុស្សច្រើនទេ ដែលបានបង្រៀនជំនាញវះកាត់ ដល់ក្មេងៗ ប៉ុន្តែ ស្តេចសាឡូម៉ូនក៏បានពិពណ៌នា អំពីសារៈសំខាន់នៃការបង្រៀនការអ្វីផ្សេងទៀត ដល់មនុស្សជំនាន់ក្រោយផងដែរ គឺបង្រៀនពួកគេឲ្យថ្វាយព្រះកិត្តិនាមដល់ព្រះ និងដើរតាមផ្លូវរបស់ព្រះអង្គ។ ក្សត្រប្រកបដោយប្រាជ្ញាមួយអង្គនេះ បានចែកចាយដោយចិត្តឆេះឆួល ដល់បុត្ររបស់ព្រះអង្គ អំពីអ្វីដែលទ្រង់បានរៀនសូត្រ ក្នុងទំនាក់ទំនងជាមួយព្រះអម្ចាស់ គឺដូចដែលទ្រង់មានបន្ទូលថា “កូនអើយ … ចូរទីពឹងដល់ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ”(សុភាសិត ៣:១,៥) “ចូរកោតខ្លាចដល់ព្រះយេហូវ៉ា”(ខ.៧) “ចូរថ្វាយកិត្តិនាម ដល់ព្រះយេហូវ៉ា”(ខ.៩) ហើយ “កុំឲ្យមើលងាយសេចក្តីប្រៀនរបស់ព្រះយេហូវ៉ាឡើយ”(ខ.១១)។ ស្តេចសាឡូម៉ូនស្គាល់ “សេចក្តីស្រឡាញ់”របស់ព្រះអម្ចាស់ ហើយក៏ “អរសប្បាយ” ចំពោះបុត្ររបស់ទ្រង់ ដែលមានចិត្តចង់ទទួលការកែតម្រង់ និងការណែនាំរបស់ព្រះអង្គ(ខ.១២)។
ចូរយើងបង្រៀនមនុស្សជំនាន់ក្រោយ អំពីអត្ថន័យនៃការទុកចិត្ត ការកោតខ្លាច ការថ្វាយព្រះកិត្តិនាម ហើយបន្ទាបខ្លួនទទួលការកែតម្រង់ពីព្រះដ៏គួរស្ញែងខ្លាចនៃយើង។ ការធ្វើការជាដៃគូជាមួយព្រះអង្គ ដើម្បីបង្រៀនមនុស្សជំនាន់ក្រោយយ៉ាងដូចនេះ គឺជាឯកសិទ្ធិដ៏សំខាន់ ដែលពិតជាគួរឲ្យរំភើបរីករាយ!—Tom Felten
ហេតុអ្វីអ្នកចាំបាច់ត្រូវ ចែកចាយការអ្វីដែលអ្នកបានរៀនសូត្រ អំពីព្រះ ដល់មនុស្សជំនាន់ក្រោយ? តើអ្នកនឹងផ្ទេរចំណេះដឹងអ្វីដល់មនុស្សជំនាន់ក្រោយ ក្នុងពេលសព្វថ្ងៃ?
ឱព្រះអម្ចាស់ សូមព្រះអង្គជួយទូលបង្គំ ឲ្យបង្រៀនមនុស្សជំនាន់ក្រោយ ក៏ដូចជាមនុស្សចាស់ ឲ្យស្គាល់ផ្លូវនៃសេចក្តីស្រឡាញ់របស់ព្រះអង្គ។
គម្រោងអានព្រះគម្ពីររយៈពេល១ឆ្នាំ: បទចម្រៀងសាឡូម៉ូន ៦-៨ និង កាឡាទី ៤
