ឆ្លុះបញ្ចាំងឲ្យគេបានស្គាល់ចរិតលក្ខណៈរបស់ព្រះអង្គ
ដោយAmy Boucher Pye
October 1, 2024
កាឡាទី ៥:១៣-២៦
តែឯផលផ្លែនៃព្រះវិញ្ញាណវិញ នោះគឺសេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត គ្មានក្រឹត្យវិន័យណាទាស់នឹងសេចក្តីយ៉ាងនោះទេ។ កាឡាទី ៥:២២-២៣
បន្ទាប់ពីលោកស្កត់(Scott) ជាពលបាលឯក ក្នុងកងទ័ពប្រទេសអង់គ្លេស ត្រូវបានគេបញ្ជូនទៅប្រទេសអាហ្វហ្គានីស្ថាន គាត់បានជួបបញ្ហាប្រឈមជាច្រើន ដែលបានធ្វើឲ្យគាត់ធ្លាក់ទឹកចិត្តយ៉ាងខ្លាំង។ គាត់ចាំថា កាលនោះ គាត់បានធ្លាក់ចូលក្នុងភាពងងឹត ប៉ុន្តែ នៅពេលដែលគាត់បានឮគេចែកចាយអំពីព្រះយេស៊ូវ គាត់ក៏បានចាប់ផ្តើមដើរតាមព្រះអង្គ ហើយជីវិតគាត់មានការផ្លាស់ប្តូរយ៉ាងខ្លាំង។ សព្វថ្ងៃនេះ គាត់បានព្យាយាមស្វែងរកឱកាសចែកចាយ អំពីសេចក្តីស្រឡាញ់របស់ព្រះគ្រីស្ទដល់អ្នកដទៃ ជាពិសេសដល់អតីតយុទ្ធជន ដែលគាត់បានចូលរួមការប្រកួតកីឡាជាមួយ ក្នុងព្រឹត្តិការណ៍អន្តរជាតិ សម្រាប់អតីតយុទ្ធជនដែលពិការ ឬធ្លាប់មានរបួស។
សម្រាប់លោកស្កត់ ការអានព្រះគម្ពីរប៊ីប ការអធិស្ឋាន និងការស្តាប់បទចម្រៀងថ្វាយបង្គំបានជួយគាត់ ឲ្យមានភាពរឹងមាំ មុនពេលគាត់ចូលរួមប្រកួតកីឡានោះ។ បន្ទាប់មក ព្រះអម្ចាស់ក៏បានជួយគាត់ ឲ្យបង្ហាញចេញនូវចរិតលក្ខណៈរបស់ព្រះយេស៊ូវ និងបង្ហាញសេចក្តីសប្បុរស ភាពសំឡូត និងព្រះគុណដល់អតីតយុទ្ធជនដទៃទៀត ដែលកំពុងចូលរួមប្រកួតនៅទីនោះ។
ទីបន្ទាល់របស់លោកស្កត់ បានធ្វើឲ្យខ្ញុំនឹកចាំ អំពីផលផ្លែនៃព្រះវិញ្ញាណ ដែលសាវ័កប៉ុលបានរៀបរាប់ ក្នុងសំបុត្រដែលគាត់បានសរសើរផ្ញើពួកជំនុំនៅទីក្រុងកាឡាទី។ កាលនោះ ពួកគេកំពុងទទួលឥទ្ធិពលរបស់ពួកគ្រូខុសឆ្គង បានជាគាត់ព្យាយាមលើកទឹកចិត្តពួកគេ ឲ្យបន្តស្មោះត្រង់ចំពោះព្រះ និងព្រះគុណរបស់ព្រះអង្គ ដោយអនុញ្ញាតឲ្យព្រះវិញ្ញាណដឹកនាំជីវិតរបស់ពួកគេ(កាឡាទី ៥:១៨)។ ដោយសារការដឹកនាំរបស់ព្រះវិញ្ញាណបរិសុទ្ធ ពួកគេនឹងបានបង្កើតផលផ្លែខាងវិញ្ញាណ ដែលមានដូចជា “សេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត”(ខ.២២-២៣)។
បើសិនជាយើងមានព្រះវិញ្ញាណរបស់ព្រះ គង់នៅក្នុងយើង យើងក៏នឹងបង្កើតផលផ្លែនៃព្រះវិញ្ញាណ ជាពិសេសគឺសេចក្តីស្រឡាញ់ផងដែរ។ យើងក៏នឹងអាចបង្ហាញចេញនូវចិត្តសុភាព និងសប្បុរស ដល់មនុស្សនៅជុំវិញយើង។—Amy Boucher Pye
តើព្រះអម្ចាស់អាចជួយអ្នកបង្កើតផលផ្លែនៃព្រះវិញ្ញាណយ៉ាងដូចម្តេចខ្លះ? តើធ្វើដូចម្តេចឲ្យអ្នកអាច បន្តរស់នៅស្របតាមបំណងព្រះទ័យព្រះអង្គ?
ឱព្រះដែលប្រទានជីវិត ទូលបង្គំសូមអរព្រះគុណព្រះអង្គ ដែលបានប្រទានព្រះវិញ្ញាណបរិសុទ្ធ។ សូមព្រះអង្គជួយទូលបង្គំឲ្យបង្កើតផលផ្លែនៃព្រះវិញ្ញាណ ដើម្បីឲ្យអ្នកដទៃបានឃើញ ហើយសរសើរដំកើងព្រះអង្គផងដែរ។
Visit ODBU.org/NT050 to learn how to cultivate the fruit of the Spirit.
គម្រោងអានព្រះគម្ពីររយៈពេល១ឆ្នាំ: អេសាយ ១៤-១៦ និង អេភេសូរ ៥:១-១៦