១ថែស្សាឡូនិច ៥:១៦-២២
ចូរអធិស្ឋានឥតឈប់ឈរ។ ១ថែស្សាឡូនិច ៥:១៧
មានពេលមួយកូនស្រីខ្ញុំបានផ្ញើសារមកទូរស័ព្ទខ្ញុំថា នាងប្រឡងបានពិន្ទុ៨៤។ ពេលខ្ញុំកំពុងអានសាររបស់នាង ក្នុងទូរស័ព្ទរបស់ខ្ញុំ ខ្ញុំអាចដឹងថា កូនស្រីរបស់ខ្ញុំកំពុងមានចិត្តរំភើបរីករាយ។ កាលនោះ គាត់ទើបតែចាប់ផ្តើមចូលរៀនក្នុងថ្នាក់វិទ្យាល័យ ហើយកំពុងប្រើទូរស័ព្ទនៅម៉ោងសម្រាកបាយថ្ងៃត្រង់។ ក្នុងនាមខ្ញុំជាម្តាយ ខ្ញុំមានការសប្បាយចិត្តណាស់ គឺមិនគ្រាន់តែដោយសារកូនស្រីខ្ញុំទទួលបានលទ្ធផលល្អក្នុងការប្រឡងដ៏ពិបាកប៉ុណ្ណោះទេ តែក៏ដោយសារគាត់បានសម្រេចចិត្តទំនាក់ទំនងមកខ្ញុំ។ និយាយឲ្យខ្លី គាត់ចង់ចែកចាយដំណឹងដ៏ល្អនេះ ឲ្យខ្ញុំមានអំណរជាមួយគាត់ផងដែរ។
ពេលដែលខ្ញុំបានដឹងថា សារដែលគាត់បានផ្ញើមក បានធ្វើឲ្យខ្ញុំមានចិត្តរីករាយពេញមួយថ្ងៃ ក្រោយមក ខ្ញុំក៏បានគិត អំពីអារម្មណ៍ដែលព្រះទ្រង់មានចំពោះខ្ញុំ នៅពេលណាខ្ញុំឈោងទៅរកព្រះអង្គ។ តើព្រះអង្គមានព្រះទ័យរីករាយទេ នៅពេលដែលខ្ញុំនិយាយទៅកាន់ព្រះអង្គ? ការអធិស្ឋានគឺជាការសន្ទនាជាមួយព្រះ ហើយព្រះគម្ពីរប៊ីបបានបង្រៀនយើង ឲ្យបន្តអធិស្ឋានទៅកាន់ព្រះអង្គ (១ថែស្សាឡូន ៥:១៧)។ ការជជែកជាមួយព្រះអង្គ គឺបានរំឭកយើងថា ព្រះអង្គគង់នៅជាមួយយើង ទាំងនៅពេលយើងសប្បាយរីករាយ ក៏ដូចនៅពេលដែលយើងពិបាកចិត្ត។ ទោះព្រះអង្គបានជ្រាបអំពីអ្វីៗទាំងអស់ហើយក៏ដោយ ការទូលថ្វាយរឿងរបស់យើងដល់ព្រះអង្គ មានប្រយោជន៍ចំពោះយើង ដោយនាំឲ្យយើងងាកមកផ្ដោតចិត្តទៅលើព្រះអង្គ និងគិតអំពីព្រះអង្គ។ បទគម្ពីរអេសាយ ២៦:៣ បានចែងថា “ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្តីសុខពេញខ្នាត ដោយព្រោះគេទុកចិត្តនឹងទ្រង់”។ យើងនឹងមានសន្តិភាពនៅក្នុងចិត្តយ៉ាងពេញលេញ ពេលណាយើងងាកមកផ្ដោតចិត្តទៅលើព្រះអង្គ។
ទោះយើងជួបរឿងអ្វីក៏ដោយ ចូរយើងបន្តនិយាយទៅកាន់ព្រះអង្គ ហើយបន្តមានការប្រកបស្និទ្ធស្នាលជាមួយព្រះអាទិករ និងព្រះអង្គសង្គ្រោះរបស់យើង។ ចូរយើងអធិស្ឋានក្នុងចិត្ត ឬអធិស្ឋានឮៗ ដោយមិនភ្លេចអរសប្បាយ និងអរព្រះគុណព្រះអង្គ។ សរុបមក សាវ័កប៉ុលបានប្រាប់យើងថា នេះហើយជាបំណងព្រះទ័យដែលព្រះអង្គមានសម្រាប់យើង(១ថែស្សាឡូនិច ៥:១៨)។—Katara Patton
តើអ្នកមានរឿងអ្វីខ្លះ ដែលចាំបាច់ត្រូវទូលថ្វាយដល់ព្រះ? តើធ្វើដូចម្តេចឲ្យអ្នកមិនភ្លេចប្រកបស្និទ្ធស្នាលជាមួយព្រះអង្គ ពេញមួយថ្ងៃ?
ឱព្រះប្រកបដោយព្រះគុណ សូមព្រះអង្គក្រើនរំឭកទូលបង្គំ ឲ្យបន្តប្រកបជិតស្និទ្ធជាមួយព្រះអង្គ ពេញមួយថ្ងៃ។ ទូលបង្គំចង់មានអំណរ និងថ្វាយការអរព្រះគុណដល់ព្រះអង្គ ក្នុងបញ្ហាទាំងអស់ដែលទូលបង្គំជួបប្រទះ។
For further study, read God’s Invitation into Wholeness at DiscoverODB.org.
គម្រោងអានព្រះគម្ពីររយៈពេល១ឆ្នាំ: អេសាយ ៣៧-៣៨ និង កូល៉ុស ៣
