នាងរស់ ២:១-២,៥-១១
ដូច្នេះ ចូរប្រដាប់កាយ ដោយចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់។ កូល៉ុស ៣:១២
កាលម្តាយរបស់ខ្ញុំចូលសម្រាកព្យាបាលជំងឺ ក្នុងមន្ទីរពេទ្យ ហើយជិតដល់ថ្ងៃចុងក្រោយនៃជីវិតរបស់គាត់ នៅលើផែនដី ខ្ញុំមានការប៉ះពាល់ចិត្តយ៉ាងខ្លាំង ចំពោះសេចក្តីសប្បុរសពិតប្រាកដ ដែលអ្នកថែទាំគាត់បានបង្ហាញចេញមក។ គាត់បានលើកម្តាយខ្ញុំចេញពីកៅអីយឺតៗ ហើយដាក់ម្តាយខ្ញុំនៅលើគ្រែគេងថ្នមៗ ហើយក៏បាននិយាយលើកទឹកចិត្តម្តាយខ្ញុំ ដោយពាក្យសម្តីដ៏ស្រទន់។ បន្ទាប់មក គាត់ក៏បានសួរសុខទុក្ខខ្ញុំ។ សេចក្តីសប្បុរសរបស់គាត់បានធ្វើឲ្យខ្ញុំប៉ះពាល់ចិត្ត រហូតដល់ស្រក់ទឹកភ្នែក ហើយសព្វថ្ងៃនេះ ខ្ញុំនៅតែស្រក់ទឹកភ្នែក ពេលដែលបាននឹកចាំអំពីរឿងនេះ។
ការថែទាំដែលគាត់បានផ្តល់ឲ្យម្តាយខ្ញុំ គឺជាអំពើសប្បុរសធម៌ដ៏សាមញ្ញ តែក៏ជាអ្វីដែលខ្ញុំត្រូវការ នៅពេលនោះផងដែរ។ ការនេះក៏បានលើកទឹកចិត្តខ្ញុំ ក្នុងពេលដ៏ពិបាក ដោយដឹងថា ក្នុងកែវភ្នែករបស់ស្ត្រីម្នាក់នេះ ម្តាយខ្ញុំមិនគ្រាន់តែជាអ្នកជំងឺប៉ុណ្ណោះទេ។ គាត់បានថែទាំម្តាយខ្ញុំ ហើយបានចាត់ទុកម្តាយខ្ញុំជាមនុស្សដែលមានតម្លៃ។
កាលនាងន៉ាអូមី និងនាងរស់បានជួបភាពទាល់ក្រ បន្ទាប់ពីពួកគាត់សុទ្ធតែបានបាត់បង់ស្វាមីរៀងខ្លួន លោកបូអូសក៏បានបង្ហាញចេញនូវចិត្តសប្បុរស ដោយអនុញ្ញាតឲ្យនាងរស់ ទៅដើររើសកួរស្រូវ ដែលអ្នកច្រូតកាត់បានជ្រុះ ក្នុងស្រែគាត់។ គាត់ថែមទាំងបានប្រាប់ពួកប្រុសៗ ជាអ្នកច្រូតកាត់មិនឲ្យប៉ះពាល់នាងឡើយ(នាងរស់ ២:៨-៩)។ សេចក្តីសប្បុរសរបស់គាត់ បានទទួលការបណ្តាលចិត្ត ពីរបៀបដែលនាងរស់បានថែទាំនាងន៉ាអូមី ព្រោះគាត់បាននិយាយថា “គេបានប្រាប់ដល់ខ្ញុំ ពីគ្រប់ទាំងកិរិយា ដែលនាងបានប្រព្រឹត្តនឹងម្តាយក្មេក តាំងពីប្តីនាងស្លាប់ចោលទៅ ហើយពីនាងបានលះចោលឪពុកម្តាយ និងស្រុកកំណើតរបស់នាង មកឯសាសន៍នេះ ដែលមិនបានស្គាល់កាលពីដើមផង”(ខ.១១)។ គាត់មិនគិតឃើញថា នាងជាជនបរទេស ឬជាស្រ្តីមេម៉ាយនោះទេ តែជាស្រ្តីទាល់ក្រ។
ព្រះអម្ចាស់សព្វព្រះទ័យឲ្យយើង “ប្រដាប់កាយ ដោយចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(កូល៉ុស ៣:១២)។ ដោយជំនួយមកពីព្រះអម្ចាស់ អំពើសប្បុរសធម៌ដ៏សាមញ្ញរបស់យើង អាចលើកទឹកចិត្ត នាំមកនូវក្តីសង្ឃឹម និងបណ្តាលចិត្តអ្នកដទៃឲ្យប្រព្រឹត្ត ដោយសេចក្តីសប្បុរសផងដែរ។—Alyson Kieda
តើមាននរណាម្នាក់បង្ហាញចេញនូវសេចក្តីសប្បុរស ចំពោះអ្នក នៅពេលណាខ្លះ? តើការនេះបានបណ្តាលចិត្ត ឬលើកទឹកចិត្តអ្នក ឲ្យប្រព្រឹត្តយ៉ាងណាខ្លះចំពោះអ្នកដទៃ?
ឱព្រះអម្ចាស់ ទូលបង្គំចង់ប្រដាប់កាយដោយសេចក្តីសប្បុរស។ សូមព្រះអង្គជួយទូលបង្គំ និងប្រទានឱកាស ដើម្បីឲ្យទូលបង្គំបង្ហាញសេចក្តីសប្បុរសចំពោះអ្នកដទៃ។
គម្រោងអានព្រះគម្ពីររយៈពេល១ឆ្នាំ: អេសាយ ៤៣-៤៤ និង ១ថែស្សាឡូនិច ២
