សាស្តា ២:១-៥,១១-១៧
ចូរស្វែងរកនគរ និងសេចក្តីសុចរិតនៃព្រះជាមុនសិន ទើបគ្រប់របស់ទាំងនោះ នឹងបានប្រទានមកអ្នករាល់គ្នាថែមទៀតផង។ ម៉ាថាយ ៦:៣៣
លោកស៊ែម រ៉ូឌា(Sam Rodia) បានចាប់ផ្តើមការសាងសង់ប៉មមួយចំនួន ដែលមានរាងស្ដួច និងកំពូលស្រួចៗ ចាប់តាំងពីឆ្នាំ១៩២១។ ៣៣ឆ្នាំក្រោយមក ប៉មដែលជារូបចម្លាក់ចំនួន១៧ បានលេចឡើងកម្ពស់ដល់៣០ម៉ែត្រ នៅទីក្រុងឡូសអេនជេលេស។ លោកជើរី ហ្កាសៀ(Jerry Garcia) ជាតន្ត្រីករដែលមិនឲ្យតម្លៃមកលើស្នាដៃសិល្បៈដែលលោករ៉ូឌាបានចំណាយសាងសង់ពេញមួយជីវិតនោះទេ។ លោកហ្កាសៀបាននិយាយថា ប៉មទាំងនោះក្លាយជាវត្ថុមានប្រយោជន៍ បន្ទាប់ពីលោករូឌាបានស្លាប់ទៅ ប៉ុន្តែ លោកហ្កាសៀមិនចង់ធ្វើអ្វីមួយដែលមានប្រយោជន៍ តែនៅពេលដែលខ្លួនគាត់បានស្លាប់ហើយ ដូចលោករ៉ូឌានោះទេ។
ដូចនេះ តើមានអ្វីខ្លះដែលមានប្រយោជន៍សម្រាប់គាត់? លោកបប់ វេរ(Bob Weir) ដែលជាមិត្តរួមក្រុមតន្ត្រីរបស់គាត់ បានបកស្រាយអំពីទស្សនវិជ្ជារបស់ពួកគេជាសរុបថា “ក្នុងពេលអស់កល្បជានិច្ចបន្ទាប់ពីអ្នកស្លាប់ទៅ គ្មាននរណាម្នាក់នឹកចាំអំពីអ្នកទៀតទេ។ ដូចនេះ ចូរយើងធ្វើរឿងដែលសប្បាយៗទាន់នៅរស់?”
បុរសមានប្រាជ្ញា និងមានទ្រព្យសម្បត្តិស្តុកស្តម្ភម្នាក់ធ្លាប់ព្យាយាមស្វែងរក “ការអ្វីដែលមានប្រយោជន៍” ដោយធ្វើអ្វីៗដែលគាត់អាចធ្វើបាន។ គឺដូចដែលគាត់បានបង្រៀនថា “មកចុះ យើងនឹងល្បងលឯងដោយការអរសប្បាយ ឯងនឹងបានគ្រឹកគ្រេងសប្បាយទទេ តែមើល ការនោះក៏ឥតប្រយោជន៍ដែរ”(សាស្តា ២:១)។ ប៉ុន្តែ គាត់ក៏បានកត់សំគាល់ឃើញថា “ពីព្រោះអ្នកមានប្រាជ្ញា ក៏ដូចគ្នានឹងអ្នកល្ងីល្ងើដែរ គ្មានអ្នកណានឹកចាំពី១លើសជាង១ជាដរាបទេ”(ខ.១៦)។ គាត់ក៏បានសន្និដ្ឋានថា “ការទាំងអស់សុទ្ធតែឥតប្រយោជន៍ ហើយជាអសារឥតការទទេ”(ខ.១៧)។
ការរស់នៅ និងព្រះរាជសាររបស់ព្រះយេស៊ូវ បានផ្តល់ឲ្យនូវដំណោះស្រាយ សម្រាប់ការរស់នៅ ដោយការគិតមិនបានវែងឆ្ងាយដូចនេះ។ ព្រះយេស៊ូវបានយាងមក ដើម្បីប្រទានយើងនូវជីវិតពេញបរិបូរ(យ៉ូហាន ១០:១០) ហើយបានបង្រៀនយើង ឲ្យរស់នៅក្នុងពេលបច្ចុប្បន្ន ដោយគិតដល់ជីវិតអស់កល្បជានិច្ច។ គឺដូចដែលព្រះអង្គមានបន្ទូលថា “កុំឲ្យប្រមូលទ្រព្យសម្បត្តិទុកសំរាប់ខ្លួន នៅផែនដី ជាកន្លែងដែលមានកន្លាត និងច្រែះស៊ីបំផ្លាញ ហើយចោរទំលុះប្លន់នោះឡើយ ត្រូវប្រមូលទ្រព្យសម្បត្តិ ទុកសំរាប់ខ្លួន នៅឯស្ថានសួគ៌វិញ”(ម៉ាថាយ ៦:១៩-២០)។ បន្ទាប់មក ព្រះអង្គមានបន្ទូលជាសរុបថា “ចូរស្វែងរកនគរ និងសេចក្តីសុចរិតនៃព្រះជាមុនសិន ទើបគ្រប់របស់ទាំងនោះ នឹងបានប្រទានមកអ្នករាល់គ្នាថែមទៀតផង”(ខ.៣៣)។
ការអ្វីដែលមានប្រយោជន៍ គឺមានលក្ខណៈដូចនេះឯង គឺមានប្រយោជន៍ទាំងនៅក្នុងជីវិតបច្ចុប្បន្ន ក៏ដូចជាអស់កល្បជានិច្ច។—Tim Gustafson
តើអ្នកចង់ឲ្យគេនឹកចាំអំពីអ្នកដូចម្តេចខ្លះ? តើការ “បង្គរទ្រព្យទុកនៅស្ថានសួគ៌” មានន័យដូចម្តេចសម្រាប់អ្នក?
ឱព្រះវរបិតា សូមព្រះអង្គជួយទូលបង្គំ ឲ្យបម្រើព្រះអង្គដោយអំណរ ដោយគិតដល់ជីវិតអស់កល្បជានិច្ច ដែលទូលបង្គំនឹងបានរស់នៅជាមួយព្រះអង្គ។
គម្រោងអានព្រះគម្ពីររយៈពេល១ឆ្នាំ: អេសាយ ៥៩-៦១ និង ២ថែស្សាឡូនិច ៣
