យ៉ូហាន ១៤:១៦,២៣-២៧
នោះខ្ញុំនឹងទូលសូមដល់ព្រះវរបិតា ហើយទ្រង់នឹងប្រទានព្រះដ៏ជាជំនួយ១អង្គទៀត មកអ្នករាល់គ្នា ឲ្យបានគង់នៅជាមួយ នៅអស់កល្បរៀងទៅ។ យ៉ូហាន ១៤:១៦
នៅពេលដែលអ្នកបម្រើលើយន្តហោះ ពិនិត្យមើលសំបុត្រយន្តហោះរបស់អ្នកដំណើរម្នាក់ ដែលត្រូវធ្វើដំណើរពីទីក្រុងឆាឡុត រដ្ឋឃែរ៉ូឡាយណាខាងជើង ទៅទីក្រុងញូយ៉ក គាត់ក៏បានឃើញអ្នកដំណើរនោះមានទឹកមុខថប់បារម្ភ ក្នុងការធ្វើដំណើរតាមយន្តហោះ។ គាត់ក៏បានកាន់ដៃអ្នកដំណើរនោះ នាំចូលទៅកន្លែងអង្គុយ ហើយក៏បានពន្យល់អំពីដំណើរការនៃជើងហោះហើរនោះ ហើយក៏បានលើកទឹកចិត្តគាត់ថា គាត់នឹងសុខសប្បាយ ក្នុងការធ្វើដំណើរ។ គាត់ប្រាប់អ្នកដំណើរនោះថា “នៅពេលដែលអ្នកចូលក្នុងយន្តហោះនេះ ពួកខ្ញុំគិតអំពីសុខទុក្ខរបស់អ្នក។ បើអ្នកមានអារម្មណ៍ថាមិនស្រួលខ្លួន សូមប្រាប់ពួកខ្ញុំឲ្យបានដឹងថា មានការអ្វីខ្លះដែលពួកខ្ញុំអាចធ្វើសម្រាប់អ្នកបាន?” វត្តមាននៃការកម្សាន្តចិត្តរបស់គាត់ បានធ្វើឲ្យខ្ញុំនឹកចាំ អំពីព្រះបន្ទូលរបស់ព្រះយេស៊ូវ អំពីការអ្វីដែលព្រះវិញ្ញាណបរិសុទ្ធនឹងធ្វើសម្រាប់អ្នកជឿព្រះអង្គ។
ការសុគត និងការមានព្រះជន្មរស់ឡើងវិញ និងការយាងឡើងស្ថានសួគ៌វិញរបស់ព្រះយេស៊ូវ មានភាពចាំបាច់ និងមានប្រយោជន៍ ក្នុងការជួយសង្គ្រោះមនុស្សជាតិឲ្យរួចពីបាប ប៉ុន្តែ ការនេះក៏បានបណ្តាលឲ្យពួកសាវ័កមានចិត្តថប់បារម្ភ និងទុក្ខព្រួយផងដែរ(យ៉ូហាន ១៤:១)។ ហេតុនេះហើយ ព្រះអង្គក៏បានធានាពួកគេថា ព្រះអង្គនឹងមិនទុកពួកគេចោល ឲ្យបំពេញបេសកកម្មក្នុងលោកិយ ដោយខ្លួនឯងនោះទេ។ ព្រះអង្គនឹងចាត់ព្រះវិញ្ញាណ ជាព្រះដ៏ជាជំនួយ១អង្គ ឲ្យបានគង់នៅជាមួយពួកគេ អស់កល្បរៀងទៅ(ខ.១៦)។ ព្រះវិញ្ញាណបរិសុទ្ធនឹងធ្វើបន្ទាល់អំពីព្រះយេស៊ូវដល់ពួកគេ ហើយរំឭកពួកគេអំពីការអ្វីដែលព្រះអង្គបានធ្វើ និងមានបន្ទូល(ខ.២៦)។ ពួកគេនឹងទទួល “ការកម្សាន្តចិត្ត” ពីព្រះអង្គ ក្នុងអំឡុងពេលដ៏ពិបាក(កិច្ចការ ៩:៣១)។
ក្នុងជីវិតនេះ មនុស្សទាំងអស់សុទ្ធតែជួបភាពច្របូកច្របល់ ដោយសារការថប់បារម្ភ ការភ័យខ្លាច និងទុក្ខសោក។ ប៉ុន្តែ ព្រះយេស៊ូវបានសន្យាថា ព្រះវិញ្ញាណរបស់ព្រះអង្គតែងតែមានព្រះវត្តមានគង់នៅ ដើម្បីកម្សាន្តចិត្តយើងជានិច្ច។—Marvin Williams
តើជីវិតអ្នកបានជួបការលំបាកអ្វីខ្លះ ដែលធ្វើឲ្យអ្នកថប់បារម្ភ ឬបាក់ទឹកចិត្ត? តើអ្នកអាចស្វែងព្រះវត្តមាននៃការកម្សាន្តចិត្តរបស់ព្រះវិញ្ញាណបរិសុទ្ធដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ ដែលបានប្រទានព្រះវិញ្ញាណនៃការកម្សាន្តចិត្ត និងគំនិតយោបល។
Visit ODBU.org/SF120 to learn how to walk daily with the Holy Spirit through prayer.
គម្រោងអានព្រះគម្ពីររយៈពេល១ឆ្នាំ: យេរេមា ១-២ និង ១ធីម៉ូថេ ៣
