អំណោយដែលគួរឲ្យភ្ញាក់ផ្អើល
ដោយTom Felten
October 30, 2024
អេសាយ ៤:២-៦
នៅគ្រានោះ ខ្នែងរបស់ព្រះយេហូវ៉ា នឹងបានជាល្អប្រពៃ ហើយរុងរឿង។ អេសាយ ៤:២
វាលស្រែរបស់លោកលី វីលសិន(Lee Wilson) ដែលបានភ្ជួររាស់ហើយ មានបង្កប់អ្វីម្យ៉ាង។ នៅក្នុងការត្រៀមខ្លួនសម្រាប់ថ្ងៃខួបអាពាហ៍ពិពាហ៍លើកទី៥០ លោកលី វីលសិនបានទុកចំណែកដីប្រហែល៣០ហិចតា សម្រាប់ដាំដើមផ្កា ធ្វើជាអំណោយធំបំផុត ដែលភរិយាគាត់ធ្លាប់បានឃើញ។ គាត់បានយកគ្រាប់ផ្កាឈូករ័ត្នជាច្រើនរាប់មិនអស់ ទៅដាំក្នុងដីនោះ ដោយមិនឲ្យគេដឹង ហើយនៅទីបំផុត ដើមផ្កាឈូករ័ត្នមានពណ៌លឿងដូចមាសដែលភរិយាគាត់ចូលចិត្ត ចំនួន១លាន២សែនដើម បានដុះឡើង។ នៅពេលដែលផ្កាបានរីកឡើងព្រមគ្នា អ្នកស្រីរេនី(Renee) មានការភ្ញាក់ផ្អើល និងការរំភើបចិត្តជាពន់ពេក ចំពោះសេចក្តីស្រឡាញ់ដែលលោកលីបានបង្ហាញចេញមក។
កាលព្រះអម្ចាស់មានបន្ទូលទៅកាន់ប្រជាជនយូដា តាមរយៈហោរាអេសាយ ព្រះអង្គបានបើកបង្ហាញរឿងអាថ៌កំបាំងមួយដល់ពួកគេ។ ទោះពួកគេមិនអាចមើលឃើញការនោះសម្រេច ក្នុងសម័យដែលពួកគេរស់នៅក៏ដោយ បន្ទាប់ពីព្រះអង្គបានជំនុំជម្រះពួកគេ ដោយសារភាពមិនស្មោះត្រង់របស់ពួកគេ(អេសាយ ៣:១-៤:១) យុគសម័យថ្មីដ៏រុងរឿង នឹងមកដល់។ “នៅគ្រានោះ ខ្នែងរបស់ព្រះយេហូវ៉ា នឹងបានជាល្អប្រពៃ ហើយរុងរឿង ឯផលកើតពីដី នឹងបានជាប្រសើរ ហើយជាលំអ ដល់សំណល់ពួកសាសន៍អ៊ីស្រាអែល ដែលបានរួច”(៤:២)។ ជាការពិតណាស់ ពួកគេនឹងបានឆ្លងកាត់ការបំផ្លិចបំផ្លាញ និងការនិរទេស នៅក្រោមការគ្រប់គ្រងរបស់ចក្រភពបាប៊ីឡូន ប៉ុន្តែ “ខ្នែង” នឹងដុះចេញចេញមក ឲ្យគេបានឃើញ។ ពួកសំណល់នៃរាស្រ្តរបស់ព្រះអង្គ នឹងត្រូវព្រះអង្គញែកជាបរិសុទ្ធ(ខ.៣) និងលាងជម្រះ(ខ.៤) ហើយព្រះអង្គនឹងដឹកនាំ ហើយថែរក្សាពួកគេដោយក្តីស្រឡាញ់(ខ.៥-៦)។
ជីវិតរបស់យើងប្រហែលជាកំពុងស្ថិតក្នុងភាពងងឹត ដែលធ្វើឲ្យយើងមិនអាចមើលឃើញព្រះអង្គសម្រេចព្រះបន្ទូលសន្យាក្នុងជីវិតយើង។ ប៉ុន្តែ ពេលណាយើងតោងព្រះអង្គជាប់ ដោយសេចក្តីជំនឿ នៅថ្ងៃមួយ ព្រះអង្គនឹងសម្រេច “សេចក្តីសន្យាដ៏ធំបំផុត ហើយវិសេសផង”(២ពេត្រុស ១:៤)។ ថ្ងៃថ្មីដ៏ល្អប្រពៃ កំពុងរង់ចាំយើងស្រាប់ហើយ។—Tom Felten
ហេតុអ្វីព្រះបន្ទូលសន្យារបស់ព្រះ ហាក់ដូចជាលាក់កំបាំង នៅចំពោះយើងនៅពេលខ្លះ?
តើអ្នកអាចទទួលយកព្រះបន្ទូលសន្យាទាំងនោះ ដោយជំនឿនៅថ្ងៃនេះ យ៉ាងដូចម្តេចខ្លះ?
ឱព្រះដ៏រស់ ទូលបង្គំសូមអរព្រះគុណព្រះអង្គ ដែលបានឲ្យទូលបង្គំស្គាល់តម្លៃរបស់ព្រះបន្ទូលសន្យាដ៏ស្មោះត្រង់របស់ព្រះអង្គ។
For further study, read The Promises of God: Taking God at His Word at DiscoverySeries.org/Q0105.
គម្រោងអានព្រះគម្ពីររយៈពេល១ឆ្នាំ: យេរេមា ២០-២១ និង ២ធីម៉ូថេ ៤