ប្រើពេលវេលាឲ្យមានប្រយោជន៍
ដោយWinn Collier
October 31, 2024
អេភេសូរ ៥:១៥-២០
ដូច្នេះ ត្រូវប្រយ័ត្នដោយមធ្យ័ត ដែលអ្នករាល់គ្នាដើរយ៉ាងណា ... ទាំងលៃយកឱកាសឲ្យទាន់ពេលផង។ អេភេសូរ ៥:១៥-១៦
កាលពីថ្ងៃទី១៤ ខែមីនា ឆ្នាំ២០១៩ អង្គការណាសាបានបាញ់បង្ហោះយានអវកាស ដោយបានបញ្ជូនអ្នកស្រី គ្រីស្ទីណា កូច(Christina Koch) ទៅកាន់ស្ថានីយអវកាសអន្តរជាតិ។ អ្នកស្រីគ្រីស្ទីណាបានបន្តធ្វើការក្នុងស្ថានីយអវកាស អស់រយៈពេល៣២៨ថ្ងៃ ដោយបានបំបែកកំណត់ត្រាឯកត្តកម្ម ក្នុងនាមជាស្រ្តីទីមួយ ដែលបានស្នាក់នៅក្នុងយានអវកាសបានយូរជាងគេ។ ជារៀងរាល់ថ្ងៃ ក្នុងការរស់នៅ ក្នុងរយៈកម្ពស់៤១០គីឡូម៉ែត្រពីផែនដី មានអេក្រង់កុំព្យូទ័រមួយ តាមដានសកម្មភាពរបស់អវកាសយានិករូបនេះ រៀងរាល់៥នាទីម្តង។ គាត់មានកិច្ចការប្រចាំថ្ងៃ ដែលត្រូវបំពេញ(រាប់ចាប់តាំងពីការបរិភោគអាហារ ដល់ការធ្វើពិសោធន៍ផ្សេងៗ) ហើយពីមួយម៉ោងទៅមួយម៉ោង មានខ្សែបន្ទាប់ពណ៌ក្រហមលេចឡើង នៅលើអេក្រង់នោះ ដើម្បីបង្ហាញជាទៀងទាត់ថា អ្នកស្រីគ្រីស្ទីណាសម្រេចកិច្ចការនីមួយៗបានមុនពេលកំណត់ ឬមានភាពយឺតយ៉ាវ។ ដូចនេះ គាត់មិនដែលចំណាយពេលធ្វើរឿងអត់ប្រយោជន៍នៅទីនោះឡើយ។
សាវ័កប៉ុលមិនបានបង្រៀនថា យើងចាំបាច់ត្រូវប្រើខ្សែបន្ទាត់ក្រហម ដើម្បីគ្រប់គ្រងជីវិតយើង ក្នុងការធ្វើកិច្ចការនីមួយៗប្រចាំថ្ងៃ យ៉ាងតឹងរឹងនោះទេ ប៉ុន្តែ គាត់ពិតជាបានលើកទឹកចិត្តយើង ឲ្យប្រើពេលវេលាដ៏មានតម្លៃ និងមានកំណត់ ដោយការប្រុងប្រយ័ត្នខ្ពស់។ គឺដូចដែលគាត់បានបង្រៀនយើងថា “ត្រូវប្រយ័ត្នដោយមធ្យ័ត ដែលអ្នករាល់គ្នាដើរយ៉ាងណា កុំឲ្យដើរដូចជាមនុស្សឥតប្រាជ្ញាឡើយ ត្រូវតែដើរដោយមានប្រាជ្ញាវិញ ទាំងលៃយកឱកាសឲ្យទាន់ពេលផង ពីព្រោះសម័យនេះអាក្រក់ណាស់”(អេភេសូរ ៥:១៥-១៦)។ ប្រាជ្ញារបស់ព្រះអង្គ បង្រៀនយើងឲ្យរស់នៅជារៀងរាល់ថ្ងៃ ដោយមានទឹកចិត្ត និងការប្រុងប្រយ័ត្ន ក្នុងការស្តាប់បង្គាប់ព្រះអង្គ ស្រឡាញ់អ្នកជិតខាង និងចូលរួមនៅក្នុងព្រះរាជកិច្ចប្រោសលោះរបស់ព្រះអង្គ ក្នុងលោកិយ។ គួរឲ្យស្តាយណាស់ យើងងាយនឹងព្រងើយកន្តើយចំពោះការបង្រៀនរបស់ប្រាជ្ញាព្រះអង្គ ហើយប្រើពេលវេលារបស់យើង ដោយភាពល្ងង់ខ្លៅ(ខ.១៧) ដោយខ្ជះខ្ជាយជីវិតយើងជាច្រើនឆ្នាំ នៅក្នុងការដេញតាមភាពអាត្មានិយម និងសេចក្តីហិនវិនាស។
បទគម្ពីរនេះមិនបានបង្រៀនយើងឲ្យមានការភ័យខ្លាចជ្រុលពេក អំពីការប្រើប្រាស់ពេលវេលានោះទេ តែគ្រាន់តែបង្គាប់យើងឲ្យដើរតាមព្រះ ដោយការស្តាប់បង្គាប់ និងការទុកចិត្ត។ ព្រះអង្គនឹងជួយយើង ប្រើពេលវេលាក្នុងជីវិតយើង ជារៀងរាលថ្ងៃ ឲ្យមានប្រយោជន៍បំផុត។—Winn Collier
តើពេលវេលាមានតម្លៃប៉ុណ្ណា ចំពោះអ្នក? តើអ្នកអាចប្រើពេលវេលា ឲ្យមានប្រយោជន៍បំផុត នៅថ្ងៃនេះ យ៉ាងដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យប្រើពេលវេលាឲ្យមានប្រយោជន៍បំផុត ក្នុងការរស់នៅជារៀងរាល់ថ្ងៃ។
គម្រោងអានព្រះគម្ពីររយៈពេល១ឆ្នាំ: យេរេមា ២៤-២៦ និង ទីតុស ២