អេសាយ ២៦:១-៨
ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្តីសុខពេញខ្នាត ដោយព្រោះគេទុកចិត្តនឹងទ្រង់។ អេសាយ ២៦:៣
កូនប្រុសខ្ញុំឈ្មោះ ហ្សាវា(Xavier) មានកម្ពស់១ម៉ែត្រ៩០។ គាត់បានចាប់លើកកូនប្រុសគាត់ ឈ្មោះហ្សារាន(Xarian) ដែលជាក្មេងទើបចេះដើរតេសតាស់។ គាត់លើកកូនប្រុសគាត់ឡើងទៅលើយ៉ាងងាយស្រួល ដោយកាន់ជើងដ៏តូចល្អិតរបស់កូនប្រុសគាត់ជាប់។ គាត់ក៏បានលាតសន្ធឹងដៃដ៏វែងរបស់គាត់ ដោយលើកទឹកចិត្តកូនប្រុសគាត់ ឲ្យទប់លំនឹងខ្លួនឲ្យជាប់នៅលើបាតដៃរបស់គាត់ ប៉ុន្តែ ដៃគាត់ក៏បានត្រៀមជាស្រេច ដើម្បីចាប់កូនប្រុសគាត់ បើសិនជាចាំបាច់។ ហ្សារានក៏បានក្រោកឈរនៅលើបាតដៃរបស់គាត់ រួចទម្លាក់ដៃចុះ ដោយទឹកមុខញញឹម ហើយភ្នែកគាត់មើលចំមុខរបស់ឪពុកគាត់ ដោយមិនងាកបែរទៅណា។
ហោរាអេសាយ ក៏បានប្រកាសអំពីអត្ថប្រយោជន៍នៃការផ្តោតចិត្ត ទៅលើព្រះវរបិតានៃយើង ដែលគង់នៅស្ថានសួគ៌យ៉ាងដូចនេះថា “ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្តីសុខពេញខ្នាត ដោយព្រោះគេទុកចិត្តនឹងទ្រង់”(អេសាយ ២៦:៣)។ គាត់បានលើកទឹកចិត្តរាស្រ្តរបស់ព្រះ ឲ្យប្តេជ្ញាចិត្តស្វែងរកបំណងព្រះទ័យព្រះអង្គ ក្នុងព្រះគម្ពីរ ហើយបន្តប្រកបស្និទ្ធស្នាលជាមួយព្រះអង្គ តាមរយៈការអធិស្ឋាន និងការថ្វាយបង្គំផងដែរ។ មនុស្សស្មោះត្រង់ទាំងនោះ នឹងបានដកពិសោធន៍នឹងការមានទំនុកចិត្តលើព្រះ ដែលបានកើតឡើង តាមរយៈការប្រកបស្និទ្ធស្នាលដ៏រឹងមាំជាមួយព្រះវរបិតា។
ក្នុងនាមយើងជាកូនស្ងួនភ្ងារបស់ព្រះអង្គ យើងអាចប្រកាសដោយចិត្តក្លាហានថា “ចូរទុកចិត្តដល់ព្រះយេហូវ៉ាជាដរាបចុះ ដ្បិតព្រះដ៏ជាព្រះយេហូវ៉ាទ្រង់ជាថ្មដាដ៏នៅអស់កល្បជានិច្ច”(ខ.៤)។ តើហេតុអ្វី? ព្រោះព្រះវរបិតានៃយើងដែលគង់នៅស្ថានសួគ៌ ជាព្រះដែលយើងអាចទុកចិត្តបាន។ ព្រះអង្គ និងព្រះបន្ទូលរបស់ព្រះអង្គ មិនដែលប្រែប្រួលឡើង។
ពេលណាយើងមើលទៅព្រះវរបិតានៃយើងដែលគង់នៅស្ថានសួគ៌ ដោយមិនងាករេ ព្រះអង្គនឹងជួយយើងឲ្យឈរយ៉ាងមាំមួននៅក្នុងព្រះហស្តព្រះអង្គ។ យើងអាចទុកចិត្តថា ព្រះអង្គនឹងនៅតែស្រឡាញ់ ស្មោះត្រង់ និងល្អចំពោះយើងជារៀងរហូត!—Xochitl Dixon
តើការមានគំនិតជាប់តាមព្រះ នាំឲ្យអ្នកមានសន្តិភាពក្នុងចិត្តដូចម្តេចខ្លះ? តើអ្នកអាចផ្តោតចិត្តទៅលើព្រះអង្គ ពេញមួយថ្ងៃ ដោយរបៀបណា?
ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ ដែលបានប្រើព្រះគម្ពីរដើម្បីក្រើនរំឭកទូលបង្គំ
អំពីចរិតលក្ខណៈរបស់ព្រះអង្គដែលមិនចេះប្រែប្រួល និងអំពីសេចក្តីស្មោះត្រង់ដ៏អស់កល្បរបស់ព្រះអង្គ។
For further study, read God Answers the Silly Prayers Too at DiscoverySeries.org.
គម្រោងអានព្រះគម្ពីររយៈពេល១ឆ្នាំ: យេរេមា ៣០-៣១ និង ភីលេម៉ូន
