ទំនុកដំកើង ២៣
ព្រះយេហូវ៉ាទ្រង់ជាអ្នកគង្វាលខ្ញុំ ខ្ញុំនឹងមិនខ្វះអ្វីសោះ។ ទំនុកដំកើង ២៣:១
មនុស្សជិត១សែន ៧ពាន់នាក់ បានឈមើលការប្រកួត នៅក្នុងពហុកីឡាដ្ឋានមួយ ដោយការរង់ចាំមើលលទ្ធផលផ្តាច់ព្រាត់ ខណៈពេលដែលលោកសេត ស្មល(Seth Small) ជាខ្សែប្រយុទ្ធនៃក្រុមកីឡាករបាល់ទាត់មហាវិទ្យាល័យ រដ្ឋតិចសាស់ A&M កំពុងកាន់កាប់ទីលានប្រកួត ដោយនៅសល់ពេលតែ២វិនាទីប៉ុណ្ណោះ។ ខណៈពេលដែលក្រុមA&Mរបស់គាត់ មានពិន្ទុស្មើគ្នា ៣៨ ទល់នឹង៣៨ ជាមួយនឹងក្រុមកីឡាករដែលល្អបំផុតប្រចាំប្រទេស ការទាត់បញ្ចូលទីដ៏ជោគជ័យ អាចជួយឲ្យក្រុមគាត់ទទួលបានជ័យជម្នះដែលគួរឲ្យស្ញប់ស្ញែង។ ពេលនោះ លោកស្មល ក៏បានទាត់បាល់ផ្លោតទៅមុខ ដោយទំនុកចិត្ត។ ពហុកីឡាដ្ឋានទាំងមូល ក៏បានផ្ទុះចេញជាសម្រែកអឺងកង បន្ទាប់ពីបាល់នោះបានហោះ តាមប្រឡោះបង្គោល ដែលនាំឲ្យក្រុមគាត់ឈ្នះការប្រកួត។
ពេលដែលអ្នកកាសែតសួរគាត់ថា តើគាត់បានត្រៀមខ្លួនយ៉ាងដូចម្តេច សម្រាប់ពេលដ៏តានតឹងនោះ គាត់ក៏បានឆ្លើយថា គាត់បានសូត្រខទី១ នៃបទគម្ពីរទំនុកដំកើង២៣ ម្តងហើយម្តងទៀតថា “ព្រះយេហូវ៉ាទ្រង់ជាអ្នកគង្វាលខ្ញុំ ខ្ញុំនឹងមិនខ្វះអ្វីសោះ”។ នៅពេលដែលលោកស្មលត្រូវការកម្លាំង និងការធានា ដើម្បីឲ្យគាត់មានជំនឿរឹងមាំ គាត់ក៏បានរំឭកខ្លួនឯងថា ព្រះអង្គគឺជាអ្នកគង្វាលល្អ។
បទគម្ពីរទំនុកដំកើងជំពូក២៣ ជាបទគម្ពីរទំនុកដំកើងដ៏ពេញនិយម ដោយសារបទគម្ពីរនេះបានធានាយើងថា យើងអាចមានសន្តិភាពក្នុងចិត្ត និងការកម្សាន្តចិត្ត ដោយសារយើងមានអ្នកគង្វាលដែលមានក្តីស្រឡាញ់ និងអាចឲ្យយើងទុកចិត្តបាន ដែលតែងតែយកព្រះទ័យទុកដាក់ចំពោះយើងយ៉ាងសកម្ម។ ស្តេចដាវីឌបានធ្វើបន្ទាល់ អំពីធាតុពិតនៃការភ័យខ្លាច ក្នុងស្ថានភាពដ៏តានតឹង និងពិបាក ក៏ដូចជាធ្វើបន្ទាល់អំពីការកម្សាន្តចិត្ត ដែលទ្រង់បានទទួលពីព្រះអម្ចាស់ផងដែរ(ខ.៤)។ ពាក្យ “កម្សាន្តចិត្ត” ក្នុងបទគម្ពីរនេះ គឺសំដៅទៅលើការធានា ឬការប្រទាននូវទំនុកចិត្ត និងចិត្តក្លាហាន ដើម្បីឲ្យយើងបន្តដំណើរទៅមុខ ដោយសារព្រះវត្តមានរបស់ព្រះអង្គដឹកនាំយើង។
ពេលណាយើងដើរចូលក្នុងកាលៈទេសៈដែលមានបញ្ហាប្រឈម ដោយមិនដឹងថា យើងនឹងទទួលលទ្ធផលបែបណា ចូរយើងមានចិត្តក្លាហាន ដោយរំឭកខ្លួនម្តងហើយម្តងទៀតថា ព្រះដែលជាអ្នកគង្វាលល្អ កំពុងដើរជាមួយយើង។—Lisa M. Samra
តើអ្នកបានដកពិសោធន៍ជាមួយព្រះអង្គ ក្នុងលក្ខណៈព្រះអង្គជាអ្នកគង្វាលដែលមានក្តីស្រឡាញ់យ៉ាងណាខ្លះ?
តើការថែរក្សារបស់ព្រះអង្គ ដែលអ្នកអាចទុកចិត្ត បាននាំឲ្យអ្នកមានចិត្តក្លាហានយ៉ាងណាខ្លះ?
ឱព្រះវរបិតាដែលគង់នៅស្ថានសួគ៌ សូមព្រះអង្គជួយទូលបង្គំឲ្យមានចិត្តក្លាហាន ដោយដឹងថា ព្រះអង្គជាអ្នកគង្វាលដែលមានក្តីស្រឡាញ់។
Visit ODBU.org/ML103 to learn how to gain wisdom and leadership skills from our loving Shepherd.
គម្រោងអានព្រះគម្ពីររយៈពេល១ឆ្នាំ: យេរេមា ៣៤-៣៦ និង ហេព្រើរ ២
