តាមពេលវេលារបស់ព្រះអង្គ
ដោយLeslie Koh
November 7, 2024
លោកុប្បត្តិ ៨:១-៥,១៣-១៨
ឱព្រះយេហូវ៉ាអើយ ទូលបង្គំបានទុកចិត្តដល់ទ្រង់ ... ឯថ្ងៃអាយុរបស់ទូលបង្គំ សុទ្ធតែនៅក្នុងព្រះហស្តទ្រង់។ ទំនុកដំកើង ៣១:១៤-១៥
អ្នកស្រីមែគ(Mag) បានទន្ទឹងរង់ចាំពេលដែលគាត់នឹងបានធ្វើដំណើរទៅបរទេស តាមការគ្រោងទុក។ ប៉ុន្តែ តាមធម្មតា គាត់តែងតែអធិស្ឋានជាមុនសិន។ មិត្តភក្តិរបស់គាត់ម្នាក់ក៏បានសួរគាត់ថា ការធ្វើដំណើរនោះ គ្រាន់តែជាការសម្រាកលំហែទេ ហេតុអ្វីគាត់ចាំបាច់ត្រូវទូលសូមប្រាជ្ញាពីព្រះ។ ទោះជាយ៉ាងណាក៏ដោយ អ្នកស្រីមែកជឿថា គាត់ត្រូវថ្វាយអ្វីៗទាំងអស់ដល់ព្រះអង្គ។ នៅពេលនោះ គាត់បានទទួលការបណ្តាលចិត្តពីព្រះអង្គ ឲ្យលុបគម្រោងធ្វើដំណើរនោះចោល។ គាត់ក៏បានលុបចោល ហើយក្រោយមក គាត់ក៏បានដឹងថា មានជំងឺរាតត្បាតមួយកំពុងរីករាលដាល ក្នុងប្រទេសនោះ ចំពេលដែលគាត់បានគ្រោងនឹងធ្វើដំណើរទៅទីនោះ។ គាត់ក៏បានដឹងថា ព្រះអម្ចាស់កំពុងការពារគាត់។
លោកណូអេ ក៏បានពឹងផ្អែកលើការការពាររបស់ព្រះ ខណៈពេលដែលគាត់ និងគ្រួសារគាត់ បានរង់ចាំ នៅក្នុងទូកធំអស់រយៈពេលជិត២ខែ បន្ទាប់ពីទឹកជំនន់បានស្រក។ បន្ទាប់ពីគាត់បានស្នាក់នៅក្នុងទូកធំមិនអាចទៅណារួច អស់រយៈពេលជាង១០ខែ គាត់ប្រាកដជាមានចិត្តអន្ទះសាចង់ចេញក្រៅ។ ទីបំផុត “ទឹកបានរីងស្ងួតពីផែនដីអស់ទៅ ណូអេក៏បើកដំបូលទូកមើល ឃើញថាទឹកបានស្ងួតពីដីហើយ”(លោកុប្បត្តិ ៨:១៣)។ ប៉ុន្តែ លោកណូអេ មិនបានពឹងផ្អែកទៅលើការអ្វីដែលគាត់មើលឃើញប៉ុណ្ណោះទេ ផ្ទុយទៅវិញ គាត់បានចេញពីទូក នៅពេលដែលព្រះអម្ចាស់អនុញ្ញាតឲ្យគាត់ចេញទៅក្រៅ(ខ.១៥-១៩)។ គាត់បានទុកចិត្តថា ព្រះអម្ចាស់មានហេតុផលដ៏ល្អ ដែលត្រូវឲ្យគាត់បន្តរង់ចាំ គឺប្រហែលមកពីកាលនោះ ដីមិនទាន់មានសុវត្ថិភាពនៅឡើយ។
ពេលណាយើងអធិស្ឋាន សូមព្រះអង្គជួយយើង ក្នុងការសម្រេចចិត្តក្នុងការរស់នៅ ដោយពឹងផ្អែកលើប្រាជ្ញាដែលព្រះអង្គប្រទាន និងរង់ចាំការដឹកនាំរបស់ព្រះអង្គ យើងអាចទុកចិត្តលើផែនការរបស់ព្រះអង្គ ដោយដឹងថា ព្រះអាទិករដែលមានប្រាជ្ញាជ្រាបថា មានការអ្វីខ្លះដែលល្អបំផុតសម្រាប់យើង។ គឺដូចអ្នកនិពន្ធបទគម្ពីរទំនុកដំកើងបានប្រកាសថា “ឱព្រះយេហូវ៉ាអើយ ទូលបង្គំបានទុកចិត្តដល់ទ្រង់ ... ឯថ្ងៃអាយុរបស់ទូលបង្គំ សុទ្ធតែនៅក្នុងព្រះហស្តទ្រង់”(ទំនុកដំកើង ៣១:១៤-១៥)។—Leslie Koh
តើអ្នកបានទូលសូមព្រះអម្ចាស់នូវការដឹកនាំ ក្នុងការសម្រេចចិត្តដូចម្តេចខ្លះ?
តើអ្នកអាចទុកចិត្តព្រះអង្គ និងរង់ចាំការដឹកនាំរបស់ព្រះអង្គដូចម្តេចខ្លះ?
ឱព្រះវរបិតា សូមព្រះអង្គប្រទានទូលបង្គំនូវប្រាជ្ញា និងការដឹកនាំ ដើម្បីធ្វើការសម្រេចចិត្ត
តាមបំណងព្រះទ័យ និងផ្លូវរបស់ព្រះអង្គ ដ្បិតទូលបង្គំទុកចិត្តលើផែនការ ដែលព្រះអង្គមានសម្រាប់ជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ: យេរេមា ៤៣-៤៥ និង ហេព្រើរ ៥