ហេព្រើរ ៩:២៣-២៨
ដោយព្រោះបានតម្រូវឲ្យមនុស្សទាំងអស់ស្លាប់១ដង រួចសឹមជាប់សេចក្តីជំនុំជំរះ។ ហេព្រើរ ៩:២៧
កាលពីថ្ងៃទី១២ ខែវិច្ឆិកា ឆ្នាំ១៩៦៣ លោក ចន អ៊ែហ្វ ខេនេឌី(John F. Kennedy) ជាប្រធានាធិបតីអាមេរិក លោកអាល់ដូស ហាក់លេយ(Aldous Huxley) ជាអ្នកនិពន្ធ និងទស្សនវិទូ និងលោកស៊ី អ៊ែស លូអីស(C. S. Lewis) ជាអ្នកការពារជំនឿគ្រីស្ទាន សុទ្ធតែបានលាចាកលោកក្នុងថ្ងៃតែមួយ។ បុរសដ៏ល្បីល្បាញទាំង៣នាក់នេះ បានប្រកាន់ខ្ជាប់នូវទស្សនវិជ្ជាខុសគ្នាយ៉ាងខ្លាំង ក្នុងការរស់នៅ។ លោកហាក់លេយ ជាអ្នកមិនជឿ ហើយក៏មិនបដិសេធថា ព្រះមានពិតមែន ហើយជាអ្នកនិយមទស្សនវិជ្ជារបស់អាស៊ី។ ចំណែកលោក ខេនេឌីវិញ គឺជាសាសនិករ៉ូម៉ាំងកាតូលិក ប៉ុន្តែ គាត់បានប្រកាន់ខ្ជាប់តាមទស្សនវិជ្ជាបែបមនុស្សជាតិនិយម។ រីឯលោកលូអ៊ីសវិញ គាត់គឺជាអតីតអ្នកបដិសេធថាព្រះមានពិតមែន ប៉ុន្តែ ក្រោយមក គាត់បានក្លាយជាអ្នកជឿព្រះក្នុងនិកាយអ៊ែងគ្លិខិន ហើយក៏ក្លាយជាអ្នកការពារសេចក្តីជំនឿគ្រីស្ទាន ដោយមិនខ្លាចរអែងចិត្តនរណាឡើយ។ សេចក្តីស្លាប់មិនរើសមុខមនុស្សឡើយ ខណៈពេលបុរសដ៏ល្បីល្បាញទាំងបីបានជួបសេចក្តីស្លាប់ នៅថ្ងៃខែតែមួយ នៅទីកន្លែងផ្សេងគ្នា។
ព្រះគម្ពីរប៊ីបបានចែងថា សេចក្តីស្លាប់បានចាប់ផ្តើមកើតមានចំពោះមនុស្សជាតិ នៅពេលដែលលោកអ័ដាម និងនាងអេវ៉ាមិនស្តាប់បង្គាប់ព្រះ កាលពួកគេកំពុងរស់នៅក្នុងសួនច្បាអេដែន(លោកុប្បត្តិ ៣) នេះជាការការពិតដ៏សោកសៅ ដែលមានផលប៉ះពាល់មកលើប្រវត្តិសាស្រ្តមនុស្សជាតិទាំងមូល។ សេចក្តីស្លាប់កើតឡើងចំពោះមនុស្សទាំងអស់ ដោយមិនរើសមុខ ជាការណាត់ជួប ដែលគ្មាននរណាម្នាក់អាចគេចវេសបានទេ។ គឺដូចដែលបទគម្ពីរហេព្រើរ ៩:២៧ បានចែងថា ព្រះអម្ចាស់ “បានតម្រូវឲ្យមនុស្សទាំងអស់ស្លាប់១ដង រួចសឹមជាប់សេចក្តីជំនុំជំរះ”។
តើយើងអាចស្វែងរកសេចក្តីសង្ឃឹមនៅកន្លែងណា នៅពេលដែលយើងដឹងថា យើងត្រូវជួបសេចក្តីស្លាប់ និងរឿងដែលនឹងកើតឡើងបន្ទាប់ពីយើងស្លាប់? គឺយើងស្វែងរកសេចក្តីសង្ឃឹម នៅក្នុងព្រះគ្រីស្ទ។ បទគម្ពីររ៉ូម ៦:២៣ បានបកស្រាយអំពីសេចក្តីពិតនេះ យ៉ាងល្អឥតខ្ចោះថា “ដ្បិតឈ្នួលរបស់អំពើបាប នោះជាសេចក្តីស្លាប់ តែអំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា”។ តើធ្វើដូចម្តេចឲ្យយើងអាចទទួលអំណោយទាននេះពីព្រះ? យើងអាចទទួលបាន ដោយសារព្រះយេស៊ូវជាព្រះរាជបុត្រានៃព្រះ បានសុគត ដើម្បីបំផ្លាញសេចក្តីស្លាប់ ហើយមានព្រះជន្មរស់ឡើងវិញ ដើម្បីប្រទានយើងនូវជីវិតអស់កល្បជានិច្ច(២ធីម៉ូថេ ១:១០)។—Bill Crowder
តើអ្នកមានអារម្មណ៍យ៉ាងណា នៅពេលដែលអ្នកពិចារណា អំពីការណាត់ជួបជាមួយសេចក្តីស្លាប់?
តើអ្នកបានត្រៀមខ្លួនសម្រាប់សេចក្តីស្លាប់យ៉ាងដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការចាត់ព្រះរាជបុត្រាព្រះអង្គ ឲ្យមកបង់ថ្លៃលោះទូលបង្គំ
ឲ្យរួចពីបាប ដោយសុគតនៅលើឈើឆ្កាង។ ទូលបង្គំសូមអរព្រះគុណព្រះអង្គ សម្រាប់ការប្រទានជីវិតអស់កល្បជានិច្ច។
Learn more here: ODB.org/personal-relationship-with-god.
គម្រោងអានព្រះគម្ពីររយៈពេល១ឆ្នាំ: អេសេគាល ១៦-១៧ និង យ៉ាកុប ៣
