២ពេត្រុស ១:៣-១១
ដោយហេតុនោះបានជាត្រូវឲ្យអ្នករាល់គ្នា បន្ថែមឲ្យមានសេចក្តីឧស្សាហ៍ដែរ ដើម្បីឲ្យសេចក្តីជំនឿបានទៀងត្រង់។ ២ពេត្រុស ១:៥
លោកដូមីនិក បួស៍(Dominique Bouhours) ជាគ្រូបង្រៀនវេយ្យាករណ៍ នៅសតវត្សរ៍ទី១៧។ នៅថ្ងៃគាត់លាចាកលោក ក្រុមគ្រួសារបានជួបជុំគ្នា នៅជុំវិញគាត់ ដែលកំពុងគេងនៅលើគ្រែ។ គេឮល្បីថា មុនពេលគាត់ផុតដង្ហើម គាត់បាននិយាយពាក្យចុងក្រោយថា “ឃ្លា ខ្ញុំជិតស្លាប់ហើយ និងឃ្លា ខ្ញុំនឹងស្លាប់ក្នុងពេលដ៏ខ្លីខាងមុខ សុទ្ធតែត្រូវតាមវេយ្យាករណ៍ដូចគ្នា”។ តើមាននរណាខ្វល់អំពីវេយ្យាករណ៍ នៅពេលដែលខ្លួនហៀបនឹងផុតដង្ហើមនៅលើគ្រែ? គឺមានតែអ្នកដែលខ្វល់អំពីវេយ្យាករណ៍ពេញមួយជីវិតទេ ដែលមានការផ្ដោតចិត្តយ៉ាងដូចនេះ។
នៅពេលដែលយើងឈានដល់វ័យចាស់ យើងពិបាកលះបង់ទម្លាប់ចាស់របស់យើង។ ការសម្រេចចិត្តជាច្រើន ដែលយើងមានពេញមួយជីវិត ប្រែក្លាយជាទម្លាប់ក្នុងការរស់នៅ ហើយទម្លាប់នោះបង្កើតឲ្យមានចរិតលក្ខណៈល្អ ឬអាក្រក់ ក្នុងជីវិតយើង។ អត្តសញ្ញាណរបស់យើង ដែលបង្ហាញថា យើងជានរណា មានការផ្លាស់ប្តូរ ដោយសារការសម្រេចចិត្តរបស់យើងនោះឯង។
ការបង្កើតទម្លាប់ដែលគោរពប្រតិបត្តិព្រះ មានភាពងាយស្រួលជាង នៅពេលដែលចរិតលក្ខណៈរបស់យើងនៅក្មេងខ្ចី ហើយងាយបត់បែន។ ហេតុនេះហើយសាវ័កពេត្រុសបានជំរុញយើងថា “ហើយដោយហេតុនោះបានជាត្រូវឲ្យអ្នករាល់គ្នា បន្ថែមឲ្យមានសេចក្តីឧស្សាហ៍ដែរ ដើម្បីឲ្យសេចក្តីជំនឿបានទៀងត្រង់ ឲ្យសេចក្តីទៀងត្រង់បានដំរិះ ឲ្យដំរិះបានចេះអត់សង្កត់ ឲ្យសេចក្តីអត់សង្កត់បានខ្ជាប់ខ្ជួន ឲ្យសេចក្តីខ្ជាប់ខ្ជួនបានចេះគោរពប្រតិបត្តិដល់ព្រះ ឲ្យសេចក្តីគោរពប្រតិបត្តិ បានចេះរាប់អានគ្នាជាបងប្អូន ហើយឲ្យសេចក្តីរាប់អានគ្នាបានសេចក្តីស្រឡាញ់ថែមទៀត”(២ពេត្រុស ១:៥-៧)។ ចូរយើងអនុវត្តតាមព្រះបន្ទូល ដើម្បីឲ្យមានចរិតលក្ខណៈល្អៗទាំងអស់នេះ ហើយយើងនឹង“ចូលទៅក្នុងនគរដ៏នៅអស់កល្បជានិច្ច របស់ព្រះយេស៊ូវគ្រីស្ទ ជាព្រះអម្ចាស់ ហើយជាព្រះអង្គសង្គ្រោះនៃយើងរាល់គ្នា”(ខ.១១)។
តាមការបង្រៀនរបស់សាវ័កពេត្រុស តើអ្នកមានចរិតលក្ខណៈមួយណា ដែលមានភាពរស់រវើកខ្លាំងជាងគេ? តើមានចរិតលក្ខណៈមួយណា ដែលអ្នកចាំបាច់ត្រូវកែលម្អក្នុងជីវិតអ្នក? ដែលយើងបានក្លាយជាមនុស្សប្រភេទណាមួយហើយ គឺយើងមិនអាចកែប្រែបានទេ គឺមានតែព្រះយេស៊ូវទេដែលអាចកែប្រែបាន។ ចូរទូលសូមព្រះអង្គឲ្យកែប្រែ និងចម្រើនកម្លាំងអ្នក។ ការផ្លាស់ប្រែនេះអាចកើតមានបន្តិចម្តងៗ និងមានការពិបាក ប៉ុន្តែ ព្រះយេស៊ូវមានជំនាញ ក្នុងការផ្គត់ផ្គង់នូវចំណុចអ្វីដែលយើងខ្វះខាត។ ចូរទូលសូមព្រះអង្គ ឲ្យកែប្រែចរិតលក្ខណៈរបស់អ្នក ដើម្បីឲ្យអ្នកបានផ្លាស់ប្រែ មានចរិតលក្ខណៈកាត់តែដូចព្រះអង្គ។—Mike Wittmer
តើមានចរិតលក្ខណៈណា ដែលអ្នកចាំបាច់ត្រូវកែប្រែខ្លាំងជាងគេ? តើអ្នកអាចស្វែងរកព្រះចេស្តា និងការផ្គត់ផ្គង់ ហើយចាប់ផ្តើមមានការផ្លាស់ប្រែដូចម្តេចខ្លះ?
ឱព្រះយេស៊ូវ សូមព្រះអង្គធ្វើឲ្យទូលបង្គំមានលក្ខណៈកាន់តែដូចព្រះអង្គ ដើម្បីឲ្យអ្នកដទៃបានឃើញព្រះអង្គច្បាស់ ក្នុងជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ: អេសេគាល ២២-២៣ និង ១ពេត្រុស ១
