ការធ្វើការជាដៃគូជាមួយព្រះ
ដោយSheridan Voysey
November 25, 2024
ម៉ាកុស ៦:៣៥-៤៤
តែទ្រង់មានព្រះបន្ទូលឆ្លើយថា ចូរអ្នករាល់គ្នាឲ្យគេបរិភោគទៅ។ ម៉ាកុស ៦:៣៧
កាលមិត្តភក្តិខ្ញុំ និងស្វាមីរបស់គាត់ មិនអាចមានផ្ទៃពោះ វេជ្ជបណ្ឌិតក៏បានណែនាំគាត់ ឲ្យទទួលការព្យាបាលបែបវេជ្ជសាស្រ្ត ដើម្បីឲ្យអាចមានកូន។ មិត្តភក្តិខ្ញុំមានការស្ទាក់ស្ទើរ។ គាត់បានសួរខ្លួនឯងថា “តើការអធិស្ឋានមិនមានអំណាចគ្រប់គ្រាន់ ដើម្បីដោះស្រាយបញ្ហារបស់យើងទេឬ?” “តើខ្ញុំពិតជាចាំបាច់ត្រូវទទួលការព្យាបាលបែបវេជ្ជសាស្រ្តនេះមែនទេ?” មិត្តភក្តិរបស់ខ្ញុំកំពុងព្យាយាមស្វែងយល់ អំពីរបៀបដែលព្រះអម្ចាស់ អាចធ្វើការ តាមរយៈការងាររបស់មនុស្ស។
រឿងព្រះយេស៊ូវប្រទានអាហារដល់ហ្វូងមនុស្ស អាចជួយបកស្រាយចម្ងល់នេះបាន(ម៉ាកុស ៦:៣៥-៤៤)។ យើងប្រហែលបានដឹងថា រឿងនេះបានបញ្ចប់យ៉ាងដូចម្តេច គឺដោយសារមនុស្សរាប់ពាន់នាក់បានទទួលអាហារ ដោយការអស្ចារ្យ ដែលព្រះយេស៊ូវបានធ្វើ ដោយប្រើនំប៉័ង និងត្រីតែបន្តិចបន្តួច(ខ.៤២)។ ប៉ុន្តែ ចូរយើងកត់សំគាល់ថា តើនរណាជាអ្នកចែកអាហារដល់ហ្វូងមនុស្ស? គឺពួកសាវ័ក(ខ.៣៧)។ ចុះក្រោយមកទៀត? គឺពួកសាវ័កដដែល(ខ.៣៩-៤៣)។ គឺដូចដែលព្រះយេស៊ូវបង្គាប់ពួកគេថា “ចូរអ្នករាល់គ្នាឲ្យគេបរិភោគទៅ”(ខ.៣៧)។ ព្រះយេស៊ូវបានធ្វើការអស្ចារ្យ ប៉ុន្តែ ការអស្ចារ្យនោះកើតឡើង នៅពេលដែលពួកសាវ័កធ្វើតាមបង្គាប់ព្រះអង្គ។
ភោគផលល្អ គឺជាអំណោយមកព្រះ(ទំនុកដំកើង ៦៥:៩-១០) ប៉ុន្តែ កសិករត្រូវតែធ្វើការដាំដុះ។ ព្រះយេស៊ូវបានសន្យាលោកពេត្រុសថា គាត់នឹងចាប់ត្រីបានច្រើន តែអ្នកនេសាទរូបនេះ ត្រូវតែទម្លាក់សំណាញ់ចូលទៅក្នុងទឹក(លូកា ៥:៤-៦)។ ព្រះអម្ចាស់អាចថែរក្សាភពផែនដី និងធ្វើការអស្ចារ្យ ដោយគ្មានយើងក៏បាន តែព្រះអង្គបានសម្រេចព្រះទ័យធ្វើការជាដៃគូជាមួយមនុស្សជាតិ។
មិត្តភក្តិរបស់ខ្ញុំក៏បានឆ្លងកាត់ការព្យាបាលនោះ ហើយក្រោយមក ពួកគេអាចមានកូនដោយជោគជ័យ។ យើងប្រហែលមិនចាត់ទុកការព្យាបាលនេះជាការអស្ចារ្យទេ តែរឿងនេះបានផ្តល់ឲ្យនូវមេរៀនដ៏សំខាន់សម្រាប់ខ្ញុំ និងមិត្តភក្តិរបស់ខ្ញុំ។ ព្រះអម្ចាស់ច្រើនតែធ្វើការអស្ចារ្យ តាមរយៈវិធីសាស្រ្តដែលព្រះអង្គបានដាក់នៅក្នុងដៃរបស់យើង។—Sheridan Voysey
តើអ្នកមានចិត្តចង់អធិស្ឋាន ដោយមិនធ្វើអ្វីសោះ នៅពេលណាខ្លះ? តើព្រះអម្ចាស់កំពុងត្រាស់ហៅអ្នក ឲ្យធ្វើកិច្ចការអ្វី នៅពេលនេះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានរាប់បញ្ចូលទូលបង្គំ ឲ្យមានចំណែកនៅក្នុងកិច្ចការដ៏អស្ចារ្យរបស់ព្រះអង្គ។
សូមព្រះអង្គប្រើអ្វីដែលទូលបង្គំមានក្នុងដៃទូលបង្គំ ហើយធ្វើការអស្ចារ្យតាមរយៈទូលបង្គំ។
គម្រោងអានព្រះគម្ពីររយៈពេល១ឆ្នាំ: អេសេគាល ២៧-២៩ និង ១ពេត្រុស ៣