ការអធិស្ឋានសូមព្រះទ័យព្រះអង្គបានសម្រេច
ដោយKatara Patton
December 4, 2024
លូកា ២២:៤១-៤៤
ឱព្រះវរបិតាអើយ បើសិនជាទ្រង់សព្វព្រះហឫទ័យ នោះសូមយកពែងនេះចេញពីទូលបង្គំទៅ ប៉ុន្តែ កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ។ លូកា ២២:៤២
កាលខ្ញុំទើបទទួលជឿព្រះយេស៊ូវ មានពេលមួយ ខ្ញុំបានបើកមើលព្រះគម្ពីរប៊ីបសម្រាប់សិក្សាប្រចាំថ្ងៃ ហើយក៏បានអានចំខគម្ពីរដែលខ្ញុំធ្លាប់បានឮកាលពីមុនមកថា “ចូរសូម នោះតែងនឹងឲ្យមកអ្នក”(ម៉ាថាយ ៧:៧)។ អត្ថបទពន្យល់ ក្នុងព្រះគម្ពីរនោះបានបកស្រាយថា អ្វីដែលយើងពិតជាគួរតែទូលសូមព្រះ គឺត្រូវសូមឲ្យចិត្តរបស់យើង មានភាពសមស្របនឹងបំណងព្រះទ័យព្រះអង្គ។ ពេលណាយើ ងព្យាយាមទូលសូមតាមបំណងព្រះទ័យព្រះអង្គ យើងអាចទុកចិត្តថា យើងនឹងទទួលបានអ្វីដែលយើងបានទូលសូមនោះ។ កាលនោះ ការបង្រៀននេះហាក់ដូចជាថ្មីសម្រាប់ខ្ញុំ ហើយខ្ញុំក៏បានអធិស្ឋានសូមបំណងព្រះទ័យព្រះបានសម្រេច ក្នុងជីវិតខ្ញុំ។
ក្រោយមក នៅថ្ងៃដដែលនោះ ខ្ញុំមានចិត្តរំភើបដោយការភ្ញាក់ផ្អើល ចំពោះឱកាសការងារមួយ ដែលខ្ញុំបានបដិសេធន៍នៅក្នុងគំនិតខ្ញុំរួចទៅហើយ ហើយខ្ញុំក៏បាននឹកចាំអំពីការអធិស្ឋានរបស់ខ្ញុំ។ អ្វីដែលខ្ញុំមិនបានគិតថាខ្ញុំចង់បាន តាមពិត វាប្រហែលជាផ្នែកមួយនៃបំណងព្រះទ័យដែលព្រះទ្រង់មានសម្រាប់ជីវិតខ្ញុំ។ ដូចនេះ ខ្ញុំក៏បានបន្តអធិស្ឋាន ហើយទីបំផុតក៏បានទទួលយកការងារនោះ។
រឿងនេះបានធ្វើឲ្យខ្ញុំនឹកចាំ អំពីពេលដែលព្រះយេស៊ូវបានធ្វើជាគំរូ សម្រាប់យើង នៅក្នុងពេលដែលសំខាន់ជាង ដ៏អស់កល្បជានិច្ច។ មុនពេលគេក្បត់ព្រះអង្គ ហើយព្រះអង្គត្រូវគេចាប់ខ្លួន ហើយយកទៅឆ្កាង ព្រះអង្គបានអធិស្ឋានថា “ឱព្រះវរបិតាអើយ បើសិនជាទ្រង់សព្វព្រះហឫទ័យ នោះសូមយកពែងនេះចេញពីទូលបង្គំទៅ ប៉ុន្តែ កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ”(លូកា ២២:៤១)។ ការអធិស្ឋានរបស់ព្រះគ្រីស្ទមានពេញទៅដោយភាពតានតឹងយ៉ាងខ្លាំង ខណៈពេលដែលព្រះអង្គប្រឈមមុខដាក់ការឈឺចាប់ ខាងផ្លូវកាយ និងផ្លូវអារម្មណ៍(ខ.៤៤)។ តែព្រះអង្គនៅតែអាចអធិស្ឋានអស់ពីព្រះហឫទ័យថា សូមបំណងព្រះទ័យព្រះវរបិតាបានសម្រេច។
ការអធិស្ឋានសូមបំណងព្រះទ័យព្រះអង្គ បានសម្រេចក្នុងជីវិតខ្ញុំ បានក្លាយជាការអធិស្ឋានសំខាន់បំផុតរបស់ខ្ញុំ។ បានសេចក្តីថា ខ្ញុំប្រហែលជាចង់បានអ្វីដែលខ្ញុំមិនដឹងថា ខ្លួនឯងពិតជាចង់បាន ឬត្រូវការ។ ការងារដែលខ្ញុំមិនចង់បានពីដំបូង បានក្លាយជាការចាប់ផ្តើមនៃការធ្វើដំណើររបស់ខ្ញុំ ក្នុងការងារបោះពុម្ពផ្សាយសៀវភៅគ្រីស្ទបរិស័ទ។ ពេលខ្ញុំក្រឡេកមកក្រោយវិញ ខ្ញុំជឿថា បំណងព្រះទ័យព្រះសម្រាប់ជីវិតខ្ញុំ បានសម្រេចនៅក្នុងរឿងមួយនេះហើយ។—Katara Patton
តើអ្នកមានអ្វីនៅក្នុងចិត្ត ដែលអ្នកចង់អធិស្ឋាន? តើអ្នកជឿថា ព្រះអម្ចាស់កំពុងត្រាស់ហៅអ្នកឲ្យធ្វើកិច្ចការអ្វី?
ឱព្រះវរបិតា ដែលគង់នៅស្ថានសួគ៌ សូមព្រះអង្គដឹកនាំទូលបង្គំ ឲ្យធ្វើតាមបំណងព្រះទ័យព្រះអង្គ។
Visit ODBU.org/SF010 to learn how to discern and follow God’s calling in your life.
គម្រោងអានព្រះគម្ពីររយៈពេល១ឆ្នាំ: ដានីយ៉ែល ១-២ និង ១យ៉ូហាន ៤