អត្ថន័យនៃបុណ្យណូអែល
ដោយLisa Samra
December 6, 2024
ម៉ាថាយ ២៥:៣៤-៤០
ដែលអ្នករាល់គ្នាបានធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថា បានធ្វើដល់យើងដែរ។ ម៉ាថាយ ២៥:៤០
កម្មវិធីញាំអាហារពេលល្ងាច សម្រាប់ថ្ងៃណូអែល នៅព្រះវិហាររបស់ខ្ញុំនៅឆ្នាំមួយនោះ មានការអបអរវប្បធម៌របស់ភ្ញៀវមកពីក្រៅប្រទេស។ ខ្ញុំបានទះដៃដោយអំណរ តាមចង្វាក់ភ្លេងស្គរដាប៊ូកា និងសម្លេងចាប៉ី ខណៈពេលដែលក្រុមតន្ត្រីមកពីតំបន់មជ្ឈិមបូព៌ា បានច្រៀងបទណូអែលជាភាសារបស់ពួកគេ មានចំណងជើងថា “ឡាយឡាត អាល មីឡាដ”។ អ្នកចម្រៀងប្រចាំក្រុមនេះបានពន្យល់ថា ចំណងជើងនេះមានន័យថា “យប់ដែលព្រះយេស៊ូវប្រសូត្រ”។ ទំនុកច្រៀងរបស់បទនេះ បានរំឭកអ្នកស្តាប់ទាំងឡាយថា អត្ថន័យនៃបុណ្យណូអែល គឺមាននៅក្នុងការបម្រើអ្នកដទៃ តាមរបៀបផ្សេងៗ ដែលមានដូចជា ការឲ្យទឹកដល់អ្នកស្រេកទឹក ឬការកម្សាន្តចិត្តដល់អ្នកសោកសង្រេង។
បទចម្រៀងណូអែលមួយនេះទំនងជាបានដកស្រង់ចេញពីរឿងប្រៀបប្រដូច ដែលក្នុងនោះ ព្រះយេស៊ូវបានមានបន្ទូលសរសើរអ្នកដើរតាមព្រះអង្គ ដោយសារកិច្ចការដែលពួកគេបានធ្វើថ្វាយព្រះអង្គ ដូចជាការថ្វាយអាហារដល់អ្នកដែលស្រេកឃ្លាន ថ្វាយទឹកដល់អ្នកដែលស្រេកទឹក ហើយនៅកំដរ និងថែរក្សាអ្នកជំងឺ និងមនុស្សឯកោជាដើម(ម៉ាថាយ ២៥:៣៤-៣៦)។ ក្នុងរឿងប្រៀបប្រដូចនេះ ពួកគេមានការភ្ញាក់ផ្អើល ពេលដែលបានដឹងថា ពួកគេបានធ្វើកិច្ចការទាំងអស់នេះថ្វាយព្រះយេស៊ូវ ដោយមិនដឹងខ្លួន។ ព្រះអង្គក៏បានឆ្លើយតបថា “យើងប្រាប់អ្នករាល់គ្នាជាប្រាកដថា ដែលអ្នករាល់គ្នាបានធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថា បានធ្វើដល់យើងដែរ”(ខ.៤០)។
ក្នុងអំឡុងរដូវកាលនៃពិធីបុណ្យណូអែល ការលើកទឹកចិត្តឲ្យមានការជ្រួតជ្រាប ក្នុងពិធីបុណ្យណូអែល ច្រើនតែជាការលើកទឹកចិត្តឲ្យមានអាកប្បកិរិយាដែលសមស្រប នឹងអត្ថន័យនៃពិធីបុណ្យណូអែល។ បទចម្រៀងអំពីយប់ដែលព្រះយេស៊ូវប្រសូត្រ គឺបានរំឭកយើងថា យើងអាចអនុវត្តតាមអត្ថន័យពិតប្រាកដ នៃពិធីបុណ្យណូអែល ឲ្យយកចិត្តទុកដាក់ចំពោះអ្នកដទៃ។ ហើយអ្វីដែលអស្ចារ្យនោះគឺ ពេលណាយើងអនុវត្តតាមហើយ យើងមិនគ្រាន់តែបម្រើអ្នកដទៃ តែក៏បម្រើព្រះយេស៊ូវផងដែរ។—Lisa M. Samra
តើអ្នកបានយល់អត្ថន័យនៃបុណ្យណូអែលទេ? តើអ្នកនឹងបម្រើអ្នកដទៃ ក្នុងរដូវកាលនៃបុណ្យណូអែលដូចម្តេចខ្លះ?
ឱព្រះយេស៊ូវ សូមព្រះអង្គជួយទូលបង្គំ ឲ្យនឹកចាំ អំពីអត្ថន័យនៃថ្ងៃណូអែល ដែលព្រះអង្គបានធ្វើជាគំរូ
ដោយបានយាងចុះមកផែនដី មិនមែនដើម្បីឲ្យគេបម្រើ តែដើម្បីបម្រើគេវិញ។
គម្រោងអានព្រះគម្ពីររយៈពេល១ឆ្នាំ: ដានីយ៉ែល ៣-៤ និង ១យ៉ូហាន ៥