នៅពេលដែលមានការល្បួង និងការល្បងល
ដោយLeslie Koh
December 6, 2024
១កូរិនថូស ១០:១១-១៣
រីឯព្រះទ្រង់ក៏ស្មោះត្រង់ដែរ ទ្រង់មិនឲ្យកើតមានសេចក្តីល្បួងហួសកំឡាំងអ្នករាល់គ្នាឡើយ។ ១កូរិនថូស ១០:១៣
លោកស្ទែនលី(Stanley) មានចិត្តរីករាយ ចំពោះសេរីភាព និងភាពអាចបត់បែនបាន ដែលគាត់ទទួលបានពីការងារ ជាអ្នកបើកឡានតាក់ស៊ី។ គាត់អាចចាប់ផ្តើម និងឈប់សម្រាក នៅពេលណាក៏បាន ហើយគាត់មិនចាំបាច់ត្រូវរាយការណ៍ប្រាប់អំពីពេលវេលា និងការងាររបស់គាត់ ដល់នរណាម្នាក់ឡើយ។ តែគាត់ថា នេះជាផ្នែកដែលពិបាកបំផុត។
គាត់បានទទួលស្គាល់ដោយត្រង់ៗថា “ការងារនេះ បានផ្តល់ឱកាសឲ្យគាត់ងាយចាប់ផ្តើមទំនាក់ទំនងផិតក្បត់”។ គាត់ថា “មានមនុស្សគ្រប់ប្រភេទដែលបានឡើងជិះឡានតាក់ស៊ីរបស់ខ្ញុំ តែគ្មាននរណាម្នាក់ ដឹងថា ខ្ញុំកំពុងតែនៅកន្លែងណាទេ។ សូម្បីតែប្រពន្ធខ្ញុំក៏មិនដឹងដែរ”។ គាត់ក៏បានពន្យល់ថា វាមិនមែនជាការល្បួងដែលគាត់អាចជម្នះដោយងាយៗឡើយ ហើយមិត្តរួមអាជីពរបស់គាត់ជាច្រើនបានធ្លាក់ចូលការល្បួងនេះ។ គាត់ថា “ខ្ញុំមិនបានប្រព្រឹត្តខុសដូចពួកគេ ដោយសារខ្ញុំបានគិតថា ព្រះអម្ចាស់នឹងគិតយ៉ាងណាចំពោះខ្ញុំ ហើយភរិយាខ្ញុំនឹងមានអារម្មណ៍យ៉ាងណា នៅពេលដែលខ្ញុំប្រព្រឹត្តដូចពួកគេ។”
ព្រះដែលបានបង្កើតយើងម្នាក់ៗមក បានជ្រាបអំពីភាពកម្សោយ បំណងចិត្ត ហើយជ្រាបថា យើងងាយចាញ់ការល្បួងប៉ុណ្ណា។ ប៉ុន្តែ យើងអាចទូលសូមជំនួយពីព្រះអង្គ គឺដូចដែលបទគម្ពីរ ១កូរិនថូស ១០:១១-១៣ បានរំឭកយើង។ សាវ័កប៉ុលបានបង្រៀនយើងថា “ព្រះទ្រង់ក៏ស្មោះត្រង់ដែរ ទ្រង់មិនឲ្យកើតមានសេចក្តីល្បួងហួសកំឡាំងអ្នករាល់គ្នាឡើយ គឺនៅវេលាណាដែលត្រូវល្បួង នោះទ្រង់ក៏រៀបផ្លូវឲ្យចៀសរួច ដើម្បីឲ្យអ្នករាល់គ្នាអាចនឹងទ្រាំបាន”(ខ.១៣)។ “ផ្លូវសម្រាប់ចៀសរួច”នោះ អាចជាការភ័យខ្លាចដ៏សមហេតុផល ចំពោះផលវិបាក ការដឹងថាវាជាអ្វីដែលព្រះបានហាម ការនឹកចាំខគម្ពីរ ការបង្វែរអារម្មណ៍ទៅរកអ្វីដែលត្រឹមត្រូវ ។ល។ ពេលណាយើងទូលសូមកម្លាំងពីព្រះអង្គ ព្រះវិញ្ញាណព្រះអង្គនឹងបង្វែរភ្នែកយើង ឲ្យងាកចេញពីការអ្វីដែលកំពុងល្បួងយើង ហើយជួយយើងឲ្យមើលទៅរកច្រកចេញ ដែលព្រះអង្គបានប្រទានយើង។—Leslie Koh
តើអ្នកកំពុងជួបការល្បួងអ្វី នៅថ្ងៃនេះ? តើមានច្រកចេញអ្វី ដែលព្រះបានប្រទានអ្នក ដើម្បីនាំអ្នកដើរតាមផ្លូវត្រឹមត្រូវនិងបរិសុទ្ធរបស់ព្រះអង្គ?
ឱព្រះវរបិតា ព្រះអង្គស្គាល់ភាពកម្សោយរបស់ទូលបង្គំ។ សូមព្រះអង្គប្រទានទូលបង្គំនូវកម្លាំង
ដើម្បីជម្នះការល្បួង ហើយដើរជាមួយព្រះអង្គ តាមផ្លូវដ៏បរិសុទ្ធ និងនាំមកនូវជីវិត។
For further study, read Walking Free: Overcoming What Keeps Us from Jesus at DiscoverODB.org.
គម្រោងអានព្រះគម្ពីររយៈពេល១ឆ្នាំ: ដានីយ៉ែល ៥-៧ និង ២យ៉ូហាន