អេសាយ ៤៣:១-៥
កាលណាឯងដើរកាត់ទឹកធំ នោះអញនឹងនៅជាមួយ។ អេសាយ ៤៣:២
យុវជនក្មេងខ្ចីវ័យ១៩ឆ្នាំ បានចំណាយពេលពេញមួយថ្ងៃ នៅមន្ទីរពេទ្យ ដើម្បីពិនិត្យជំងឺដែលកំពុងធ្វើទុក្ខគាត់ ប៉ុន្តែ គាត់នៅតែមិនបានរកឃើញចម្លើយ។ ពេលគាត់ត្រឡប់មកផ្ទះវិញ ក្រុមគ្រួសារគាត់មានការបាក់ទឹកចិត្តណាស់។ តែពួកគាត់មានការភ្ញាក់ផ្អើលណាស់ ពេលដែលបានឃើញប្រអប់ដែលមានការតុបតែងយ៉ាងស្អាត នៅលើកាំជណ្តើរមុខផ្ទះ ដែលមានបទគម្ពីរអេសាយ ៤៣:២ ពីខាងមុខ។ នៅខាងក្នុងប្រអប់ ពួកគេក៏បានឃើញខគម្ពីរលើកទឹកចិត្តមួយចំនួន ដែលមិត្តភក្តិពួកគេបានសរសេរដោយផ្ទាល់ដៃ។ នៅម៉ោងបន្ទាប់ ពួកគេក៏បានចំណាយពេលទទួលការលើកទឹកចិត្តពីខគម្ពីរ និងពីឥរិយាបថរបស់មិត្តភក្តិទាំងនោះ ដែលចេះគិតអំពីទុក្ខលំបាករបស់ពួកគេ។
អ្នកដែលឆ្លងកាត់ពេលដ៏ពិបាក ឬបញ្ហាប្រឈមក្នុងគ្រួសារ តែងតែត្រូវការការលើកទឹកចិត្ត។ ការប្រើខគម្ពីរតិចតួច ឬច្រើនក្តី សុទ្ធតែអាចលើកទឹកចិត្តអ្នក មិត្តភក្តិ ឬសមាជិកគ្រួសារណាម្នាក់។ បទគម្ពីរអេសាយ ជំពូក៤៣ មានពេញទៅដោយពាក្យលើកទឹកចិត្ត សម្រាប់មនុស្សម្នាក់ៗ ឬជាក្រុម។ ចូរយើងពិចារណាអំពីពាក្យលើកទឹកចិត្តមួយចំនួន ក្នុងបទគម្ពីរនេះ ដែលមានដូចជា ព្រះអម្ចាស់បានបង្កើតអ្នក ជប់សូនអ្នក ប្រោសលោះអ្នក ហើយបានហៅចំឈ្មោះអ្នក(ខ.១)។ ព្រះអង្គនឹងគង់នៅជាមួយអ្នក(ខ.២) ព្រះអង្គជាព្រះដ៏បរិសុទ្ធនៃសាសន៍អ៊ីស្រាអែល ហើយព្រះអង្គជាព្រះសង្គ្រោះរបស់យើង(ខ.៣)។
ពេលណាអ្នកពិចារណា អំពីព្រះបន្ទូលសន្យារបស់ព្រះ សូមព្រះបន្ទូលព្រះអង្គលើកទឹកចិត្តអ្នក។ ហើយខណៈពេលដែលព្រះអង្គប្រទានអ្វីដែលអ្នកត្រូវការ អ្នកអាចលើកទឹកចិត្តអ្នកដទៃ។ យើងមិនចាំបាច់ត្រូវចំណាយប្រាក់ច្រើន ដើម្បីធ្វើប្រអប់ដាក់កាតដែលមានខគម្ពីរលើកទឹកចិត្តនោះឡើយ ប៉ុន្តែ ឥទ្ធិពលដែលខគម្ពីរនេះមាន ក្នុងការលើកទឹកចិត្ត គឺមានតម្លៃមិនអាចកាត់ថ្លៃបានទេ។ ទោះរយៈពេល៥ឆ្នាំបានកន្លងផុតទៅ គ្រួសារមួយនេះនៅតែឲ្យតម្លៃយ៉ាងខ្លាំង មកលើកាតទាំងនោះដែលមានខគម្ពីរសរសេរពីលើ។—Brent Hackett
តើអ្នកអាចរកឃើញព្រះបន្ទូលសន្យាអ្វីផ្សេងទៀត ក្នុងបទគម្ពីរអេសាយ ជំពូក៤៣?
តើអ្នកអាចចែកចាយកាតដែលមានព្រះបន្ទូលសន្យា ឬផ្ញើសារ ឬក៏អ៊ីមែលលើកទឹកចិត្ត ទៅកាន់នរណាខ្លះនៅថ្ងៃនេះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានប្រទានខគម្ពីរដែលមានព្រះបន្ទូលសន្យាជាច្រើន
ហើយខគម្ពីរតែមួយខ ក៏អាចលើកទឹកចិត្តទូលបង្គំ ចំពេលដែលទូលបង្គំមានទុក្ខ។
For further study, read Stay Alert and Walk with Your God at DiscoverODB.org.
គម្រោងអានព្រះគម្ពីររយៈពេល១ឆ្នាំ: ដានីយ៉ែល ១១-១២ និង យូដាស
