ចោទិយកថា ១៨:១៥-១៨
ព្រះយេហូវ៉ា ជាព្រះនៃឯង ទ្រង់នឹងបណ្តាលឲ្យមានហោរា១កើតឡើង ពីពួកបងប្អូនឯង ឲ្យដូចជាអញត្រូវឲ្យឯងរាល់គ្នាស្តាប់តាមអ្នកនោះចុះ។ ចោទិយកថា ១៨:១៥
មានពេលមួយលោកដាក វ៉ាយ(Doug White) បានទាក់ទងទៅប៉មបញ្ជាការហោះហើររបស់យន្តហោះ នៅអាកាសយានដ្ឋាន តាមវិទ្យុទាក់ទង ហើយក៏បានប្រាប់ពួកគេថា “ខ្ញុំមានរឿងបន្ទាន់។ អ្នកបើកបរយន្តហោះរបស់ខ្ញុំបានស្លាប់ហើយ”។ បន្ទាប់ពីយន្តហោះបានចាកចេញបានតែប៉ុន្មាននាទី អ្នកបើកបរយន្តហោះឯកជនដែលក្រុមគ្រួសាររបស់លោកដាកបានជិះនោះ ស្រាប់តែបានបាត់បង់ជីវិតភ្លាមៗ។ លោកដាក ក៏បានបោះជំហានចូលទៅក្នុងកាប៊ីនបើកបរយន្តហោះ ដោយជំនាញដែលបានទទួលការបណ្ដុះបណ្តាលទើបតែបាន៣ខែប៉ុណ្ណោះ ដោយប្រើយន្តហោះ ដែលមិនទំនើបដូចនេះទេ។ បន្ទាប់មក គាត់ក៏បានស្តាប់អ្នកគ្រប់គ្រងការហោះហើរ នៅអាកាសយានដ្ឋាន ដែលបានជួយប្រាប់គាត់ អំពីរបៀបចុះចតយន្តហោះ ដោយសុវត្ថិភាព។ ក្រោយមក លោកដាក ក៏បាននិយាយថា “ពួកគេបានសង្គ្រោះជីវិតក្រុមគ្រួសារខ្ញុំ ឲ្យរួចផុតពីសេចក្តីស្លាប់ ដែលអាចកើតឡើងភ្លាមៗ បើសិនជាយន្តហោះនោះធ្លាក់ ហើយត្រូវភ្លើងឆាបឆេះ”។
យើងមានព្រះមួយអង្គ ដែលមានតែទ្រង់ទេ ដែលអាចជួយនាំផ្លូវយើងឆ្លងកាត់បញ្ហាប្រឈមក្នុងជីវិត។ កាលលោកម៉ូសេថ្លែងទៅកាន់ប្រជាជនអ៊ីស្រាអែល គាត់មានប្រសាសន៍ថា “ព្រះយេហូវ៉ា ជាព្រះនៃឯង ទ្រង់នឹងបណ្តាលឲ្យមានហោរា១កើតឡើង ពីពួកបងប្អូនឯង ឲ្យដូចជាអញត្រូវឲ្យឯងរាល់គ្នាស្តាប់តាមអ្នកនោះចុះ”(ចោទិយកថា ១៨:១៥)។ ព្រះបន្ទូលសន្យានេះ គឺបានចង្អុលបង្ហាញ អំពីការបន្តវេនរបស់ហោរា ដែលព្រះប្រទានរាស្រ្តព្រះអង្គ តែក៏បាននិយាយអំពីព្រះមែស៊ីផងដែរ។ នៅសម័យក្រោយមកទៀត សាវ័កពេត្រុស និងលោកស្តេផានក៏បានលើកឡើងថា ហោរាដែលខ្ពង់ខ្ពស់បំផុត គឺព្រះយេស៊ូវ(៣:១៩-២២ ៧:៣៧,៥១-៥៦)។ មានតែព្រះអង្គទេដែលបានយាងមក ដើម្បីប្រាប់យើង ហើយជួយយើងដោយផ្ទាល់ ឲ្យដើរតាមសេចក្តីបង្គាប់របស់ព្រះ ដែលមានក្តីស្រឡាញ់ និងប្រកបដោយប្រាជ្ញា(ចោទិយកថា ១៨:១៨)។
កាលព្រះយេស៊ូវកំពុងបំពេញព្រះរាជកិច្ចនៅលើផែនដី ព្រះវរបិតាបានមានបន្ទូលថា “នេះជាកូនស្ងួនភ្ងាអញ ចូរស្តាប់តាមចុះ”(ម៉ាកុស ៩:៧)។ ដើម្បីរស់នៅប្រកបដោយប្រាជ្ញា ហើយជៀសវាងការខកចិត្ត និងគ្រោះថ្នាក់ខាងវិញ្ញាណ ចូរយើងស្តាប់តាមព្រះយេស៊ូវ ដែលកំពុងមានបន្ទូលមកយើងតាមរយៈព្រះគម្ពីរប៊ីប និងព្រះវិញ្ញាណបរិសុទ្ធ។ ការស្តាប់តាមព្រះអង្គនាំឲ្យជីវិតយើងរស់នៅ តាមផ្លូវត្រឹមត្រូវ ហើយចំគោលដៅដែលព្រះអង្គបានកំណត់។—Tom Felten
ហេតុអ្វីពេលខ្លះ យើងពិបាកស្តាប់តាមព្រះសូរសៀងព្រះគ្រីស្ទ ក្នុងលោកិយនេះ?
តើអ្នកអាចស្តាប់បង្គាប់តាមព្រះបន្ទូលប្រកបដោយប្រាជ្ញា និងក្តីស្រឡាញ់ នៅថ្ងៃនេះ យ៉ាងដូចម្តេចខ្លះ?
ឱព្រះយេស៊ូវ សូមព្រះអង្គជួយទូលបង្គំឲ្យឮ និងស្តាប់បង្គាប់តាមព្រះសូរសៀងព្រះអង្គ។
For further study, read Unknown Caller: Recognizing Jesus and the Kingdom at DiscoverODB.org.
គម្រោងអានព្រះគម្ពីររយៈពេល១ឆ្នាំ: អូបាឌា និង វិវរណៈ ៩
