អេសាយ ៤០:១-៨
ស្មៅក៏ស្វិតក្រៀម ហើយផ្ការោយរុះចុះ តែព្រះបន្ទូលរបស់ព្រះនៃយើងរាល់គ្នាវិញ នោះស្ថិតស្ថេរនៅជាដរាប។ អេសាយ ៤០:៨
កាលកូនប្រុសខ្ញុំនៅក្មេង គាត់បានអានសៀវភៅរឿងប្រឌិតសម្រាប់កុមារជាមួយខ្ញុំ។ សៀវភៅរឿងនេះនិយាយអំពីក្មេងប្រុសម្នាក់ដែលបានទាស់ប្រឆាំងនឹងគ្រូបង្រៀនរបស់គាត់ ដែលបានដាក់ឈ្មោះឲ្យប៊ិចមួយដើម។ កូនសិស្សម្នាក់នោះ ក៏បាននាំមិត្តរួមថ្នាក់របស់គាត់ ឲ្យដាក់ឈ្មោះថ្មីនោះ ឲ្យប៊ិចទាំងអស់ដែលពួកគេមាន។ រឿងនេះបានក៏បានឮខ្ចរខ្ចាយពេញទីក្រុង។ ទីបំផុត ប្រជាជននៅទូទាំងប្រទេសក៏បានផ្លាស់ប្តូររបៀបដែលពួកគេនិយាយអំពីប៊ិច ដោយសារមនុស្សជាច្រើនបានចាត់ទុករឿងប្រឌិតដែលក្មេងប្រុសនោះបានបង្កើត ជារឿងពិត។
ក្នុងប្រវត្តិសាស្រ្តទាំងមូល មនុស្សមិនល្អឥតខ្ចោះ បានបន្តកែប្រែសេចក្តីពិតពីមួយពេលទៅមួយពេល ហើយឱបក្រសោបយករឿងណាដែលពួកគេចូលចិត្ត ហើយចាត់ទុកវាជាការពិត។ ទោះជាយ៉ាងណាក៏ដោយ ព្រះគម្ពីរប៊ីបបានចង្អុលបង្ហាញ ឲ្យយើងស្គាល់សេចក្តីពិតតែមួយ ព្រះពិតតែមួយ និងផ្លូវតែមួយទៅកាន់សេចក្តីសង្រ្គោះ គឺព្រះមែស្ស៊ី ដែលសិរីល្អរបស់ព្រះបានសំដែងមក” តាមរយៈទ្រង់(អេសាយ ៤០:៥)។ ហោរាអេសាយបានបញ្ជាក់ថា មនុស្សមិនមានភាពស្ថិតស្ថេរ ងាយនឹងធ្វើខុស ហើយមិនអាចពឹងផ្អែកបាន គឺមិនខុសពីស្នាព្រះហស្តដទៃទៀតដែលមានបាប(ខ.៦-៧)។ គាត់បានមានប្រសាសន៍ថា “ស្មៅក៏ស្វិតក្រៀម ហើយផ្ការោយរុះចុះ តែព្រះបន្ទូលរបស់ព្រះនៃយើងរាល់គ្នាវិញ នោះស្ថិតស្ថេរនៅជាដរាប”(ខ.៨)។
បទទំនាយរបស់ហោរាអេសាយ អំពីព្រះមែស៊ីដែលត្រូវយាងមក បានផ្តល់ឲ្យយើងនូវមូលដ្ឋានគ្រឹះដ៏រឹងមាំ កន្លែងជ្រកកោនដែលមានសុវត្ថិភាព និងក្តីសង្ឃឹមដ៏ជាប់លាប់។ យើងអាចទុកចិត្តលើព្រះបន្ទូលព្រះ ពីព្រោះព្រះយេស៊ូវ គឺជាព្រះបន្ទូលព្រះ(យ៉ូហាន ១:១)។ ព្រះយេស៊ូវជាសេចក្តីពិត ដែលមិនដែលប្រែប្រួលឡើយ។—Xochitl Dixon
តើអ្នកចង់បដិសេធន៍ការអ្វីដែលព្រះគម្ពីរប៊ីបបានចែង ដោយសារអ្នកដទៃបានទទួលយកការបង្រៀនផ្សេងធ្វើជាសេចក្តីពិត នៅពេលណា?
តើការដឹងថា ព្រះយេស៊ូវគឺជាព្រះបន្ទូលព្រះ និងបានសម្រេចព្រះបន្ទូលសន្យា បានកម្សាន្តចិត្តអ្នកយ៉ាងណាខ្លះ?
ឱព្រះយេស៊ូវ សូមព្រះអង្គជួយទូលបង្គំឲ្យរស់នៅតាមរបៀបដែលធ្វើឲ្យគេដឹងថា ព្រះបន្ទូលក្នុងព្រះគម្ពីរប៊ីប គឺជាសេចក្តីពិតដែលមិនចេះប្រែប្រួល។
គម្រោងអានព្រះគម្ពីររយៈពេល១ឆ្នាំ: មីកា ១-៣ និង វិវរណៈ ១១
